ကျွန်တော်တို့နိုင်ငံမှာ နိုင်ငံသားစစ်စစ်မိဘနှစ်ပါးက မွေးဖွားခဲ့တဲ့ နိုင်ငံသားများ၊ တိုင်းရင်းသားများဟာ အကြောင်းအမျိုးမျိုးကြောင့် နိုင်ငံသားစိစစ်ရေးကတ်ပြား မရရှိခြင်း၊ အိမ်ထောင်စုစာရင်းစာရွက်များ မရရှိခြင်းသည် နိုင်ငံသားအခွင့်အရေး၊ လူ့အခွင့်အရေးများ ဆုံးရှုံးနေခြင်းကြောင့် သက်ဆိုင်ရာတာဝန်ရှိ ဝန်ကြီးဌာနအနေဖြင့် မည်သို့ဖြေရှင်းပေးမည့် အစီအစဉ် ရှိ/မရှိနှင့် မရှိပါက မည်သည့်အတွက် ကြောင့်ဖြစ်ပါသနည်းနှင့် ရှိပါက မည်သည့်အချိန်တွင် မည်သို့မည်ပုံစီစဉ်ဆောင်ရွက်သွားမည်ကို သိရှိလိုပါကြောင်း မေးမြန်းပါသည်။

မိမိနယ်မြေလူထုတွေ့ဆုံပွဲများပြုလုပ်သည့်အခါ မိမိ၏မဲဆန္ဒနယ်နယ်မြေတွင် ရပ်ကွက် ၂၁ ရပ်ကွက်ရှိရာ ကျူးကျော်၍ ယာယီရွှေ့ပြောင်းနေထိုင်ကြသော ကျူးကျော်ရပ်ကွက် ၂၀ ရှိနေပါကြောင်း၊ ကျန်တစ်ခုမှာ အင်းစိန်ထောင် (CIT) နှင့် အင်းစိန်မြို့မရဲစခန်းရှိသည့် ရပ်ကွက်ဖြစ်ပါကြောင်း၊ အဆိုပါရပ်ကွက် ၂၀ ရှိ ပြည်သူများ၏ တင်ပြချက်၊ အကူအညီတောင်းခံမှုများကို လေ့လာကြည့်သည့်အခါ မြန်မာနိုင်ငံသားစစ်စစ် ဖြစ်ခဲ့သော်လည်း ဗဟုသုတနည်းပါးခြင်း၊ ပညာသင်ယူခွင့်နည်းပါးခြင်း၊ ဆင်းရဲချို့တဲ့ခြင်း၊ လမ်းပန်း ဆက်သွယ်ရေးခက်ခဲခြင်း၊ ငြိမ်းချမ်းရေးမရှိသည့် ဒေသများတွင် ကြီးပြင်းခဲ့ကြခြင်း၊ သဘာဝဘေးအန္တရာယ် ကျရောက်ခဲ့သည့် ဒေသများမှ မွေးဖွားကြီးပြင်းခဲ့ခြင်း စသည်တို့ကြောင့် အိမ်ထောင်စုစာရင်းမရှိခြင်း၊ မှတ်ပုံတင် သို့မဟုတ် နိုင်ငံသားကတ်ပြား သို့မဟုတ် ကိုင်ဆောင်သင့်သည့်ကတ်ပြား တစ်မျိုးမျိုးမရှိခြင်း တို့အတွက် နိုင်ငံသားတစ်ဦး၏ ရပိုင်ခွင့်များဆုံးရှုံးခဲ့ခြင်းကြောင့် ယခုဆိုလျှင် သူတို့၏ လက်ရှိမျိုးဆက် များအထိ ၎င်းဒုက္ခများကို ခံစားနေရခြင်းဖြစ်ပါကြောင်း၊ ထို့ကြောင့် တရားဥပဒေစိုးမိုးရေးကို အပြင်းအထန် ကြိုးစားနေရသည့် အစိုးရသစ်လက်ထက်တွင် နိုင်ငံတော်နှင့်နိုင်ငံသားတို့၏အကျိုး၊ လူငယ်မျိုးဆက်များ၏ ရှေ့ရေးအတွက် နိုင်ငံသားစိစစ်ရေးကတ်ပြားမရှိခြင်း၊ အိမ်ထောင်စုစာရင်းစာရွက်များမရှိခြင်းသည် နိုင်ငံသားအခွင့်အရေး၊ လူ့အခွင့်အရေးများ ဆုံးရှုံးနေခြင်းကြောင့် သက်ဆိုင်ရာတာဝန်ရှိဝန်ကြီးဌာန အနေဖြင့် မည်သို့မည်ပုံစီစဉ်ဆောင်ရွက်မည့် အစီအစဉ်ရှိ/မရှိနှင့် မရှိပါက မည်သည့်အတွက်ကြောင့် ဖြစ်သည်နှင့် ရှိပါက မည်သည်အချိန်တွင် မည်သို့မည်ပုံဆောင်ရွက်သွားမည်ကို သိရှိလိုပါကြောင်း မေးမြန်းပါသည်။