ပဲခူးတိုင်းဒေသကြီး၊ ရွှေကျင်မြို့နယ်အတွင်းရှိ ရွှေကျင်ချောင်းသည် ချောင်းများအထိ မိုင် ၂၀ ခန့် ရှည်လျား ပြီး ချောင်းကမ်းနဖူး မြေပြန့်လွင်ပြင်များတွင် ဒေသရာသီဥတုနှင့် ကိုက်ညီသည့် ရှောက်၊ ကျွဲကော၊ သံပုရာ၊ ဒူးရင်း၊ ဒညင်းနှင့် အခြားသီးပင်များ စိုက်ပျိုးသည့် ခြံမြေများ၊လယ်ယာ များ နှင့် ပြည့်နှက်လျက်ရှိပါကြောင်း၊ ရွှေကျင် ရေအားလျှပ်စစ်ဓာတ်အားပေးစက်ရုံတည်ဆောက်ရန် အတွက် အလျား ၃၆၀၀ ပေ၊ အမြင့် ၁၈၅ ပေ ရှိသည့် ရေကာတာမှ ရွှေကျင်ချောင်းကို တမံအုပ်ပြီး တည်ဆောင်ခဲ့ပါကြောင်း၊ တမံ၏ ကန်ရေပြည့်ရေလှောင်ပမာဏမှာ ၁၆၈၅၀၀၀ ဧကပေဖြစ်ပြီး ကန်ရေပြည့် ဧရိယာအကျယ်မှာ ၄၄၄ ဧရိယာစတုရန်းမိုင်ဖြစ်ပါကြောင်း၊ ယင်းသို့ ရေကာတာကြီး တည်ဆောက်လိုက်သည့်အတွက် ကန်ရေပြည့်ဧရိယာအတွင်း ကျရောက်သည့် တမံအထက်ပိုင်းရှိ ဒေသခံများ၏ ဥယျာဉ်/ခြံစိုက်ခင်း၊ လယ်၊ ကိုင်း၊ တောင်ယာများနှင့် ‌ကျေးရွာများ ပျက်စီးနစ်မြုပ်ခဲ့ရပါကြောင်း၊ ထို့အပြင် တမံအူကြောင်းနှင့် ယင်းအောက်ဘက်ခြမ်းတွင်ရှိသည့် ဥယျာဉ်/ခြံ/မြေ/ လယ်ယာကိုင်းမြေတို့မှာလည်း စက်ရုံ၊ ရုံးအဆောက်အအုံ၊ ဝန်ထမ်းတန်းလျား ဆောက်လုပ်ခြင်းနှင့် လမ်းဖောက်လုပ်ခြင်းများအတွက် သိမ်းဆည်းခြင်းခံခဲ့ရပါကြောင်း၊ သို့ဖြစ်ရာ မိမိတို့ ခြံမြေများ ပျက်စီးနစ်မြုပ်သိမ်းဆည်းခံရသည့်အတွက် တိုင်းရင်းသားပြည်သူတို့မှာ  ကြီးစွာသော ဒုက္ခများခံစားခဲ့ရပါကြောင်း၊ ယခုကဲ့သို့ နစ်နာဆုံးရှုံးခဲ့သည့်အတွက် အချို့မှာ သေဆုံးသည်အထိ ခံစားခဲ့ရပြီး တချို့မှာ ရရာအလုပ်ကို လုပ်ကိုင်ရပါကြောင်း၊ တချို့က မိမိတို့၏ သား/သမီးများသည် နိုင်ငံရပ်ခြားတွင် အလုပ်လုပ်ရသည့် အနေအထားမျိုးရှိခဲ့ပါကြောင်း၊ ဒေသခံများအနေဖြင့် အဆိုပါ နစ်နာမှုများအတွက် သက်ဆိုင်ရာများကို အကြိမ်ကြိမ်တောင်းဆို တင်ပြခဲ့သည့်အတွက် ၆-၂-၂၀၁၄ ရက်နေ့နှင့် ၁၄-၈-၂၀၁၅ ရက်နေ့တွင် နစ်နာသူများမှ ဦးဆောင်ပြီး တိုင်ကြားခဲ့သည့်အတွက် စုံစမ်းစစ်ဆေးမှုများ ပြုလုပ်ခဲ့သော်လည်း ယနေ့အချိန်ထိ မိမိတို့ကို စီမံဆောင်ရွက်ပေးခဲ့ခြင်းမျိုး မရှိခဲ့ပါကြောင်း၊ ထို့ကြောင့် မိမိမေးမြန်းလိုသည်မှာ ရွှေကျင်ရေအားလျှပ်စစ် ရေကာတာ ဆောက်လုပ်ရာတွင် ဥယျာဉ်/ခြံမြေ/လယ်ယာကိုင်းများ နစ်မြုပ်သိမ်းဆည်းခံရသည့် ဒေသခံပြည်သူများ၏ နစ်နာချက်များကို ဖြည့်ဆည်း ဆောင်ရွက်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။