နိုင်ငံတော်၏ ဖွံ့ဖြိုးတိုးတက်မှု အခြေအနေသည် ပို့ဆောင်ရေးကဏ္ဍ တစ်ခုဖြစ်သော ရေကြောင်းလောက ဖွံ့ဖြိုး တိုးတက်ရေးနှင့် တိုက်ရိုက်သက်ဆိုင်ပါကြောင်း၊ ကမ္ဘာ့ကုန်စည် ပို့ဆောင်ရေး၏ သုံးပုံနှစ်ပုံခန့်က ရေကြောင်း သယ်ယူ ပို့ဆောင်ရေး ကဏ္ဍကိုသာ အသုံးပြုနေပါကြောင်း၊ ဤကဲ့သို့ကြီးမားသော သယ်ယူ ပို့ဆောင်ရေးကဏ္ဍတွင် မြန်မာနိုင်ငံ၏ အခန်းကဏ္ဍသည်လည်း အရေးပါသောနေရာတွင် ရှိပါကြောင်း၊ ကမ္ဘာ့ရေကြောင်းကို လုပ်သား တင်ပို့သော အရှေ့တောင် အာရှနိုင်ငံများတွင် မြန်မာနိုင်ငံသည် နံပါတ် (၃) နေရာတွင် ရှိပါကြောင်း၊ နိုင်ငံအတွက် နိုင်ငံခြားဝင်ငွေကို အဓိက ရှာဖွေပေးနေသည့် အခန်းကဏ္ဍတွင်လည်း မြန်မာနိုင်ငံသား ပင်လယ်ပျော် သ‌င်္ဘောသားများသည် ခေတ်အဆက်ဆက်တွင် ထိပ်ဆုံးက ရှိခဲ့ပါကြောင်း၊ လက်ရှိအချိန်တွင် နိုင်ငံအတွက် အရေးကြီးသော ရေကြောင်း ကဏ္ဍသည် စိန်ခေါ်မှုများစွာကို ရင်ဆိုင်နေရပြီး ပိုမိုကြီးမားသော စိန်ခေါ်မှုများဖြစ်သည့် လုံခြုံစိတ်ချရသော လုပ်ငန်းခွင်အတွက် အာမခံ မရှိခြင်းနှင့် အလုပ်အကိုင် ရှားပါးခြင်းတို့ ဖြစ်ပေါ်နေပါကြောင်း၊ မြန်မာနိုင်ငံတွင် မှတ်ပုံတင် ရရှိပြီး သ‌င်္ဘောသားဦးရေ တစ်သိန်းကျော်ရှိပြီး အမှန်တတယ် သ‌င်္ဘောပေါ်တွင် အလုပ်လုပ်ခွင်‌့ရသူ ၃၀၀၀၀ ဝန်းကျင်ခန့်သာ ရှိပါကြောင်း၊ မြောက်များစွာသော သ‌င်္ဘောသားများ သ‌င်္ဘောပေါ်တွင် အလုပ်လုပ်ခွင့် ရရှိရန်အတွက် ငွေကြေး ပေးဆောင်ရမှုများ ဖြစ်နေပြီး လိမ်လည် ခံရခြင်း၊ မမှန်ကန်သော သ‌င်္ဘောလိုင်းများ၏ အလွဲသုံးစား ပြုခံရခြင်း စသည်များကို ရင်ဆိုင်နေရပါကြောင်း၊  ယခုအချိန်တွင် သ‌င်္ဘောသားများအတွက် ကောင်းမွန်သော အာမခံ ရှိသည့် တနည်းအားဖြင့် သ‌င်္ဘောသားများ၏ အခွင့်အရေး ကြေညာစာတမ်း ဟု ခေါ်ဆိုနိုင်တဲ့ ၂၀၀၆ ခုနှစ်၊ ပင်လယ်ရေကြောင်း လုပ်သားဆိုင်ရာ သဘောတူညီချက် အကောင်အထည် ဖော်ရေးသည် အင်မတန် အရေးကြီးပါကြောင်း၊ ၎င်းသဘောတူညီချက်ကို မြန်မာနိုင်ငံ နိုင်ငံခြားရေးဝန်ကြီးဌာနက လက်မှတ်ရေးထိုးခဲ့သည်မှာ ၂၀၀၆ ခုနှစ်၊ မေလ ၂၅ ရက်နေ့က ဖြစ်ပါကြောင်း၊ MLC 2006 သည် I.L.O ၏ Convention တစ်ခုဖြစ်ပြီး လက်မှတ်ရေးထိုးပြီး တစ်နှစ်အကြာ အသက်ဝင်နေပြီ ဖြစ်သည့်အတွက် အကောင်အထည်ဖော်ရမည့် ကာလကို ရောက်ရှိနေပါပြီ ဖြစ်ပါကြောင်း၊ MLC 2006 ကို အကောင်အထည် ဖော်ရန် အတွက် အဓိက တာဝန်ရှိသူသည် ပို့ဆောင်ရေးနှင့် ဆက်သွယ်ရေး ဝန်ကြီးဌာန အောက်ရှိ ရေကြောင်း ပို့ဆောင်ရေး ညွှန်ကြားမှုဦးစီးဌာန ဖြစ်ပါကြောင်း၊ MLC 2006 အကော်အထည်ဖော်ရန် မိမိတို့နိုင်ငံ၏ ရေကြောင်း လောကအတွက် အခက်အခဲကြီး နှစ်ခုဖြစ်နေသော လုံခြုံစိတ်ချရသည့် လုပ်ငန်းခွင်အတွက် အာမခံ မရှိခြင်းနှင့် အလုပ်အကိုင် ရှားပါးခြင်းတို့ကို MLC 2006 နှင့်လျော်ညီသော ပြည်တွင်းဥပဒေများကို ပြင်ဆင်ပြဋ္ဌာန်းခြင်း၊ MLC 2006 ကို အကောင်အထည် ဖော်ပြခြင်းတို့ဖြင့် ဖြေရှင်းနိုင်ပါကြောင်း၊ လက်ရှိအချိန်တွင် နိုင်ငံတကာရှိ သ‌င်္ဘော ပိုင်ရှင်ကောင်းများကလည်း မိမိတို့နိုင်ငံတွင် MLC 2006 စိတ်ဝင်စားမှုနှင့် အကောင်အထည်ဖော်မှုများကို စောင့်ကြည့်လျက် ရှိပါကြောင်း၊ အလုပ်အကိုင် ရှားပါးခြင်းဟူသည့် ပြဿနာကြီးကို ဖြေရှင်းနိုင်မည့် နည်းလမ်း ထွက်ပေါက် တစ်ခုဖြစ်ပါကြောင်း၊ ထို့ကြောင့် MLC 2006 ကို အလျင်အမြန် အကောင်အထည် ဖော်ရန်သည် မိမိတို့ နိုင်ငံအတွက် အရေးကြီးသော ကိစ္စတစ်ခု ဖြစ်ပါကြောင်း၊ ၂၀၀၆ ခုနှစ် ပင်လယ်ရေကြောင်း လုပ်သားဆိုင်ရာ သဘောတူညီချက်ကို အကောင်အထည်ဖော်ရန် အခြေအနေများနှင်‌့ပတ်သက်ပြီး ပို့ဆောင်ရေးနှင့် ဆက်သွယ်ရေး ဝန်ကြီးဌာန အောက်ရှိ ရေကြောင်းပို့ဆောင်ရေး ညွှန်ကြားမှုဦးစီးဌာန၏ လုပ်ဆောင်မှုများ နှင့်ပတ်သက်၍ သိရှိ လိုပါကြောင်း မေးမြန်းပါသည်။