မန်တုံမြို့နယ်၊ နမ္မတူမြို့နယ်ရှိ စစ်ဘေးဒုက္ခသည်များသည် နမ္မတူမြို့သို့ လာရောက်ခုံလှုံနေကြ ရပါကြောင်း၊ ကချင်နှင့်ချင်း ခရစ်ယာန်အသင်း‌တော် KBC 1 တွင် ၂၀၁၁ ခုနှစ်ကတည်းက လာရောက်ခုံလှုံနေသည့် စစ်ဘေးရှောင်များသည် ၂၀၁၅ ရွေးကောက်ပွဲတွင် မဲပေးပိုင်ခွင့် မရှိသဖြင့် နိုင်ငံသားအခွင့်အရေး ဆုံးရှုံးခံရပါကြောင်း၊ စစ်ဘေးဒုက္ခသည်စခန်း အများစုသည် သာသနာမြေ၊ သာသနာအဆောက်အအုံများတွင် တစ်ခဏတာ ခုံလှုံရန်အဆင်ပြေနိုင်သော်လည်း အချိန်မည်မျှကြာအောင် တိမ်းရှောင်နေရမည်ကိုမသိသည့် ဒေသများအတွက် သက်ဆိုင်ရာမှ နေရပ်မပြန်ခင် မြို့မှာရှိသည့် မြေလွတ်မြေလပ် သို့မဟုတ် သစ်တောကြိုးဝိုင်းများတွင် နေရာချထားပေးရန် လိုအပ်ပါကြောင်း၊

စစ်ဘေးရှောင်များ၏ ပညာရေးနှင့်ပတ်သက်ပြီး စခန်းရှောင်စခန်းတွင် စစ်ဘေးရှောင်အချင်းချင်း အခမဲ့ပြန်လည် ပညာသင်ကြားနေသည်ကို တွေ့ရှိရပါကြောင်း၊ ဘဝရပ်တည်နေထိုင်မှုနှင့်ပတ်သက်ပြီး ပဋိပက္ခဖြစ်နေသည့် ဒေသအတွက် အကြောက်တရားမရှိသည့် နေထိုင်မှုမျိုးကို ဖန်တီးပေးရန် လိုအပ်နေပါကြောင်းနှင့် အသက်ရှင်ရပ်တည်နေထိုင်ရန်လည်း ဝင်ငွေရရှိရေးအတွက် ယာယီစိုက်ပျိုးမြေများကို ဖန်တီးပေးရမည်ဖြစ်သည့်အပြင် အသက်မွေးဝမ်းကျောင်း အသိပညာပေးခြင်း၊ စိတ်ဓာတ်စွမ်းရည်မြှင့်တင်မှု အသိပညာပေးခြင်းတို့ကိုလည်း ဆောင်ရွက်ပေးရန် လိုအပ်ပါကြောင်း၊ ၂၀၁၇-၁၈ ဘဏ္ဍာရေးနှစ်တွင် ဦးစားပေး လုပ်ငန်းများ ဆောင်ရွက်ရာတွင်လည်း စစ်ဘေးရှောင်ပြည်သူများအတွက် ပြင်ဆင်လျာထားချက် ရှိမနေသည်ကိုလည်း တွေ့ရှိရပါကြောင်း၊ သို့ဖြစ်ပါ၍ ပြည်တွင်းစစ်ဆေးဒဏ်သင့်သည့် စစ်ဘေးရှောင် ပြည်သူများအတွက် သစ်တောကြိုးဝိုင်းတွင် ခေတ္တနေထိုင်နိုင်ရန်၊ ရေရှည်အသက်ရှင်ရပ်တည်နိုင်ရန်နှင့် စိတ်ပိုင်းဆိုင်ရာ၊ ရုပ်ပိုင်းဆိုင်ရာမြှင့်တင်ရန်ကို နိုင်ငံတော်မှ မည်သို့ဆောင်ရွက်ပေးနေကြောင်းနှင့် စစ်ဘေးရှောင် ပြည်သူများ၏ ဘဝလုံခြုံရေးအတွက် မည်သည့်မူဝါဒဖြင့် ဆောင်ရွက်နေသည်ကို သိရှိလိုပါကြောင်း မေးမြန်းပါသည်။