ခရီးစရိတ်နှင့်ပတ်သက်၍ FR-32 အရ ဝန်ထမ်းများ ပြည်သူ့အကျိုးအတွက် ခရီးသွားလာရာတွင် ကုန်ကျစရိတ်ကာမိရန် ထုတ်ပေးသည့်စရိတ်ဟု ဖော်ပြထားပြီး FR-95 အရ တာဝန်ဝတ္တရားဆောင်ရွက်ရာတွင် မလွဲမရှောင်သာ အမှန်ကုန်ကျခဲ့သော အသုံးစရိတ်များကို ကာမိစေရန် ထုတ်ပေးသောစရိတ်ဟု ဖော်ပြထားအပြင် FR-44 အရ လက်ခံရရှိသူ ဝန်ထမ်းအတွက် အမြတ်အစွန်းမဖြစ်စေရဟု သတ်မှတ်ပြဋ္ဌာန်းထားရှိပါကြောင်း၊ ထို့ကြောင့် မူလ အခြေခံနည်းဥပဒေပါ ပြဋ္ဌာန်းချက်များနှင့်အညီ ပြဋ္ဌာန်းချက်၊ သတ်မှတ်ချက် များကို ပြင်ဆင်ရန် လိုအပ်နေသည်ကို တွေ့ရပါကြောင်း၊

ခရီးစရိတ်ဥပဒေပါ ပြဋ္ဌာန်းချက်များမှ ရထား၊ သင်္ဘော၊ ကားမရှိသည့် နေရာများကို မိုင်နှုန်းစရိတ်နှင့် ပတ်သက်၍ ခွင့်ပြုနှုန်းသည် ဝန်ထမ်းအဖွဲ့အစည်းများ ရာထူးအဆင့် (၁)၊ (၂)၊ (၃) သည် တစ်မိုင်ကို ၇၅ ပြားနှုန်း၊ အဆင့်(၄)၊ (၅) သည် ပြား ၅၀ နှုန်း၊ အဆင့်(၆)၊ (၇) သည် ၃၈ ပြားနှုန်း၊ အဆင့် (၈)၊ (၉)၊ (၁၀) သည် ၂၅ ပြားနှုန်းနှင့် အဆင့် (၁၁) အောက်ကို ၁၃ ပြားနှုန်းဖြစ်သည့်အတွက် လက်ရှိခေတ်ကာလနှင့် လုံးဝဆီလျော်မှုမရှိသည်ကို တွေ့ရပါကြောင်း၊

နယ်လှည့်ခရီး စရိတ်အနေဖြင့် Burma Travelling Allowance Manual တွင်ပါသော ခရီးစရိတ် နည်းဥပဒေ ၈၅ အရ ရာထူးအဆင့် ရထား၊ သင်္ဘောဖြင့် သွားသည့်အခါ ရာထူးအဆင့် (၁)၊ (၂)၊ (၃) သည် မိုင် ၁၀၀ အထိ အထက်တန်း တစ်ဆ၊ မိုင် ၁၀၀ အတွက် နောက်တစ်ဆအတွက် ၆ ကျပ်ထက်မပိုသည့် အပိုကြေး၊ အဆင့်(၄) မှ (၉)အထိ မိုင် ၁၀၀ အထက်ကို အထက်တန်းတစ်ဆခွဲ  အဆင့်(၁၀) အနေဖြင့် အထက်တန်း တစ်ဆနှင့် ရိုးရိုးတစ်ဆ၊ အဆင့်(၁၁)၊ (၁၂) သည် အထက်တန်း တစ်ဆ သို့မဟုတ် ရိုးရိုးတန်း သုံးဆ၊ အခြားအဆင့်သည် ရိုးရိုးတန်း တစ်ဆနှင့် နေ့တွက်စရိတ် ခွင့်ပြုထားသည်ကို တွေ့ရပါကြောင်း၊ မော်တော်ကားဖြင့် ခရီးသွားသည့်အခါ ဦးစီးအရာရှိနှင့် အထက်အဆင့်ကို မော်တော်ကားခ၏ လေးဆ၊ ပြန်တမ်းဝင်မဟုတ်သည့်ရာထူးနှင့် စာရေးဝန်ထမ်းအဆင့်ထိကို သုံးဆနှင့် အခြားအဆင့်ကို တစ်ဆနှင့် နေ့တွက် ခွင့်ပြုထားသည်ကို တွေ့ရပါကြောင်း၊

