(က) ဒဂုံမြို့သစ်(မြောက်ပိုင်း)၊ အမှတ်(၁၆) ရပ်ကွက်၊ မောင်းမကန်လမ်းဘေးရှိမြေ ၄ ဧကကို ရုပ်ရှင်မင်းသား ဦးနေအောင်ကို ချထားပေးပါကြောင်း၊ ၎င်းမြေသည် လန ၃၉ ချထားပေးသော လယ်သမား ပိုင်မြေဖြစ်ပြီး သပြေခြံ စိုက်နေပါကြောင်း၊ ၎င်းမြေရှိ မြောင်းသာသာရှိသော ချောင်းလေးကို လေစီးရေလာ ကောင်းမွန်စေရန်အတွက် ချထားပေးသည်ဟု သိရပါကြောင်း၊   (ခ)  ၄၈ ရပ်ကွက်တွင်  ဦးတင်စိုး (ရဲမှူးချုပ်၊ အငြိမ်းစား) က မြေ ၁.၂ ဧက တွင်နေထိုင်နေပါကြောင်း၊ အဆိုပါမြေတွင် လယ်သမားက သပြေခြံ၊ လယ်စိုက်ပါကြောင်း၊ ၂၀၁၆ ခုနှစ် ဇွန်လနောက်ပိုင်းတွင် မြေဂရန်ချပေးလိုက်သည့်အတွက် ခြံခတ်သည့်အခါ လယ်သမားနှင့်ပဋိပက္ခ ဖြစ်သောကြောင့်  မြို့နယ်အထွေထွေအုပ်ချုပ်ရေးမှူး၊ ရဲတပ်ဖွဲ့များက ဝင်ရောက်ထိန်းသိမ်း ရပါကြောင်း၊

(ဂ)  အလွန်နာမည်ကြီးသော ထီဆိုင်ပိုင်ရှင်ကြီး ဒေါ်တင်တင်မြင့်ကို ဒဂုံမြို့သစ်(မြောက်ပိုင်း)၊ ၄၈ ရပ်ကွက် U 10 ဆိုသည့်နေရာတွင် မြေ ၂ ဧက ချထားပေးသည့်အကြောင်းပြချက်က လှည်းကူးမြို့နယ်တွင် ဆရာတော်ကြီး တစ်ပါးနှင့် မြေအငြင်းပွားမှုတွင် ဒေါ်တင်တင်မြင့်က မြေကိုပေးအပ်လိုက်ရသည့်အတွက်  အစားထိုးပေးသည်ဟု သိရပါကြောင်း၊

(ဃ) လယ်သမားဦးဝင်းလှိုင်ပိုင်ဆိုင်သော မြေကွက်လပ် ၄ ဧကကို လယ်သမားကြီးက ပြန်လည် လျှောက်ထားရာတွင် ပြီးခဲ့သည့် ၃၀-၃-၂၀၁၇ ရက်နေ့တွင် လူမှုကူညီမှုအသင်း(သင်္ဃန်းကျွန်းရန်ကုန်) ကို မြေ ၁ ဧက ချပေးလိုကသည့်အတွက် မိမိတို့ကို တိုင်တန်းပါကြောင်း၊

ထို့ကြောင့် အဆိုပါမြေကွက်လေးကွက်ကို ချထားပေးရာတွင် မည်သည်မူဖြင့် ချထားပေးသည်ကို နားမလည် ဖြစ်ရပါကြောင်း၊ အလားတူမေးခွန်းကို ဒုတိယအကြိမ် ပြည်သူ့လွှတ်တော် တတိယပုံမှန်အစည်းအဝေး ဆဋ္ဌမ မြောက်နေ့တွင် မေးခဲ့သည့်အခါ ရန်ကုန်တိုင်းဒေသကြီးအစိုးရအဖွဲ့က ဖြေကြားရာတွင် မူငါးရပ်ဖြင့် ချထားပေးပါကြောင်း၊ (၁) အဆိုပါမြေတွင် ကာလကြာရှည်နေထိုင်ခဲ့သူဖြစ်ရမည်၊ (၂) အဆိုပါမြေတွင် လဝက ပုံစံ-၆၆/၆ ထွက်ထားသော သူဖြစ်ရမည်၊ (၃) အဆိုပါရပ်ကွက်၏ ရပ်ကွက်အုပ်ချုပ်ရေးမှူးက ကာလကြာရှည် နေထိုင်ကြောင်း ထောက်ခံချက်ပေးထားသောသူဖြစ်ရမည်၊ (၄) အိမ်နီးနားချင်းငါးဦးက ထောက်ခံသူဖြစ်ရမည်၊ (၅) ကာလကြာရှည်နေထိုင်ခဲ့သည့်အတွက် ‌ရေခွန်၊ မီးခွန်၊ လျှပ်စစ်ဓာတ်အားခွန်များကို ပေးဆောင်ထားသူကိုသာ ချပေးသည်ဟု ဖြေကြားခဲ့သော်လည်း ယခုမြေချပေးထားသော လေးဦးစလုံးသည် မယ်မယ်ရရ အကြောင်းပြချက်မရှိပါကြောင်း၊ ဒဂုံမြို့သစ်(မြောက်ပိုင်း) တွင် မနေထိုင်ပါကြောင်း၊ မည်သည်ကိုပြုလုပ်မည့် အကြောင်းပြချက်လည်းမရှိသော်လည်း ၎င်းတို့ရရှိသည့်အတွက်  ဒဂုံမြို့သစ်(မြောက်ပိုင်း) ရှိ မြေကွက်များကို မည်သည့်မူဖြင့် ချထားပေးနေသည်ကို သိရှိလိုပါကြောင်း မေးမြန်းပါသည်။