မိမိတို့မြို့နယ်တွင် ရပ်ကွက်ကျေးရွာအုပ်စု ၇၂ အုပ်စု၊ ကျေးရွာပေါင်း ၃၀ နှင်‌့ လူဦးရေပေါင်း ၂၂၀၀၀၀ ကျော်ရှိပါကြောင်း၊ အရှေ့အနောက် ၂၇ မိုင်၊ တောင်မြောက် ၁၉ မိုင်ရှိပြီး စတုရန်းမိုင်ပေါင်း ၅၁၄.၅၈ မိုင် ကျယ်ဝန်းပါကြောင်း၊ အများစုသည် တောင်သူလယ်သမားများဖြစ်ပြီး စပါးနှင့်သီးနှံံမျိုးစုံကို စိုက်ပျိုးကြပါကြောင်း၊ ကျေးလက်ကျန်းမာရေးဌာနခွဲ ၄၄ ခု၊ ကျေးလက်ကျန်းမာရေးဌာန ရှစ်ခု၊ တိုက်နယ်ဆေးရုံ သုံးခုနှင့် (၂၅) ခုတင်ဆံ့ ဆေးရုံတစ်ရုံရှိပါကြောင်း၊ လူဦးရေများပြားခြင်းကြောင့် ဆေးရုံတွင်လူနာများအမြဲတမ်း ပြည့်ကြပ်နေပါကြောင်း၊ မန္တလေးမြို့နှင့် ၆၅ မိုင်၊ ရွှေဘိုမြို့နှင့် ၂၂ မိုင်ဝေးသောကြောင့် ဆင်းရဲသော တောင်သူလယ်သမားများနှင့် အလုပ်သမားများသည် မြို့နယ်ပြည်သူ့ဆေးရုံကိုသာ အားကိုးကြရပါကြောင်း၊ အဆောက်အဦနှစ်ခု တိုးချဲ့ဆောက် လုပ်ပေးထားသော်လည်း လုံလောက်မှုမရှိသေးသည့်အတွက် ဝက်လက်မြို့နယ် ပြည်သူ့ဆေးရုံအား (၂၅) ခုတင်ဆံ့ ဆေးရုံမှ ခုတင်(၅၀)ဆံ့ဆေးရုံအဖြစ်သို့ တိုးမြှင့်ဖွင့်လှစ်ပေးရန် အစီအစဉ်ရှိ/မရှိနှင့် ရှိပါက မည်သည်‌့အချိန်တွင် စတင်အကောင်အထည်ဖော်ပေးမည်ကို သိရှိလိုပါကြောင်း မေးမြန်းပါသည်။