မိမိတို့နိုင်ငံတွင် နိုင်ငံတော်အနေဖြင့် သုံးစွဲနေသည့် ဓာတ်အားများတွင် ရေအားလျှပ်စစ် မဟာဓာတ် အားလိုင်းမှ ထုတ်လုပ်ဖြန့်ဝေပေးသည့်လျှပ်စစ်မှ ၇၂ ရာခိုင်နှုန်း၊ သဘာဝဓာတ်ငွေ့သုံး တာဘိုင်စက် များမှ ၁၈ ရာခိုင်နှုန်း၊ ကျောက်မီးသွေး ၈ ရာခိုင်နှုန်း၊ ဒီဇယ်ဆီသုံးမီးစက်မှ ၂ ရာခိုင်နှုန်းရှိပြီး နိုင်ငံတော် အနေဖြင့် လျှပ်စစ်မီးတစ်ယူနစ်ကို အခြေခံ ၃၅ ကျပ်နှုန်း ကောက်ခံသည့်နေရာတွင် အရှုံးဖြစ်ပေါ် နေမှုများအနက် ဒီဇယ်ဆီသုံးနှင့် လျှပ်စစ်ဓာတ်အားပေးရေးလုပ်ငန်းသည် အရှုံးမှု အများဆုံးဖြစ် ပါကြောင်း၊ ပိုင်ကျုံမြို့နှင့် မြိုင်ကြီးငူအထူးဒေသနှစ်ခု၏ ၂၀၁၄-၁၅ ဘဏ္ဍာရေးနှစ်အခြေအနေကို ဥပမာအနေဖြင့် တင်ပြလိုပါကြောင်း၊ ပိုင်ကျုံမြို့တွင် အသုံးပြုသည့် စက်မှ၂၀၀ ကေဗွီအေရှိပြီး စက်မောင်းနာရီ ၈၄၄ နာရီ ၃၀ မိနစ်ရှိပြီး ထုတ်လုပ်ယူနစ် ၅၁၀၀၀ အတွက် ဒီဇယ်ဆီ ၅၀၆၉ ဂါလန် သုံးစွဲပြီး ဝင်ငွေအနေဖြင့် ကျပ်သန်း ၂.၁၉၄ ရရှိပြီး အသုံးစရိတ်ကျပ်သန်း ၂၂.၆၀၆ ရှိသဖြင့် အရှုံးငွေကျပ်သန်း ၂၀.၄၁၂ ရှိပြီး တစ်ယူနစ်ကို ကျပ် ၄၀၀ ကျော်ကျော်နှင့် တစ်နာရီကို ကျပ် ၂၄၀၀၀ ကျော်လောက် အရှုံးခံရသည်ကို တွေ့ရမည်ဖြစ်ပါကြောင်း၊  မြိုင်ကြီးငူအထူးဒေသတွင် အသုံးပြုစက်မှ ၂၀၀ ကေဗွီအေဖြစ်ပြီး စက်မောင်းနာရီ ၉၂၉ နာရီ ၂၀ မိနစ်၊ ထုတ်လုပ်ယူနစ် ၈၈၈၂၀ အတွက် ဒီဇယ်ဆီဂါလန် ၈၅၀၂ ဂါလန်ကုန်ကျပြီး ဝင်ငွေကျပ်သန်း ၃.၇၁၈ ရရှိ၍ အသုံးစရိတ်ကျပ်သန်း  ၃၁.၉၂၈ ရှိသည့်အတွက် အရှုံးငွေကျပ်သန်း ၂၈.၂၁၀ ရှိသဖြင့် တစ်ယူနစ်ကို ၃၂၈ ကျပ်ခန့်နှင့် တစ်နာရီကို ကျပ် ၃၀၀၀၀ ကျော်လောက် အရှုံးခံရသည်ကိုတွေ့ရပါကြောင်း၊

လက်ရှိ ပြည်နယ်နှင့်တိုင်းဒေသကြီးများတွင် ဒီဇယ်ဆီသုံးနှင့် မီးစက်ပေါင်း ၆၂၈ လုံးရှိပြီး ရွာပေါင်း ၂၇၆ နေရာတွင် အသုံးပြုနေရကြောင်းနှင့် တပ်ဆင်ထားသည့်စက်အင်အား အနေဖြင့် ကေဗွီအေပေါင်း ၇၉၃၁၃.၄ ရှိကြောင်း၊ မိမိ တင်ပြခဲ့သည့် မြို့နှစ်မြို့၏ အရှုံးဖြစ်ပေါ်မှုနှစ်ခုကို ပျမ်းမျှအနေဖြင့် တွက်ကြည့်မည်ဆိုပါက ၂၀၀ ကေဗွီအေ စက်တစ်လုံး၏ ပျမ်းမျှအရှုံးသည် တစ်နာရီတွင် ကျပ် ၂၇၀၀၀ ကျော်နှင့် တစ်ယူနစ်ကို ကျပ် ၃၆၀ ရှိသည်ကိုတွေ့ရပါကြောင်း၊ တစ်နိုင်ငံလုံးအနေအထားဖြင့် တွက်ချက်ကြည့်မည်ဆိုပါက တစ်နာရီတွင်ကျပ်သန်း ၁၀.၇ သန်း ကျော် အရှုံးဖြစ်ပေါ်နေသည်ကို တွေ့ရမည်ဖြစ်ပါကြောင်း၊  ဆင်းရဲမှုလျှော့ချရေး မူ(၈)ချက်တွင် နိုင်ငံ ဖွံ့ဖြိုးရေးအတွက် ရေအား၊ လေအား၊ နေစွမ်းအင်မှ နေထုတ်လုပ်သည့် လျှပ်စစ်ဓာတ်အား အပြည့်အဝ မပေးနိုင်သေးသရွေ့ ဒီဇယ်ဆီသုံးသည့် မီးစက်များကို အသုံးပြုရဦးမည်ဖြစ်ပါကြောင်း၊ ယခုလို အရှုံးဖြစ်ပေါ်နေမှုများကို ကာမိစေရန်၊ လျှပ်စစ်မီးလိုအပ်ချက်များအတွက် ဓာတ်အားတိုးချဲ့ ထုတ်လုပ် ဖြန့်ဝေနိုင်ဖို့ ဝန်ကြီးဌာန၏ ဆောင်ရွက်ထားမှုများနှင့်ပတ်သက်၍ လျှပ်စစ်ကဏ္ဍအရှုံး ဖြစ်ပေါ်နေမှု ကာမိစေမယ့်အစီအစဉ်များ ဆောင်ရွက်နေမှုအခြေအနေ၊ ဒီဇယ်အင်ဂျင်စက်သုံးစွဲသည့် မြို့များတွင် ဓာတ်အားလိုင်းများဖြင့် အစားထိုးဆောင်ရွက်မည့် အစီအစဉ်များနှင့် အစားထိုးပြီး မြို့ရွာနေရာများတွင် ဒီဇယ်အင်ဂျင်များကို ဆက်လက်ဆောင်ရွက်မည့် အစီအစဉ်များနှင့် အစိုးရသစ် ငါးနှစ်တာကာလ အတွင်း လျှပ်စစ်ကဏ္ဍဖွံ့ဖြိုးတိုးတက်လာရေးအတွက် ဆောင်ရွက်မည့်အစီအမံများကို သိရှိလိုပါ ကြောင်း မေးမြန်းပါသည်။