ရခိုင်လူ့အဖွဲ့အစည်းတွင် ဘူးလေးရာဖရုံဆင့်သကဲ့သို့ တစ်နေ့တခြားဆိုးဆိုးဝါးဝါးပျံ့နှံ့ရောက်ရှိလာသည်မှာ တရားမဝင်မူးယစ်ဆေးဝါးများဖြစ်ပါကြောင်း၊  ယခင်နှစ်များက ကြားဖူးရုံသာရှိခဲ့သည့် မူးယစ်ဆေးဝါးပုံစံ အမျိုး မျိုးသည်  ရခိုင်ပြည်နယ်တွင် ငါးပိ၊ ငါးခြောက်ဝယ်ရသည်ထက် ပိုမိုလွယ်ကူနေသည့် အခြေအနေမျိုး ဖြစ်နေ ပါကြောင်း၊ ရခိုင်ပြည်နယ်သည် ဆင်းရဲပြီး အလုပ်အကိုင်အခွင့်အလမ်း နည်းပါးပါကြောင်း၊ ထို့ကြောင့် စမ်းသပ်လုပ်ကိုင်ကြရာမှ လောဘသားကောင်များ ဖြစ်သွားကြသကဲ့သို့ တချို့ကစမ်းသပ်သုံးစွဲကြည်‌့ရာမှ မူးယစ်သားကောင်ဖြစ်သွားကြသည့်အတွက် မူးယစ်ဆေးဝါးဈေးကွက်သည် ပိုမိုကျယ်ပြန့်အားကောင်းလာ သည်ဟု ယူဆ၍ရပါကြောင်း၊ သတင်းတစ်ပုဒ်အရ ရခိုင်ပြည်နယ်တွင် မူးယစ်ဖြင့်ဖမ်းမိသည့်အမှုများသည် ၂၀၁၀ ခုနှစ်တွင် ၂၁ မှု၊ ၂၀၁၁ ခုနှစ်တွင် ၁၈ မှု၊ ၂၀၁၂ ခုနှစ်တွင် ၁၅ မှု၊  ၂၀၁၃ ခုနှစ်တွင် ၃၄ မှု၊ ၂၀၁၄ ခုနှစ်တွင် ၁၂ မှု၊ ၂၀၁၅ ခုနှစ်တွင် ၉၁ မှုနှင့် ၂၀၁၆ ခုနှစ်တွင် ၁၇၁  မှုရှိခဲ့ပါကြောင်း၊ ရခိုင်ပြည်နယ်တွင် တရားမဝင်မူးယစ်ဈေးကွက်ကြီးသည် တစ်နှစ်ထက်တစ်နှစ် အရှိန်အဟုန်ဖြင့်တိုးတက်လာနေသည်ကို မီးမောင်း ထိုးပြနေပါကြောင်း၊ ယခုလ ၁၂ ရက်နေ့ကလည်း ဘူးသီးတောင်မြို့နယ်တွင် သိန်းပေါင်း ၉၅၀၀ တန်ဖိုးရှိသော WY ဆေးပြားများဖမ်းဆီးရမိကြောင်း သတင်းတစ်ပုဒ်တွင်ဖတ်လိုက်ရပါကြောင်း၊ သက်ဆိုင်ရာကမဖမ်းမိဘဲ မည်မျှအထိအလုပ်ဖြစ်သွားကြပြီကို ယခုတောရော၊ မြို့ပါလွယ်ကူစွာရရှိနေသော အ‌ခြေအနေများက အထင် အရှားပြသနေပါကြောင်း၊  ဒုတိယသမ္မတဦးမြင့်ဆွေဦးဆောင်သော ရခိုင်ပြည်နယ်စုံစမ်းရေးကော်မရှင်၏ အစီရင်ခံစာတွင် ရခိုင်ပြည်နယ်မြောက်ပိုင်းတွင် မူးယစ်ဆေးဝါးရောင်းဝယ်မှုလမ်းကြောင်းတစ်ခု ဖြစ်ပေါ် နေသည်ဟု အတိအလင်းဖော်ပြထားပါကြောင်း၊

