ခေါင်လန်ဖူးမြို့နယ်သည် မြန်မာနိုင်ငံ၏ မြောက်ဘက်အကျဆုံးတွင် တည်ရှိပြီး လမ်းပန်းဆက်သွယ်ရေး၊ ပညာရေး၊ ကျန်းမာရေး၊ စီးပွားရေး၊ လူမှုရေးစသည့် ကဏ္ဍများတွင် နောက်ကျကျန်နေသည့် မြို့နယ်ဖြစ်ပါကြောင်း၊ ပူတာအို၊  မဂွေစ၊ ငါ့လုံဒမ်နှင့် မြစ်ဝမ်ကောင်၊ ရီဒန်း၊ ထလားလော်နှင့် ခေါင်လန်ဖူးမြို့နယ်အထိ လမ်းအရှည်မိုင်ပေါင်း ၁၃၀ ကျော်ကွာဝေးပြီး ယခင်ခေတ်အဆက်ဆက်တွင် အဆိုပါလမ်းပေါ်၌ ကြားစခန်းများထားရှိပြီး အစောင့်များထားရှိကာ ခရီးသွားပြည်သူများ၊ နိုင်ငံ့ဝန်ထမ်းများ၊ ကျောင်းသူ/သားများ အဆင်ပြေစွာသွားလာပြီး ညအိပ်ညနား တည်းခိုနေကြရပါကြောင်း၊ ယခုအခါ ပူတာအိုမှ မဂွေစ ထိုမှတစ်ဆင့် နောင်မွန်မြို့အထိ ကားများသွားလာနိုင်ပြီ ဖြစ်သည့်အတွက် ကြားစခန်းအစောင့်များ ထားရှိခြင်းမပြုခဲ့ပါကြောင်း၊ သို့သော် မဂွေစမှ ခေါင်လန်ဖူးလမ်းအတွင်း နိုင်ငံတော်အစိုးရမှ သတ်မှတ်ထားသည့် ကြားစခန်းများအတွက် အစောင့်များထားရှိသည်မှာ ယနေ့အထိ ဖြစ်ပါကြောင်း၊ သို့သော် ရပ်ဘော- ငါ့လုံဒမ်-ခေါင်လန်ဖူးလမ်းအရှည် ၆၅ မိုင် ၄ ဖာလုံရှိပြီး ၎င်းလမ်းပေါ်တွင် ကြားစခန်းလေးခု ရှိပါကြောင်း၊ ၎င်း ကြားစခန်းလေးခုအနေဖြင့် မိုင်တိုင် (၂၆/ဝ) မိုင်တွင် ငါ့လုံဒမ်ကြားစခန်း၊ မိုင်တိုင်အမှတ် (၃၄၈/၄) မိုင်တွင် နုဝမ်ကောင်ကြားစခန်း၊ မိုင်တိုင်အမှတ် (၄၄/၄) တွင် ရီဒန်းကြားစခန်း၊ မိုင်တိုင်အမှတ် (၅၄/ဝ) မိုင်တွင် ထလားလော်ကြားစခန်းစသဖြင့် ကြားစခန်းလေးခု ရှိပါကြောင်း၊ မိုင်တိုင်အမှတ် (၂၆/ဝ) မိုင် ငါ့လုံဒမ်ကြားစခန်းတွင် တာဝန်ထမ်းဆောင်နေသည့် အိုအားဖြီးဆိုသူသည် ကြားစခန်းစောင့်အဖြစ် ၁၂ နှစ်၊ မိုင်တိုင်အမှတ် (၃၈/၄) မိုင်တွင် နုဝမ်ကောင် ကြားစခန်းအတွက် တာဝန်ထမ်းဆောင်နေသည့် ဦးဟဲစာခီမှာ ကြားစခန်းစောင့်အဖြစ် နှစ်ပေါင်း ၃၀၊ မိုင်တိုင်အမှတ် (၄၄/၄) ရီဒန်းတွင် ကြားစခန်းစောင့်အဖြစ် တာဝန်ထမ်းဆောင်နေသည့် ဦးစတုတ္ထဇေက ကြားစခန်းစောင့်အဖြစ် ၂၈ နှစ်၊ မိုင်တိုင်အမှတ် (၅၄/ဝ) မိုင် ထလားလော်တွင် ဦးအားရော်က ကြားစခန်းစောင့်အဖြစ် ၁၈ နှစ် အသီးသီး တာဝန်ကျေပွန်စွာ ထမ်းဆောင် ခဲ့သော်လည်း ယနေ့အချိန်အထိ အမြဲတမ်းဝန်ထမ်းခန့်အပ်ပေးခြင်း မရှိဘဲ ယာယီနေ့စား အဖြစ်သာ ခန့်ထားသည်ကိုလည်း တွေ့ရှိရပါကြောင်း၊ ယာယီနေ့စားအဖြစ် ခန့်အပ်သည်ဆိုသော်လည်း တချို့လများတွင် လစာရရှိခြင်းမရှိပါကြောင်း၊ ကြားစခန်းစောင့်များသည် ဌာနအကျိုးပြု လုပ်ငန်းဆောင်ရွက်နေသည့်အတွက် ရသင့်ရထိုက်သည့် အခွင့်အရေးများ၊ ရပိုင်ခွင့်များ မဆုံးရှုံးစေရန်အတွက် ဌာနမှဆောင်ရွက် ပေးရမည်ဖြစ်သော်လည်း ယနေ့အထိ ထိုက်သင့်သည့် ခံစားခွင့်မရှိသည့်အတွက် သင်‌့တော်သည့် ခံစားခွင့်ရရှိစေရန် အမြဲတမ်းဝန်ထမ်းခန့်အပ်ပေးခြင်းနှင့် ဝန်ထမ်းလစာအတိုင်းပေးရန် အစီအစဉ်ရှိ/မရှိကို သိလိုပါကြောင်း မေးမြန်းပါသည်။