နေပြည်တော်-တောင်ညို-မြို့သစ်-ကန်ပြားလမ်းပိုင်းပေါ်ရှိ မိုင်တိုင်အမှတ်(၆) မှ ၂၂ မိုင် ၆ ဖာလုံအထိ  လမ်း၏ အကျယ်က ၁၂ ပေသာရှိပြီး အကွေ့အကောက် အလွန်ပေါများပါကြောင်း၊ မကွေးတိုင်းဒေသကြီး ကသာမက ရခိုင်ပြည်နယ်က လာရောက်သော ခရီးသည်များ နေပြည်တော်နှင့် ရန်ကုန်သို့ သွားရောက်ပါက ၎င်းလမ်းကို အသုံးပြု ရပါကြောင်း၊ လမ်းက အလွန် ကြပ်တည်း သောကြောင့် အဝေးပြေး ကားကြီးများကို  လမ်းဘေးရှောင်မောင်း လိုက်ပါက လမ်းပုခုံးသား များကလည်း မကောင်းမွန်ဘဲ အချို့နေရာများတွင် အနိမ်‌့အမြင့်များက ချောက်များကဲ့သို့ ဖြစ်ပြီး လမ်းချော်သောကြောင့် အလွန်အန္တရာယ် ရှိသော အနေအထား များဖြစ်ပါကြောင်း၊

ထို့ကြောင့် ၎င်းလမ်းအပိုင်းသည် အတက်အဆင်း၊ အကွေ့အကောက် များစွာရှိပြီး ကားနှစ်စီး လွတ်လပ်စွာ ရှောင်နိုင်ရန်အတွက် လမ်းချဲ့ပေးရန် လိုအပ်လျက် ရှိနေပါကြောင်း၊ သို့ဖြစ်ပါ၍ နေပြည်တော်-တောင်ညို-မြို့သစ်-ကန်ပြား(မကွေး) လမ်းပိုင်းပေါ်ရှိ မိုင်တိုင် အမှတ်(၆) မှ ၂၂ မိုင် ၆ ဖာလုံ လမ်းအထိ လမ်းကို အနည်းဆုံး ၁၈ ပေအကျယ်အထိ ချဲ့ပေးရန် အစီအစဉ် ရှိ/မရှိနှင့် အစီအစဉ် ရှိပါက မည်သည့်အချိန်တွင် စတင်ဆောင်ရွက်ပေးသွားမည်ကို သိရှိလိုကြောင်း မေးမြန်းပါသည်။