၂၀၁၅ ခုနှစ် ဇူလိုင်လနှင့် သြဂုတ်လတို့တွင် မိုးသည်းထန်စွာရွာသွန်းမှုကြောင့် ချင်းပြည်နယ်၊ ဟားခါးမြို့အပါအဝင် မတူပီမြို့တွင်လည်း မြေပြိုမှုဖြစ်ခဲ့ပြီး အိမ်ခြေ ၃၀ ကျော် ပျက်စီးခဲ့ပါကြောင်း၊ ဟားခါးမြို့ မြေပြိုမှုကို နိုင်ငံတော်အစိုးရနှင့် NGO များမှလည်း အမြောက်အမြား ကူညီထောက်ပံ့ ပေးခဲ့ကြသော်လည်း မတူပီမြို့တွင် ဖုန်းလိုင်းမကောင်းခြင်း၊ အင်တာနက်လိုင်းများ မရှိခြင်းတို့ကြောင့် လူသိနည်းခဲ့ပြီး ပြန်လည်တည်ဆောက်ရေးလုပ်ငန်းများ လုံးဝမရှိခဲ့ပါကြောင်း၊သို့သော် ပြီးခဲ့သော ပွင့်လင်းရာသီတွင် တစ်စုံတစ်ရာပြုပြင်ကာကွယ် ထိန်းသိမ်းတည်ဆောက်မှု မရှိသည့်အတွက် ယခုနှစ်မိုးရာသီတွင်လည်း မြေပြိုမှုများ  ဆက်လက် ဖြစ်ပေါ်ခဲ့ပါကြောင်း၊ ယခုအတိုင်းသာ ထိန်းသိမ်းကာကွယ်မှုမပြုလုပ်ဘဲ ထားမည်ဆိုပါက မတူပီမြို့ ခါးပြတ်သွားနိုင်သည့် အခြေအနေ ဧကန်ကြုံတွေ့ လာနိုင်ပါကြောင်း၊

ယခုကဲ့သို့ မြေပြိုရသည့် အဓိကအကြောင်းအရင်းမှာ မြို့စတင်တည်ဆောက်စဉ်က ရေနုတ်မြောင်းများ စနစ်တကျ မတည်ဆောက်ထားခြင်းကြောင့် မိုးရာသီတွင် မိုးများပြီး ရေများတိုက်စားမှု နှစ်ပေါင်းများစွာ ကြုံတွေ့လာရခြင်းကြောင့် ဖြစ်ပါကြောင်း၊  မြေပြိုမှုကို အမြန်ဆုံးမကာကွယ်နိုင်ပါက လာမည့် လေး၊ ငါးနှစ်အတွင်း လုံးလုံး ပျက်စီးသွားနိုင်သည့်အတွက် နိုင်ငံတော်အစိုးရမှ အထူးအလေးထားပြီး မတူပီမြို့ ကာကွယ်ထိန်းသိမ်းရေးရန်ပုံငွေကို ထောက်ပံ့ပေးစေလိုပါကြောင်း၊

တစ်မြို့လုံး၏ ပြိုပျက်မှုအခြေအနေကို မြို့နယ်အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့၊ မြို့နယ်ပြည်သူ့ ဆောက်လုပ်ရေးလုပ်ငန်းမှ အင်ဂျင်နီယာများနှင့် လေးရပ်ကွက် အုပ်ချုပ်ရေးမှူးများ၊ မြို့မိမြို့ဖများ၏ ကွင်းဆင်းတိုင်းတာမှု အသေးစိတ်အချက်အလက်များကို ပြည်နယ်အစိုးရမှတစ်ဆင့် ပြည်ထောင်စုအစိုးရကိုပေးပို့ပြီး ဖြစ်ပါကြောင်း၊သို့ဖြစ်ပါ၍ မတူပီမြို့ မြေပြိုမှုကို နိုင်ငံတော်သမ္မတရန်ပုံငွေဖြင့် တည်ဆောက်ပေးရန် အစီအစဉ်ရှိ/မရှိ သိရှိလိုကြောင်း မေးမြန်းပါသည်။