နယ်ပြောင်းခရီးစရိတ်အနေဖြင့် ရထား၊ သင်္ဘောဖြင့် သွားသည့်အခါ ရာထူးအဆင်‌့ ၁ မှ ၉ အထိ အထက်တန်းသုံးဆ၊ ရာထူး ၁၀ မှ ၁၂ အထိ အထက်တန်းနှစ်ဆ၊ ကျန်အဆင့်ကို ရိုးရိုးတန်း သုံးဆ ခွင့်ပြုထားသဖြင့် မော်တော်ကားဖြင့် ခရီးသွားသည့်အခါ ဦးစီးအရာရှိနှင့် အထက်အဆင့်ကို ခြောက်ဆ၊ ပြန်တမ်းဝင်မဟုတ်သူနှင့် စာရေးဝန်ထမ်းအဆင့်ကို လေးဆ၊ အခြားအဆင့်ကိုသုံးဆ ခွင့်ပြုထားသည်ကို တွေ့ရပါကြောင်း၊တင်ပြထားသည့် နှုန်းထားများသည် ယခင်က နှုန်းထားများသည် သင့်လျော်သော်လည်း လက်ရှိယာဉ်ခနှုန်းများသည် အလွန်ဈေးကြီးနေသည့် အချိန်တွင် FR-44 အရ ပြဋ္ဌာန်းထားသည့် အမြတ်အစွန်း မဖြစ်စေရဆိုသူည့် ပြဋ္ဌာန်းချက်နှင့် ဆန့်ကျင်ဘက်ဖြစ်နေသည်ကို တွေ့ရပါကြောင်း၊ FR-32  နဲ့ FR-95 ပါ ပြဋ္ဌာန်းချက်တွေအရ ကုန်ကျစရိတ်များ ကာမိရန် ထိုက်သင့်သည့် အဆနှုန်းကိုလည်း ပေးသင့်သည်ကို သိရသည့်အတွက် ပြင်ဆင်ဆောင်ရွက်သင့်ပါကြောင်း၊

အများပြည်သူသုံးယာဉ်များ သွားလာမှုမရှိသည့် နေရာဒေသများကို ပြောင်းရွှေ့ရသည့်အခါ သယ်ဆောင်ရသည့် ပစ္စည်းခများအတွက် တင်ခ၊ ချခများမှာ ပိဿာ ၂၀ ကို ၂၅ ပြားနှုန်းဖြင့် သတ်မှတ်ပေးပြီး သယ်ဆောင်ခများကို နှစ်မိုင်နှင့်အထက် လှေ၊ မော်တော်ဖြင့် သွားသည့်အခါ ၃ ပြား၊ လှည်း၊ အခြားယာဉ်ဖြင့် သွားသည့်အခါ ၆ ပြား၊ မြင်း၊ လား၊ ကျွဲ၊ နွားနှင့် သွားသည့်အခါ ၉ ပြား၊ အထမ်းသမားအတွက် ၁၃ ပြား ခွင့်ပြုထားပြီး နှစ်မိုင်အတွင်း လှေ၊ မော်တော်ဖြင့် ၆ ပြား၊ လှည်း၊ အခြားယာဉ်ဖြင့် ၁၃ ပြား၊ မြင်း၊ လား၊ ကျွဲနွားတို့အတွက် ၁၉ ပြားနှင့် အထမ်းသမား အတွက် ၂၅ ပြား၊ နှုန်းများ ခွင့်ပြုထားသည့်အတွက် ခေတ်ကာလနှင့် မဆီလျော်သည်ကို တွေ့ရပါကြောင်း၊ ထို့ကြောင့် မြန်မာနိုင်ငံလက်စွဲဥပဒေပါ ခေတ်ကာလနှင့် ဆီလျော်အပ်စပ်မှု မရှိသော ဥပဒေပြဋ္ဌာန်းချက်များကို ပြန်လည်ပြင်ဆင်သတ်မှတ်ပေးရန် အစီအစဉ်ရှိ/မရှိနှင့် မည်သည့်အချိန်ကာလ တွင် ပြင်ဆင်ဆောင်ရွက်ပေးမညကို သိရှိလိုကြောင်း မေးမြန်းပါသည်။