          မူးယစ်ဆေးဝါး၏အဓိကပစ်မှတ်က လူကြီးများမဟုတ်ပါကြောင်း၊ နိုင်ငံအတွက်အရေးကြီးသော လူ့စွမ်းအားအရင်းအမြစ်၏ အဖူးအပွင့်များသည် မူးယစ်သားကောင်များဖြစ်နေကြရပါကြောင်း၊ လူငယ်များ စုပြုံနေသော ဘော်ဒါဆောင်များ၊ စာသင်ကျောင်းများ၊ တက္ကသိုလ်၊ ကောလိပ်များသည် မူးယစ်ဆေးဝါး၏ အဓိကပစ်မှတ်ကြီးများဖြစ်နေပါကြောင်း၊ ပြီးခဲ့သည့်အပတ်က သတင်းတစ်ပုဒ်တွင် မူးယစ်ဆေးဝါးရောင်းဝယ်မှု ကို ကာကွယ်တားဆီးသောအနေဖြင့် စစ်တွေတက္ကသိုလ်တွင် ကျောင်းသူကျောင်းသားများကို ကျောင်းသား စိစစ်ရေးကတ်များနှင့် စနစ်တကျစိစစ်ပြီးမှ ကျောင်းဝင်းထဲကိုဝင်ခွင့်ပြုနေရသည်ဟု ဖတ်ရှုလိုက်ရသည့်အတွက် အခြေအနေ အလွန်ဆိုးရွားနေပြီး ရင်လေးစရာကောင်းသည့်ကိစ္စများဖြစ်သည်ကို မီးမောင်းထိုးပြနေခြင်း ဖြစ်ပါကြောင်း၊ လူကြီးမိဘများအနေဖြင့် နေ့စဉ်နှင့်အမျှရတက်မအေးဖြစ်နေကြရပါကြောင်း၊ မိမိကဒေသ ဆိုင်ရာအာဏာပိုင်များ၊ ဌာနဆိုင်ရာအကြီးအကဲများနှင့် အစည်းအဝေးပြုလုပ်သည့်အခါ အုပ်အော် သောင်းနင်းဖြစ်ပေါ်နေသော ဖြစ်စဉ်များအပေါ်တွင် အရေးမယူဘူးလားဟုမေးသည့်အခါ လာရောက် တိုင်ကြားမည့်သူမရှိသည့်အတွက် အရေးမယူနိုင်ပါဟု ပြန်လည်ဖြေကြားပါကြောင်း၊

မိမိတို့လူ့အဖွဲ့အစည်း၏ သဘာဝသည် အချင်းချင်းအားနာတတ်ပါကြောင်း၊ တစ်ဦးတစ်ယောက် နစ်နာ မည့်ကိစ္စကို မျက်နှာပျက်ခံပြီး ပြောဆိုလုပ်ကိုင်ရန်ဝန်လေးပါကြောင်း၊ ဌာနဆိုင်ရာရုံးများ အထူးသဖြင့် ရဲစခန်း၊ တရားရုံးများနှင့် ကင်းကင်းဝေးဝေးနေလိုပြီး နောက်ဆက်တွဲဖြစ်လာနိုင်သောပြဿနာများကို စိုးရိမ်ခြင်းများ ရှိနေသည့်အတွက် တစ်စုံတစ်ယောက်လာရောက်တိုင်တန်းသည်အထိ စောင့်နေသည်မှာ အစိုးရတစ်ရပ်၏ တာဝန်ယူမှု၊ တာဝန်ခံမှုများအပေါ် ပြည်သူတို့ယုံကြည်မှုနည်းလာစေရန် လုပ်ဆောင်နေသကဲ့သို့ ဖြစ်နေ သည့်အတွက် ယနေ့ရခိုင်ပြည်နယ်အနှံ့ တောရော၊ မြို့ပါ လွယ်ကူစွာပျံ့နှံလာနေသည့် မူးယစ်ဆေးဝါးများကို ကာကွယ်တားဆီးတိုက်ဖျက်ရန် နိုင်ငံတော်က မည်သို့လုပ်ဆောင်နေသည်ကို သိရှိလိုပါကြောင်း မေးမြန်း ပါသည်။