(ဃ)-တိုင်းရင်းဆေးပညာဦးစီးဌာန ညွှန်ကြားရေး မှူးချုပ်၊ တိုင်းရင်းဆေးတက္ကသိုလ် ပါမောက္ခချုပ်ရာ ထူးများနှင့် တိုင်းရင်းဆေးပညာ ဦးစီးဌာနအောက် ရှိလစ်လပ်ရာထူးနေရာများတွင်တိုင်းရင်းဆေးပညာ ရှင်များအား ဖြည့်ဆည်းခန့်ထားပေးရန် အစီအစဉ် ရှိ/မရှိ နှင့် စပ်လျဉ်းသည့် မေးခွ
မေးခွန်း အကြောင်းအရာ
ကျန်းမာရေးနှင့်အားကစားဝန်ကြီးဌာန အောက်ရှိ တိုင်းရင်းဆေးပညာဦးစီးဌာနကို ဖွဲ့စည်းပေါ်ပေါက်ခဲ့သည်မှာ နှစ်ပေါင်း ၃၀ ခန့်ရှိခဲ့ပါသော်လည်း တိုင်းရင်းဆေးပညာရှင်များသည် ကိုယ့်ကြမ္မာကိုယ်ဖန်တီးခွင့်၊ ဦးဆောင်ဦးရွက်ပြုခွင့် အပြည့်အဝမရရှိသည့်အတွက် တိုင်းရင်းဆေးပညာလောက လွတ်လပ်ရေးမရရှိသည်ကို တိုင်းရင်းဆေးဆရာများ ခံစားနားလည်နေကြရပါကြောင်း၊
ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီး၏ တိုင်းရင်းဆေးလောကဖွံ့ဖြိုးတိုးတက်ရေးကို အစွမ်းကုန်ကြိုးစားဆောင်ရွက်နေသည်ကိုလည်း အသိအမှတ်ပြုရမည် ဖြစ်ပါကြောင်း၊ သို့သော်လည်း ပြည်ထောင်စုဝန်ကြီး ကြိုးစားသော်လည်း အရာမထင်ဘဲ အဆိုးသံသရာထဲလည်နေရသည့် အဓိကအကြောင်းရင်းမှာ တိုင်းရင်းဆေးပညာဦးစီးဌာနကို ဦးဆောင်ဦးရွက်ပြုသည့် ညွှန်ကြားရေးမှူးချုပ်ကို လူမှန်နေရာမှန် ဖြစ်မနေခြင်းကြောင့်သာ ဖြစ်ပါကြောင်း၊ ထို့ကြောင့် တိုင်းရင်းဆေးပညာဦးစီးဌာန ညွှန်ကြားရေမှူးချုပ်၏ စီမံခန့်ခွဲမှုအလွဲများကို တိုင်းရင်းဆေးလောကတစ်ခုလုံး ဒုက္ခရောက်နေသည်ကို တိုင်းရင်းဆေးပညာဆိုင်ရာ အကြံပေးအဖွဲ့၊ တိုင်းရင်းဆေးကောင်စီ၊ တိုင်းရင်းဆေးဆရာအသင်း၊ တိုင်းရင်းဆေးထုတ်လုပ်သူများ အသင်းတို့က ဝန်ကြီးထံ အကြိမ်ကြိမ်တင်ပြခဲ့ပြီးလည်း ဖြစ်ပါကြောင်း၊ တိုင်းရင်းဆေးပညာဖွံ့ဖြိုးတိုးတက်ရေး ဆွေးနွေးပွဲတွင်လည်း ညွှန်ကြားရေးမှူးချုပ်၏ တိုင်းရင်းဆေးပညာအပေါ် စေတနာမမှန်သည်များကို တွေ့ရှိရသည့်အခါ တိုင်းရင်းဆေးအကြံပေးအဖွဲ့၊ တိုင်းရင်းဆေးကောင်စီ၊ တိုင်းရင်းဆေးအသင်း၊ ထုတ်လုပ်သူများအသင်းက တိုင်းရင်းဆေးကို ဖွံ့ဖြိုးတိုးတက်ရန်အတွက် လက်ရှိကာလတွင် ပြည်ထောင်စုဝန်ကြီးတာဝန်ယူစဉ် အပြောင်းအလဲမရှိပါက အခြေအနေပိုမိုဆိုးရွားလာမည့် အခြေအနေကို အချိန်မီပြုပြင်ပြောင်းလဲပေးရန် လိုအပ်ပါကြောင်း၊
တိုင်းရင်းဆေးပညာဦးစီးဌာနတွင် အနောက်တိုင်းပညာရှင်၊ ညွှန်ကြားရေးမှူးချုပ်၊ တိုင်းရင်းဆေးပညာ တက္ကသိုလ်ပါမေက္ခချုပ်အနက် ကောင်းစွာဦးဆောင်နိုင်သည်ကို အသိအမှတ်ပြုပါကြောင်း၊ သို့သော်လည်း အများစုသည် ၎င်းတို့သင်ယူ တက်မြောက်ကျွမ်းကျင်သည့်ပညာဖြင့် တိုင်းရင်းဆေးပညာတို့ သဘောသဘာဝ ကွဲပြားခြားနားခြင်း၊ တိုင်းရင်းဆေးပညာနှင့်သမိုင်းကိုမသိခြင်း၊ တိုင်းရင်းဆေးပညာရှင်များနှင့် ညှိနှိုင်းဆောင်ရွက်မှုမရှိခြင်း၊ တိုင်းရင်းဆေးကို မယုံကြည်ဘဲ ကိုယ်တတ်သိရာရှုထောင့်မှ တိုင်းရင်းဆေးပညာအပေါ် တစ်ဖက်သတ်အကဲဖြတ် ဆောင်ရွက်ချက်များကြောင့် တိုင်းရင်းဆေးပညာ လောကသည် ယခုကဲ့သို့ ဖွံ့ဖြိုးတိုးတက်မှုမရှိဘဲ စိုးရိမ်သောကများဖြင့် ရင်ဆိုင်နေရခြင်းဖြစ်ပါကြောင်း၊ ထို့ကြောင့် တိုင်းရင်းဆေးပညာရှင်များတွင် ရင့်ကျက်သည့် အတွေ့အကြုံရှိသော ပုဂ္ဂိုလ်များရှိပြီး ဖြစ်သည့်အတွက် ပြည်ထောင်စုဝန်ကြီးအနေဖြင့် စွမ်းဆောင်ရည်ရှိပြီး စေတနာမှန်ရှိသော တိုင်းရင်းဆေးကိုယုံကြည်သည့် ပုဂ္ဂိုလ်များကို ခန့်အပ်ပေးရန် အစီအစဉ် ရှိ/မရှိ သိရှိလိုကြောင်း မေးမြန်းပါသည်။