မိမိတို့ မြေပုံမြို့နယ်ရှိ ကွမ်းချောင်းကျွန်းသည် အလျား ၁၈ မိုင်၊ အနံ ၈ မိုင်ရှိ အဓိကကျွန်းတစ်ကျွန်းဖြစ်ပါ ကြောင်း၊ ၎င်းကျွန်းပေါ်တွင် ၁၅၈၆၆ ဧက ကျယ်ဝန်းသော ကွမ်းချောင်းကြိုးဝိုင်း ရှိပါကြောင်း၊ ကွမ်းချောင်းကြိုးဝိုင်းသစ်တောကို ၁၉၁၀ ခုနှစ်၊ စက်တင်ဘာလ ၆ ရက်နေ့တွင် အမိန့်အမှတ် (၆၅/၁၉၁၀) ဖြင့် ကြိုးဝိုင်းသစ်တောအဖြစ် သတ်မှတ်ခဲ့ခြင်း ဖြစ်ပါကြောင်း၊ ကွမ်းချောင်းကြိုးဝိုင်းသစ်တောသည်  စည်စည်က ားကားနှင့် ဖွံ့ဖွံ့ဖြိုးဖြိုးရှိခဲ့သော မုတ်သုံသစ်တောကြီးလည်း ဖြစ်ခဲ့ပါကြောင်း။

လွန်ခဲ့သော နှစ် ၂၀ ကျော်ခန့်က အိန္ဒိယ ကုမ္ပဏီတစ်ခုက ကောင်းကင်ကြိုးများနှင့် သစ်များစွာ ထုတ်လုပ်ခဲ့ သည့်အပြင် နောက်ပိုင်းတွင် ထူးကုမ္ပဏီက အရှေ့ဘက်ခြမ်းကို စက်ယန္တရားများဖြင့် အကုန်လုံး ခုတ်ထွင် ရှင်းလင်းခဲ့သည့်အတွက် ယခုအခါ ဖုန်းဆိုးတောအနေဖြင့် မြင်တွေ့ရပါကြောင်း၊ ကွမ်းချောင်း ကြိုးဝိုင်း တောကိုဖျက်ပြီး အိမ်သုံး၊ လုပ်ငန်းသုံး နွယ်များ၊ ဝါးများ၊ သစ်များခုတ်သည့်အခါ တစ်ဖက်က အဟန့်အတားများ ကြုံတွေ့ရပါကြောင်း၊ သစ်တောကြိုးဝိုင်းဥပဒေနှင့်မလွတ်ကင်းဟုဆိုပြီး အဂတိတရားလိုက်စားမှုရှိပါကြောင်း၊ သစ်မှောင်ခို သမားများကလည်း ကျန်သည့်သစ်တစ်ပင်စ၊ နှစ်ပင်စများကိုခုတ်ယူနေသည်ကိုလည်း တွေ့ရှိရပါကြောင်း၊ ထို့ကြောင့် နိုင်ငံတော်အတွက်လည်း အကျိုးမရှိ၊ ဒေသခံများအတွက်လည်း  အခက် အခဲဖြစ်ပါကြောင်း၊ ကွမ်းချောင်းကျွန်းပတ်လည်တွင် ရွာပေါင်း ၁၅ ရွာခန့်ရှိပါကြောင်း၊ ကျွန်း၏ပတ်ဝန်းကျင်ရှိ အခြားကျွန်းများတွင်လည်း ရွာများစွာရှိပါကြောင်း၊ ၎င်းကျွန်းကိုသာ ဒေသခများအနေဖြင့် မှီခိုပြီး လိုအပ်သော အသုံးအဆောင်များကို ထင်းကအစ၊ နွယ်ကအစ ခုတ်ဖြတ် နေရသည်မှာ မဖြစ်သင့်ပါကြောင်း၊

ထို့ကြောင့် မေးခွန်း(၁) မြေပုံမြို့နယ် သစ်တောကြိုးဝိုင်းအား စနစ်တကျပြန်လည် ပြုစုပျိုးထောင်ရန် အစီအစဉ်ရှိ/မရှိ၊ အစီအစဉ်ရှိပါက မည်သည့် ကာလမှစတင်၍ မည်သို့စီမံဆောင်ရွက်မည်ကို သိရှိလိုပါကြောင်း၊ မေးခွန်း(၂) အစီအစဉ်မရှိသေးပါက ဒေသခံများ၏ အိမ်သုံးသစ်၊ လုပ်ငန်းခွင်သုံးသစ်၊ ထင်း၊ နွယ် စသည်တို့အတွက် လိုအပ်သောအခွင့်အလမ်းများကို မည်သို့စီမံဆောင်ရွက်ပေးမည်ကို သိရှိလိုပါကြောင်း၊ မေးခွန်း(၃) အစီအစဉ်မရှိပါကလည်း ဒေသခံပြည်သူများမှ ဥယျာဉ်ခြံမြေများ ဝင်ရောက်လုပ်ကိုင်နိုင်ရန်အတွက် ကြိုးဝိုင်းသစ်တောအဖြစ်မှ ပယ်ဖျက်ပေးနိုင်ခြင်းရှိ/မရှိ သိလိုပါကြောင်း မေးမြန်းပါသည်။