မိမိအနေဖြင့် ယနေ့တောင်သူလယ်သမားများကို ‌ချေးပေးနေသည့်(အမတော်ကြေး) စိုက်ပျိုးစရိတ် ချေးငွေနှင့် ပတ်သက်သည့် မေးခွန်း (၄)ခုကို မေးမြန်းလိုပါကြောင်း၊ (၁) ယနေ့ အများစု တောင်သူများသည် စိုက်ပျိုးစရိတ်ကို စိုက်ချိန်အမီ  မရရှိသည့်အတွက်  စိုက်ချိန်မီ ရရှိနိုင်ရေးနိုင်ရေးကို ဆောင်ရွက် ပေးနိုင်ခြင်း ရှိ/မရှိနှင့် ဆောင်ရွက်ပေးနိုင်ခြင်းမရှိပါက မည်သည့် အခက်အခဲများ ရှိသည်ဆိုသည်ကို လည်းကောင်း၊ (၂) ခိုင်လုံသော အကြောင်းအချက်များကြောင့် စိုက်ပျိုးစရိတ် ချေးငွေကို အချိန်မီ ပေးဆပ်နိုင်ခြင်း မရှိသော တောင်သူများအတွက် စိုက်ပျိုးစရိတ် ဆက်လက်ချေးယူနိုင်ရန် စီမံဆောင်ရွက် ပေးနိုင်ခြင်း ရှိ/မရှိကိုလည်းကောင်း၊ (၃) ယခုအချိန်တွင် စပါးစိုက်ပျိုး စရိတ် ချေးငွေကို  ၁၀ ဧကအထိ ချေးပေးလျက်ရှိရာ စပါးစိုက်ဧက  ၁၀ ဧက ကျော်သော တောင်သူများအတွက် ပုံစံ(၇)ကို ပြပြီး တခြားဘဏ်များမှ စိုက်စရိတ်ချေး ယူနိုင်ရန်စီမံ ဆောင်ရွက်ပေးနိုင်ခြင်း ရှိ/မရှိကိုလည်းကောင်း၊ (၄) ယခု အချိန်တွင် လယ်ယာလုပ်သား ရှားပါးသည့် ပြဿနာကို တောင်သူများ ရင်ဆိုင်နေရခြင်းကြောင့် လယ်ယာသုံး စက်ကိရိယာများ ဝယ်ယူရန် နှစ်ရှည် ချေးငွေ များကို အတိုးနှုန်း သက်သာစွာဖြင့် ထုတ်ချေး ပေးရန် အစီအစဉ်ရှိ/မရှိ ဆိုသည်ကိုလည်းကောင်း သိရှိလိုပါ ကြောင်းမေးမြန်းပါသည်။