ယခုမေးမည့်မေးခွန်းနှင့်ပတ်သက်၍    ၆-၅-၂၀၁၆ ရက်နေ့ ဒုတိယအကြိမ် ပြည်သူ့လွှတ်တော် ပုံမှန်အစည်းအဝေးတွင် မေးမြန်းခဲ့ပြီး စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီးက ဖြေကြားခဲ့သည့်အခါ  ပင်လည်ဘူးမြို့နယ်အတွင်းရှိ ဘိုးဘေးဘီဘင် လက်ထက်မှစ၍ စိုက်ပျိုးလုပ်ကိုင်ခဲ့သော လယ်ယာမြေများသည် သစ်တောကြိုးဝိုင်း ကာကွယ်တော အတွင်း ကျရောက်နေပါသဖြင့် သယံဇာတနှင့်သဘာဝပတ်ဝန်းကျင်ထိန်းသိမ်းရေး ဝန်ကြီးဌာန အနေဖြင့် သစ်တောမြေအဖြစ်က ပယ်ဖျက်ပြီးမှသာ လယ်ယာမြေပုံစံ(၇)ကို သက်ဆိုင်ရာလယ်ယာ လုပ်ကိုင်သူများအား ထုတ်ပေးနိုင်မည်ဖြစ်ကြောင်း ကို ဖြေကြားခဲ့ပါကြောင်း၊

မိမိတို့မြို့နယ်တွင် သစ်တော ကြိုးဝိုင်း ၁၂ ခု၊ ကြိုးပြင်ကာကွယ်တော ၁၁ ခု၊ အဆိုပြုကာကွယ်တော ၁၀ ခု စုစုပေါင်းဧရိယာဧက ၆၈၉၃၇၂ ဧကရှိပါကြောင်း၊ သစ်တောဖုံးလွှမ်းဧရိယာသည် မြို့နယ်၏ ၈၄.၉ ရာခိုင်နှုန်း ဖုံးလွှမ်းနေပြီး တောင်သူ ၂၄၀၉ ဦး မှ လယ်ယာမြေဧက ၇၁၂၅ ဧကကို ဘိုးဘွားစဉ်ဆက်လုပ်ကိုင်ခဲ့ကြပါကြောင်း၊ လယ်ယာမြေအချို့မှာ မြို့နယ်မြေစာရင်းဦးစီးဌာန၏ ၁၉၇၄-၇၅ ခုနှစ်မှစပြီး မူလအတိုင်း ကွင်းမြေပုံများရှိခဲ့ကြပြီး ၂၀၁၁ ခုနှစ်အထိ မြေခွန် စည်းကြပ်ခဲ့ပါကြောင်း၊ ၎င်းလယ်ယာမြေများကို သစ်တောရေးရာဝန်ကြီးဌာနအနေဖြင့် ၃-၆-၂၀၁၁ ရက်စွဲပါကြေညာစာအမှတ်(၁၂၄/၂၀၁၁)အရ ကြိုးဝိုင်း/ကြိုးပြင်ကာကွယ်တောအဖြစ် သတ်မှတ်ခဲ့ ခြင်းဖြစ်ပါကြောင်း၊ ယင်းသတ်မှတ်ချက်များကို ပယ်ဖျက်ပေးနိုင်ရန် မြို့နယ်လယ်ယာ မြေစီမံ ခန့်ခွဲမှုကော်မတီအဆင့်ဆင့်မှ သက်ဆိုင်ရာသစ်တောဦးစီးဌာနအဆင့်ဆင့်သို့ ဆက်သွယ် ဆောင်ရွက် ခဲ့သော်လည်း ယခုအချိန်အထိ ပယ်ဖျက်ပေးနိုင်ခြင်း မရှိသေးပါကြောင်း၊ အထက် ဖော်ပြပါကိစ္စများနှင့် စပ်လျဉ်းပြီး မိမိတို့မြို့နယ်အတွင်းသို့ ပြင်ပ CSO အဖွဲ့တစ်ခုမှ လာရောက်ပြီး တောင်သူများ အတွက် ပုံစံ(၇)ရရှိရေးဆောင်ရွက်ပေးမည်ဟု ပြောဆိုစည်းရုံးပြီး ငွေကြေးတစ်စုံ တစ်ရာကောက်ခံ နေသည် ကိုလည်းသိရှိရပါကြောင်း၊ ပင်လည်ဘူးမြို့နယ်အတွင်းရှိ ရှေးဘိုးဘွားစဉ် ဆက်လုပ်ကိုင်ခဲ့ကြပြီး ယခုအခါ ကြိုးဝိုင်း/ကြိုးပြင် ကာကွယ်တောအတွင်းကျရောက်နေသော လယ်ယာမြေများကို သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနမှ လယ်ယာမြေအဖြစ် စွန့်လွှတ် ပေးနိုင်ရန်အစီအစဉ်ရှိ/မရှိ ကို သိရှိလိုပါကြောင်း မေးမြန်းပါသည်။