ယခင် MICCL ခေါ် Myanmar Copper Co.,Ltd က ခေတ်မီတူးဖော်စဉ်က ငရဲမီးကို နိုင်ငံခြားက တင်သွင်းပါကြောင်း၊ ငရဲမီးစက်ရုံနှင့် စက်ရုံတို့နီးခြင်းဝေးခြင်းသည် အဓိကမဟုတ်ဘဲ ပြည်သူများနှင့် လွတ်ကင်းရာ တစ်နေရာတွင် တည်ဆောက်သင့်ပါကြောင်း၊ ယခုမိုးကြိုးဆာဖျူရစ်စက်ရုံသည် ယခင်မဆလအစိုးရလက်ထက်က ရှေ့ပြေးစက်ရုံ တစ်နေ့တန် ၅၀ ကျကြေးနီစက်ရုံနေရာဖြစ်ပါကြောင်း၊ မိုးကြိုးဆာဖျူရစ်အက်စစ်စက်ရုံကို ၂၀၀၇ ခုနှစ်တွင်စတင်ပြီး ၂၀၁၃ ခုနှစ်အထိ တရားမဝင်လည်ပတ်ခဲ့ပါကြောင်း၊ ၂၀၁၃ ခုနှစ်တွင် စုံစမ်းစစ်ဆေးရေး ကော်မရှင်အစီရင်ခံစာထွက်မှသာ စမ်းသပ်လည်ပတ်ခွင့်ဟုဆိုပြီး ဆက်လက်ဆောင်ရွက်နေခြင်းဖြစ်ပါကြောင်း၊ 

မိုးကြိုးဆာဖျူရစ်အက်စစ်စက်ရုံသည် အောက်ပါဥပဒေပုဒ်မများနှင့်ငြိစွန်းပါကြောင်း၊ ၂၀၀၈ ခုနှစ်၊ ဖွဲ့စည်းပုံ အခြေခံဥပဒေပုဒ်မ ၄၅ နိုင်ငံတော်သည် သဘာဝပတ်ဝန်းကျင်ကို ကာကွယ်ထိန်းသိမ်းစောင့်ရှောက်ရန်၊ အခြေခံ ဥပဒေပုဒ်မ ၃၉၀(ခ) နိုင်ငံသားတိုင်းသည် သဘာဝပတ်ဝန်းကျင်ကို ထိန်းသိမ်းစောင့်ရှောက်ခြင်း၊ မြန်မာ့ရင်းနှီး မြှုပ်နှံမှုဥပဒေပုဒ်မ ၄၁ အောက်ပါရင်းနှီးမြှုပ်နှံမှုလုပ်ငန်းများကိုတားမြစ်သည့် ရင်းနှီးမြှုပ်နှံမှုလုပ်ငန်းများအဖြစ် သတ် မှတ်သည်။ ပုဒ်မခွဲ(ဃ) ပြည်သူတို့အပေါ် ဘေးအန္တရာယ်ဖြစ်စေနိုင်သော ရင်းနှီးမြှုပ်နှံမှုလုပ်ငန်းများ၊ ပုဒ်မခွဲ(င) သဘာဝပတ်ဝန်းကျင်နှင့် ဂေဟစနစ်တို့ကို ကြီးမားစွာထိခိုက်ပျက်စီးစေနိုင်သော ရင်းနှီးမြှုပ်နှံမှုလုပ်ငန်းများ စသဖြင့် ဥပဒေများ ရှိပါကြောင်း၊ အမှန်တကယ်တွင် ဥပဒေ၊နည်းဥပဒေ တစ်ချက်ငြိရုံဖြင့် ပြောင်းရွှေ့ပေးရမည့်ကိစ္စ ဖြစ်ပါကြောင်း၊

မိုးကြိုးဆာဖျူရစ်အက်စစ်စက်ရုံလည်ပတ်နေသည့်အတွက် ကြက်သွန်ခင်း၊ ပဲခင်း၊ နှမ်းခင်း၊ ခရမ်းချဉ်းခင်း တို့ ပျက်ကြပါကြောင်း၊        ထို့ကြောင့်ဆားလင်းကြီးမြို့နယ်၊ ကံကုန်းကျေးရွာအနီးရှိ မြန်မာ့စီးပွားရေးပိုင်လီမိတက်၏ မိုးကြိုးဆာဖျူရစ်အက်စစ်စက်ရုံလည်ပတ်ခြင်းကြောင့် လူမှုပတ်ဝန်းကျင်နှင့် သဘာဝပတ်ဝန်းကျင်တို့ကို ဆိုးရွားစွာ အန္တရာယ်ဖြစ်စေ၍ အဆိုပါစက်ရုံကို ပြောင်းရွှေ့ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။