ြမင်းမူမြို့နယ်သည် တရုတ်၊ အိန္ဒိယနိုင်ငံများကို ကားလမ်းနှင့် တိုက်ရိုက်ဆက်သွယ်နိုင်သည့် ပြည်ထောင်စု လမ်းမကြီးများပေါ်တွင် တည်ရှိပါကြောင်း၊ အဆိုပါလမ်းမကြီး၏ စစ်ကိုင်း-မုံရွာလမ်းပိုင်းကို ရွှေတောင် ဖွံ့ဖြိုးတိုးတက်ရေးကုမ္ပဏီက B.O.T စနစ်ဖြင့် တာဝန်ယူဆောင်ရွက်လျက်ရှိပါကြောင်း၊ စာချုပ်မူရင်းအရ ၇၁ မိုင် ၆ ဖာလုံ၊ ပြင်ဆင်သည့်စာချုပ် အရ ၇၄ မိုင် ၇ ဖာလုံရှိပြီး အဆိုပါမိုင်အတွင်း၌ တိုးလ်ဂိတ် သုံးဂိတ်ထားရှိကောက်ခံလျက်ရှိပါကြောင်း၊ နေ့စဉ်ယာဉ်သွားလာမှု စီးရေ AATD ၆၀၀၀ ကျော်ရှိနေသည့်အတွက် မိုင် ၃၀ ကို တစ်ဂိတ်နှုန်းဖြင့် ကောက်ခံနေခြင်းသည် ကုန်စည် စီးဆင်းမှုနှင့် ခရီးသွားများအတွက် နှောင့်နှေးမှုကို မကြာခဏဖြစ်စေသည်သာမက အမှားယွင်းတစ်ခုဖြစ်ပေါ်လျှင် ကားအစီးရေ ရာနှင့်ချီပြီး ပိတ်ဆို့တတ်ပါကြောင်း၊

ကုမ္ပဏီနှင့် ဝန်ကြီးဌာနတို့ချုပ်ထားသည့် စာချုပ်အရ ဂိတ်တည်ဆောက်ရာနေရာပြသည့် နောက်ဆက်တွဲ(ခ)တွင် မြင်းမူမြို့က တိုးလ်ဂိတ်ပါရှိခြင်းမရှိပါကြောင်း၊ မြို့၏အဝင်ဝ  စည်ပင်သာယာ နယ်နိမိတ်ထဲမှာ တည်ဆောက်ထားခြင်းကြောင့် မြို့တွင်းသွားလာရေးနှင့် မြို့နယ် အတွင်း သွားလာ ရေးများတွင် များစွာအခက်အခဲဖြစ်စေပါကြောင်း၊ မြင်းမူမြို့ကို အရှေ့ဘက်တစ်ခြမ်း၊ အနောက်ဘက် တစ်ခြမ်း ပိုင်းခြားထားသကဲ့သို့ဖြစ်နေသည့်အပြင် အရောင်းအဝယ်များကျဆင်းသည့် အတွက် လူမှုစီးပွား ဖွံ့ဖြိုးတိုးတက်မှုကို များစွာအနှောင့်အယှက်အဟန့်အတား ဖြစ်ရပါကြောင်း၊ ထို့ကြောင့် မြင်းမူမြို့က ပြည်သူများအနေဖြင့် မြို့နယ်အတွင်း သွားလာရေးတွင် အတားအဆီးမရှိ အဆင်ပြေစွာ သွားလာရန် အတွက် (၁) စစ်ကိုင်း-မုံရွာ ကားလမ်းမပေါ်ရှိ မိုင်တိုင် ၄၆/၃ နှင့် ၄၆/၄ ကြား မြင်းမူမြို့က ရွှေတောင် ဖွံ့ဖြိုးတိုးတက်မှုကုမ္ပဏီ၏ လမ်းတံတားအသုံးပြုခကောက်ခံရေးဂိတ်အား ဖျက်သိမ်းပေးရန်အစီအစဉ်ရှိ/မရှိ၊ (၂) မဖျက်သိမ်းနိုင်ပါက အဘယ်ကြောင့်ဆိုသည်နှင့် မြင်းမူမြို့နယ်လူမှုစီးပွားရေးဘဝဖွံ့ဖြိုးတိုးတက်ရေး ဟာ အဟန့်အတားဖြစ်နေခြင်းအပေါ် မည်ကဲ့သို့ ဆောင်ရွက်ပေးမည်ကို သိရှိလိုပါကြောင်းမေးမြန်းပါသည်။