ြပည်ထောင်စုသမ္မတမြန်မာနိုင်ငံတော် ပြည်ထောင်စုရာထူးဝန်အဖွဲ့မှ ထုတ်ဝေသည့် နိုင်ငံ့ ဝန်ထမ်းနည်းဥပဒေများ စာမျက်နှာ ၉၃၊ အခန်း(၂၁) အငြိမ်းစားယူခြင်း ပုဒ်မ ၂၃၂ တွင်  အငြိမ်းစား ယူသောဝန်ထမ်းသည် (က) နိုင်ငံတော်၏ဝန်ထမ်းအဖွဲ့အစည်းတစ်ရပ်ရပ်တွင် တာဝန်ထမ်းဆောင် ခြင်းဖြစ်ရမည်။ (ခ) ဖွဲ့စည်းပုံဖြင့် ခွင့်ပြုထားသည့် ရာထူးတွင် အချိန်ပြည့်တာဝန် ထမ်းဆောင်ခြင်း ဖြစ်ရမည်။ (ဂ) တာဝန်ထမ်းဆောင်ခြင်းကြောင့် ရရှိသည့်လစာကို နိုင်ငံတော်ဘဏ္ဍာရန်ပုံငွေမှ ကျခံခြင်းဖြစ်ရမည်လို့ဖော်ပြထားပါကြောင်း၊ ပင်စင် ခုနစ်မျိုးရှိပါကြောင်း၊ (၁) သက်ပြည့်ပင်စင်၊ (၂) နှစ်ပြည့်ပင်စင်၊ (၃) နာမကျန်းပင်စင်၊ (၄) လျော်ကြေးပင်စင်၊ (၅) အထူးပင်စင်၊ (၆) မိသားစုပင်စင်၊ (၇)လျော့ပေါ့ပင်စင်ဆိုပြီး ပင်စင်အမျိုးအစားလိုက် အကျိုးခံစားခွင့်များ လည်းကွာခြားပါကြောင်း၊ ပင်စင်လစာများသည် ၁၉၈၈ မတိုင်ခင်ကအလွန်နည်းခဲ့ပါကြောင်း၊  ၁-၄-၁၉၈၉ ခုနှစ် နောက်ပိုင်းတွင် ပင်စင်လစာအပေါ် ယာယီထပ်ဆောင်းငွေနှင့် အပိုထောက်ပံ့ကြေးတွေ ပေးပြီး ပင်စင်လစာအဖြစ် သတ်မှတ်ပေးခဲ့ပါကြောင်း၊ ၁-၄-၁၉၉၃ ခုနှစ်မှစပြီး  ထုတ်ယူခဲ့သည့် ပင်စင်လစာ၏ ၂၅ ရာခိုင်နှုန်း လေးပုံ တစ်ပုံတိုးမြှင့်ပေးခဲ့ပါကြောင်း၊ ၁-၁၀-၁၉၉၄ ခုနှစ်တွင် မိသားစုပင်စင်ကို တစ်ဝက်နှုန်းမှ လေးပုံသုံးပုံနှုန်းအထိ တိုးမြှင့်ပေးခဲ့ပါကြောင်း၊ ၁-၄-၂၀၀၀ ခုနှစ်တွင် ထုတ်ယူသော လစာ၏ နှစ်ဆတိုးမြှင့်ပေးခဲ့ပါကြောင်း၊ ၁-၇-၂၀၁၁ တွင် ပင်စင်လစာကို ၁-၁-၂၀၁၀ စတင် ခွင့်ပြုသောဝန်ထမ်းလစာနှုန်းဖြင့် ခွင့်ပြုပေးခဲ့ပြီး ၁-၇-၂၀၁၁ ခုနှစ် တွင် ဝန်ထမ်းများနှင့် ပင်စင်လစာများကိုပါ  တိုးပေးခဲ့သော်လည်း ၁-၄-၂၀၁၅ ရက်နေ့ ဝန်ထမ်းလစာတိုးပေးသည့် အခါမှာတွင် ပင်စင်စားများကို ချန်ခဲ့ပါကြောင်း၊ ချန်လှပ်ခဲ့သည့်အတွက် ပင်စင်စားကြီးများ ရရှိသည့် လစာသည် အလွန်နည်းပါးခဲ့ပါကြောင်း၊

ပင်စင်စားများသည် အလုပ်လုပ်နိုင်ချိန်တွင် နိုင်ငံတော်အတွက် ပေးဆပ်ခဲ့ကြသူများဖြစ်ပါကြောင်း၊ များသောအားဖြင့် အသက်အရွယ်ကြီးရင့်အိုမင်း၍ ဝင်ငွေရသည့် အလုပ်ကိုမလုပ်နိုင်တော့သည့် အတွက် စားဝတ်နေရေးအခက်အခဲများစွာ ကြုံတွေ့ရပါကြောင်း၊ လက်ရှိအလုပ်လုပ်နေသည့် နိုင်ငံ့ဝန်ထမ်းများတွေအတွက်သာ စဉ်းစားပြီး ပင်စင်စားများအတွက် မစဉ်းစားနိုင်ခြင်းဆိုသည်မှ မသင့်တော်ပါကြောင်း၊ အခုဝန်ထမ်းဖြစ်နေသူတွေများသည် နောက်တစ်ကြိမ်တွင် ပင်စင်စားများ မလွှဲမသွေဖြစ်ကြရ မည်ဖြစ်ပါကြောင်း၊ ပင်စင်စားဝန်ထမ်များအတွက် အိမ်ရာများ တည်ဆောက် ပေးမှုကိုလည်း ကြိုဆိုပါကြောင်း ၊ နိုင်ငံတော်အစိုးရအနေဖြင့် ထိုက်သင်‌့သည့်အချိန်တွင် တိုးမြှင်‌့ ပေးနိုင်ခြင်းရှိ/မရှိ ကိုသိလိုပါကြောင်း မေးမြန်းပါသည်။