ကချင်ပြည်နယ်၊ မံစီမြို့နယ်သည် ၁၉၇၃ ခုနှစ်ကနေစပြီး ပြည်ထဲရေးဝန်ကြီးဌာန၏ အမိန့်ပြန်တမ်းအရ ရပ်ကွက် လေးရပ်ကွက်၊ ကျေးရွာအုပ်စု ၄၀၊ ကျေးရွာပေါင်း ၂၃၄ ရွာနှင့် မြို့တစ်ခုအဖြစ် အတည်ပြုသတ်မှတ်ခဲ့ပြီး ၁၉၉၉ ခုနှစ်အရောက်တွင် သစ်တောရေးရာဝန်ကြီးဌာန မံစီမြို့နယ်၊ မြို့ပေါ် ၄ ရပ်ကွက်နှင့် သစ်တောကြိုးဝိုင်းဧရိယာ ကျန်တစ်မြို့နယ်လုံးရှိ ကျေးရွာမြေများ၊ စိုက်ပျိုးမြေများ၊ မြေလွတ်/မြေရိုင်းများကို သစ်တောဥပဒေနှင့် သစ်တောကြိုးပြင် ကာကွယ်ဧရိယာဖြင့် သတ်မှတ်ခြင်း ခံခဲ့ရပါကြောင်း၊ မံစီမြို့နယ်၏ ဧရိယာအကျယ်အဝန်းသည် ၇၂၉၇၀၉ ဧကရှိပြီး ကြိုးပြင်တောကာကွယ်ရေး ဧရိယာ ၆၂၁၃၁၈ ဧကအထိ သတ်မှတ်ထားသည့် အတွက်ကြောင့် လွတ်ကင်းဧရိယာဆိုလျှင် ၁၀၃၃၉၁ ဧက ကျန်သည့်အတွက်ကြောင့် ကျေးရွာ/မြို့ပြ တိုးချဲ့စီမံကိန်းများ ဆောင်ရွက်သည့် နေရာတွင် အခက်အခဲရှိ လာနိုင်ပါကြောင်း၊ ပြည်ထဲရေး အမည်ပေါက် ကျေးရွာအုပ်စု ၃၅ အုပ်စုနှင့် ကျေးရွာပေါင်း ၂၁၁ ရွာသည်လည်း ခုချိန်ထိ ကြိုးဝိုင်းတော/ကြိုးပြင်ကာကွယ်တောထဲတွင် ကျရောက်နေဆဲ ဖြစ်သည့်အတွက် ကျွန်းသစ်၊ အခြားအဖိုးတန် ပစ္စည်းများ ပေါက်ရောက်ထွက်ရှိခြင်း မရှိတော့ပါကြောင်း၊ ယခုလို ကြိုးဝိုင်း/ကြိုးပြင်ကာကွယ်တောအတွင်း ကျရောက်နေသည့် အတွက် ဒေသဖွံ့ဖြိုးရေးလုပ်ငန်း များ ဆောင်ရွက်သည့် နေရာတွင်လည်းများစွာ အခက်အခဲရှိနေပါကြောင်း၊ လတ်တလောအခြေအနေတွင် မိမိတို့ မံစီမြို့နယ်၊ မိုင်းခေါင်ဒေသ ဘက်တွင် ဒေသလုံခြုံရေးကို အကြောင်းပြုပြီး လယ်ယာမြေလုပ်ပိုင်ခွင့် ကန့်သတ်ခံနေရပါကြောင်း၊ သစ်တောကြိုးဝိုင်း/ကြိုးပြင်ကာကွယ်တော ဧရိယာများ များပြားနေခြင်းကြောင့် ဒေသခံပြည်သူများ လယ်ယာလုပ်ပိုင်ခွင့်များ များစွာဆုံးရှုံးနေရပါကြောင်း၊ ထို့ကြောင့် မိမိတို့၏ စိုက်ပျိုးမြေများကို လွတ်လပ်စွာ လုပ်ကိုင်နိုင်ခွင့်နှင့် လယ်ယာမြေလက်မှတ်၊ လုပ်ပိုင်ခွင့်လက်မှတ် ပုံစံ(၇)ရရှိရေးတို့နှင့် စိုက်ပျိုးရေးစရိတ် ချေးငွေရရှိရေးတို့မှာ လတ်တလောတွင် အရေးတကြီးလိုအပ်လျက် ရှိနေပါကြောင်း၊

သို့ဖြစ်ပါသောကြောင့် ကချင်ပြည်နယ်၊ မံစီမြို့နယ်အတွင်း ကြိုးဝိုင်းတော၊ ကြိုးပြင်ကာကွယ်တောအတွင်း ကျရောက်လျက်ရှိသော ကျေးရွာမြေများ၊ ကျေးရွာများနှင့် သစ်တောဧရိယာများအား ပယ်ဖျက်ပေးရန် အစီအစဉ်ရှိ/မရှိနှင့် လူဦးရေတိုးတက် လာသည်နှင့်အမျှ လူနေအိမ်များ တိုးချဲ့ဆောက်လုပ်နိုင်ရန်အတွက်၊ စိုက်ပျိုးမြေများတိုးချဲ့ လုပ်ကိုင်နိုင်ရန်အတွက် ကြိုးပြင်ကာကွယ်တော ဧရိယာများ လျှော့ချပေးရန် အစီအစဉ် ရှိ/မရှိနှင့် ရှိမည်ဆိုပါက မည်သည့်အချိန်တွင် ဆောင်ရွက်ပေးမည်ကို သိရှိလိုပါကြောင်း မေးမြန်းပါသည်။