(က)-သာစည်မြို့နယ်ရှိ တိမ်ကောနေသောညောင် ရမ်းမင်းလှကန်အားဆက်လက်ပြုပြင်ပေးနိုင်ရေး အတွက် နိုင်ငံတော်သမ္မတ၏ သီးသန့်ရန်ပုံငွေမှ ခွဲဝေ ချထားပေးပါရန် နှင့်စပ်လျဉ်းသည့် မေးခွန်း
မေးခွန်း အကြောင်းအရာ
မန္တလေးတိုင်းဒေသကြီး၊ သာစည်မြို့နယ်ရှိ ညောင်ရမ်းမင်းလှကန်ကြီးသည် စိုက်ပျိုးဧကပေါင်း ၂၇၀၀၀ ကျော်ကို ရေပေးဝေနိုင်သည့် သာစည်မြို့နယ်ရှိ ဒေသခံတောင်သူများ၏ အားကိုးအားထားရာဖြစ်သည့် ကန်ကြီးလည်းဖြစ်ပါကြောင်း၊ အဆိုပါ ညောင်ရမ်းမင်းလှကန်အတွင်း မိုးရေများစီးဝင်ရာမှ သဲနုန်းများ ပို့ချမှုကြောင့်လည်းကောင်း၊ ငါးဖမ်းလုပ်ငန်းလုပ်ကိုင်သူများ၏ ဒိုက်အပေါ်သစ်ကိုင်းများ စုပုံထားရှိခြင်းကြောင့် လည်းကောင်း၊ ငါးဖမ်းမှုကြောင့်လည်းကောင်း တဖြည်းဖြည်း တိမ်ကောလာပြီး မိုးရာသီတွင် ရေဝင်ရောက်မှု ဧရိယာနည်းပါးမှုကြောင့် ရေကိုစုဆောင်းနိုင်ခြင်းမရှိဘဲ ရေပိုလွှဲမှတစ်ဆင့် ထုတ်ပေးရပါကြောင်း၊ အဆိုပါ ညောင်ရမ်းမင်းလှကန်ကြီးကို သဲနုန်းတူးဖော်ပေးရန် ၂၀၁၆-၁၇ ဘဏ္ဍာနှစ်တွင် ကျပ်သန်း တစ်ထောင်ခွင့်ပြု ရန်ပုံငွေရရှိပြီး ဖြစ်ပါကြောင်း၊ သို့ဖြစ်ပါ၍ အဆိုပါသဲနုန်းတူးဖော်ခြင်းလုပ်ငန်းကို ရေခန်းခြောက်သည့် အချိန်တွင် တူးဖော်ရန် ဖြစ်ပါကြောင်း၊ အဆိုပါ မင်းလှကန်ကြီးကောင်းမွန်မှ မိုးနည်းသောနှစ်များတွင် စိုက်ပျိုးရေပေးဝေနိုင်ပြီး ဒေသခံပြည်သူများ၏ လူမှုစီးပွားဘဝပိုမို တိုးတက်မည်ဖြစ်ပါကြောင်း၊ သို့ဖြစ်ပါ၍ သဲနုန်းတူးဖော်ရန်ကျန်ရှိသော ညောင်ရမ်းမင်းလှ ကန်ကြီးအား ပြန်လည်ပြုပြင်နိုင်ရန်အတွက် ရန်ပုံငွေခွဲဝေချထားပေးနိုင်ရေး အစီအစဉ်ရှိ/မရှိကို သိရှိလိုပါကြောင်း မေးမြန်းပါသည်။