လဲချားမြို့နယ်တွင် ၂၅ ခုတင်ဆံ့ဆေးရုံအဖြစ် တည်ဆောက်ဖွင့်လှစ်ဆောင်ရွက်လျက်ရှိပါကြောင်း၊  သို့သော် တိုးတက်လာသည့်လူဦးရေ၊ တက်ရောက်ဆေးကုသမှုခံယူသော လူနာအရေအတွက် တိုးတက်များပြားလာသည့်အတွက် လက်ရှိ ၂၅ ခုတင်ဆံံ့ဆေးရုံသည် နေရာမလုံလောက်မှုများ များစွာ ဖြစ်ပေါ်လျက်ရှိပါကြောင်း၊ ထို့အပြင် သံဃာဆောင်များကိုလည်း နေရာချထား အသုံးပြုနေရသည့် အခြေအနေဖြစ်နေသည့်အတွက် လဲချားမြို့နယ်ရှိ ၂၅ ခုတင်ဆံ့ဆေးရုံကို ၅၀ ခုတင်ဆံ့ စံကိုက်ဆေးရုံအဖြစ် တင်ပြထားသော်လည်း အခြေအနေအရ၊ လက်ရှိခေတ်ကာလအရ ခုတင် ၁၀၀ ဆံ့ဆေးရုံ တည်ဆောက်ပေးနိုင်ပါက ပိုမိုကောင်းမွန်မည်ဖြစ်ပါကြောင်း၊ ထို့အပြင် ဝမ်ယိမ်း၊ ပန်ပန်၊ ခါလန်ကျေးရွာအုပ်စုရှိ ကျေးလက်နေပြည်သူများသည် လဲချားမြို့နယ်ရှိဆေးရုံကို ရောက်ရန်အတွက် လမ်းခရီး ခက်ခဲကြမ်းတမ်းပါသဖြင့်  အလွယ်တကူ ကျန်းမာရေးစောင့်ရှောက်မှု ခံယူနိုင်ရန်အတွက် ဝမ်ယိန်းကျေးလက်ဆေးပေးခန်းကို တိုက်နယ်ဆေးပေးခန်းအဖြစ်လည်း ကောင်း တိုးမြှင့်ဖွင့်လှစ်ပေးလျှင် ပိုမိုသင့်လျော် ကောင်းမွန်မည်ဖြစ်ပါကြောင်း၊ ထို့အပြင် ဝမ်ပန်ဒေသရှိ ဆေးပေးခန်းကိုလည်း တိုက်နယ်ဆေးရုံအဖြစ် ဖွင့်လှစ်ဆောင်ရွက်ပေးနိုင်မည် ဆိုပါက တပ်မောက်၊ ဟိုတိ၊ ဝမ်ပန်၊ ဝမ်ထီစသဖြင့် ကျေးရွာအုပ်စုရှိ ပြည်သူများ၏ ကျန်းမာရေး စောင့်ရှောက်မှုလည်း အလွယ်တကူ လက်လှမ်းမီနိုင်ပါကြောင်း၊ ထို့ကြောင့် ယင်းဆေးရုံ ၂ ရုံကို တိုက်နယ်ဆေးရုံအဖြစ် ဖွင့်လှစ်ပေးရန် အစီအစဉ်ရှိ/မရှိ သိရှိလိုပါကြောင်း။

ကျန်းမာရေးဝန်ထမ်းများကိုလည်း ခန့်အပ်စေလွှတ်ထားပြီး ဖြစ်သော်လည်း လက်ရှိ အနေအထားအရ ကျန်းမာရေးဆေးပေးခန်း မတည်ဆောက်ပေးနိုင်သည့် အနေအထားကြောင့် ကျန်းမာရေးစောင့်ရှောက်မှု လုပ်ငန်းကို ကျယ်ကျယ်ပြန့်ပြန့် မလုပ်နိုင်သေးပါကြောင်း၊ သို့ဖြစ်ပါ၍ ကျန်းမာရေးစောင့်ရှောက်မှုလုပ်ငန်းကို ကျယ်ကျယ်ပြန့်ပြန့် ဆောင်ရွက်နိုင်ရန်အတွက် လက်ရှိ ကျေးလက်ကျန်းမာရေးဌာနများကို ဟိုတိကျေးရွာအုပ်စု၊ တပ်မောက်ကျေးရွာအုပ်စုနှင့် ဟဲစံ ကျေးရွာအုပ်စုရှိ ကျေးလက်ကျန်းမာရေးဌာနများကို ကျန်းမာရေးအဆောက်အဦ ဆောင်ရွက်ပေးရန် အစီအစဉ် ရှိ/မရှိနှင့် ဆောင်ရွက်ပေးမည်ဆိုပါက မည်သည့်အချိန်တွင် ဆောင်ရွက်ပေးမည်ကို သိရှိလိုကြောင်း မေးမြန်းပါသည်။