မိမိတို့မြန်မာနိုင်ငံတွင်လည်း CSO, NGO များ မည်မျှခန့် တိုးပွားနေသည်ကို မပြောနိုင်သော်လည်း ယခုလက်ရှိတွင် အသင်းအဖွဲ့များသည် ပြည်သူများ၏ အခက်အခဲများကို ကူညီပေးနေခြင်း၊ အသိပညာဗဟုသုတများ ဖွံ့ဖြိုးတိုးတက်လာအောင် ဆောင်ရွက်ပေးနေခြင်း၊ ရေဘေး/လေဘေးကဲ့သို့ သဘာဝဘေးအန္တရာယ် ကျရောက်လာသည့်အခါတွင်လည်း ကယ်ဆယ်ရေးနှင့်ပြန်လည်နေရာ ချထားရေးလုပ်ငန်းများတွင် ပါဝင်ကူညီ ဆောင်ရွက်ပေးခြင်းစသည့် ပြည်သူ့အကျိုးပြု လုပ်ငန်းများစွာကို ဆောင်ရွက်ပေးနေသည်မှာ အားလုံးအသိပင်ဖြစ်ပါကြောင်း၊ အသင်းအဖွဲ့များ၏ ကူညီဆောင်ရွက် ပေးမှုများကြောင့် နိုင်ငံသူနိုင်ငံသားများ၏ လူမှုစီးပွားဘဝ ဖွံ့ဖြိုးတိုးတက်လာစေရုံသာမက မြန်မာနိုင်ငံ၏ ဒီမိုကရေစီ အပြောင်းအလဲကိုပါများစွာ အထောက်အကူပြုစေခဲ့ခြင်းကို အသိအမှတ်ပြုရမည် ဖြစ်ပါကြောင်း၊ အသင်းအဖွဲ့များ မှတ်ပုံတင်ခြင်းဆိုင်ရာဥပဒေ အခန်း (၂) ပုဒ်မ ၃ ပုဒ်မခွဲ (ဂ) တွင်လည်း အသင်းအဖွဲ့များ၏ ဆောင်ရွက်ချက်များသည် နိုင်ငံတော်ဖွံ့ဖြိုးတိုးတက်မှုနှင့် နိုင်ငံသားများအကျိုးကို အထောက်အကူပြုစေရန် ဖြစ်ကြောင်း အတိအလင်းပြဋ္ဌာန်းထားပြီးလည်း ဖြစ်ပါကြောင်း၊

ထို့ကြောင့် အသင်းအဖွဲ့၏ နာမည်ကိုကြည့်လိုက်လျှင် တိုင်းပြည်အတွက်၊ ပြည်သူအတွက်၊ အများအကျိုးအတွက် ဆောင်ရွက်မလိုလိုနှင့် တိုင်းပြည်မတည်ငြိမ်၊ မအေးချမ်းအောင် လုပ်ဆောင်နေသည့် အသင်းအဖွဲ့များလည်း ရှိနေနိုင်ပါကြောင်း၊ ယခုလိုမူမမှန်သော အသင်းအဖွဲ့များ၏ လုပ်ရပ်များကြောင့် မှန်မှန်ကန်ကန်ဆောင်ရွက်နေသည့် အသင်းအဖွဲ့များကိုပါ ပြည်သူများအထင်အမြင် လွဲသွားနိုင်သကဲ့သို့ ယုံကြည်မှုများလည်း လျော့ကျသွားစေနိုင်ပါကြောင်း၊ အသင်းအဖွဲ့များ မှတ်ပုံတင်ခြင်းဆိုင်ရာ ဥပဒေအခန်း (၈) ပုဒ်မ ၂၇ တွင် မှတ်ပုံတင်ထားသည့် ပြည်တွင်းအသင်းအဖွဲ့များသည် နိုင်ငံတကာအစိုးရ တစ်ရပ်ရပ်ထံမှဖြစ်စေ၊ ပြည်တွင်းအသင်းအဖွဲ့ တစ်ရပ်ရပ်ထံမှဖြစ်စေ၊ ပုဂ္ဂိုလ်တစ်ဦးတစ်ယောက်ထံမှဖြစ်စေ အထောက်အပံ့များကို တည်ဆဲဥပဒေများနှင့်အညီ လက်ခံရယူနိုင်သည်ဟု ပြဋ္ဌာန်းထားပြီးလည်း ဖြစ်ပါကြောင်း၊ အသင်းအဖွဲ့များ ရေရှည်ရပ်တည်နိုင်ရန်အတွက် အသင်းဝင်များက ငွေစိုက်ထုတ်ပြီး ဖွဲ့စည်းတည်ထောင်ထားခြင်းမျိုး ရှိသကဲ့သို့ ပြည်တွင်း/ပ အထောက်အပံ့များရယူပြီး ဖွဲ့စည်းတည်ထောင်ထားသည့် အသင်းအဖွဲ့များလည်း ရှိပါကြောင်း၊ သို့ရာတွင် အသင်းအဖွဲ့များ မှတ်ပုံတင်ခြင်းဆိုင်ရာ ဥပဒေပုဒ်မ ၃၃ တွင်ဖော်ပြထား သကဲ့သို့ မူလမှတ်ပုံတင်စဉ်က ဖော်ပြခဲ့သော ရည်ရွယ်ချက်၊ လုပ်ငန်းစဉ်များ ပြောင်းလဲလုပ်ကိုင်ခြင်း၊ ကျော်လွန်ဆောင်ရွက်ခြင်းများ ပြုလုပ်လိုပါက သက်ဆိုင်ရာမှတ်ပုံတင်အဖွဲ့သို့ တင်ပြခွင့်ပြုချက် ရယူရမည်ဟု ပြဋ္ဌာန်းထားပြီးလည်း ဖြစ်ပါကြောင်း၊ အသင်းအဖွဲ့များအနေဖြင့် မူလရည်ရွယ်ချက်၊ လုပ်ငန်းစဉ်များအတိုင်း ပြည်သူ့အကျိုးပြုလုပ်ငန်းများ အမှန်တကယ်အကောင်အထည်ဖော် ဆောင်ရွက်မှုရှိ/မရှိကို သိရှိနိုင်ရန် အသင်းအဖွဲ့များပိုင် ငွေကြေးနှင့်ပစ္စည်းစာရင်းများကိုလည်း စိစစ်ရန်လိုအပ်မည် ဖြစ်ပါကြောင်း၊ အမှန်တကယ် ဆောင်ရွက်နေသည့် အသင်းအဖွဲ့များ ပိုမိုအားကောင်းလာစေရန်အတွက် ရည်ရွယ်ချက်မကောင်းသည့်၊ ကိုယ်ကျိုးရှာသော အသင်းအဖွဲ့များကိုလည်း စိစစ်ဖော်ထုတ်ရန် လိုအပ်ပါကြောင်း၊ သို့ဖြစ်ပါ၍ နိုင်ငံသူ/သားများ၏ အကျိုးကိုရှေးရှုပြီး မြန်မာနိုင်ငံအတွင်း အသင်းအဖွဲ့များ မှတ်ပုံတင်ခြင်းဆိုင်ရာ ဥပဒေအရ မှတ်ပုံတင်ထားသော အသင်းအဖွဲ့ မည်မျှရှိသနည်း၊ ယင်းအသင်းပိုင် ငွေကြေးနှင့် ပစ္စည်းစာရင်းများကို မည်သည့်အဖွဲ့က တာဝန်ယူ၍ မည်ကဲ့သို့ စိစစ်ဆောင်ရွက် လျက်ရှိသည်ကိုသိရှိလိုပါကြောင်း မေးမြန်းပါသည်။