နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီအစိုးရလက်ထက် နိုင်ငံတော်ဝန်ကြီးချုပ်၏ ၁၉-၃-၂၀၀၄ ရက်နေ့နှင့် ၂၀-၃-၂၀၀၄ ရက်နေ့ အရှေ့မြောက်ပိုင်းတိုင်းစစ်ဌာနချုပ်နယ်မြေခရီးစဉ်အတွင်း နိုင်ငံတော်ဝန်ကြီးချုပ်မှ မူဆယ်မြို့ ကောင်းမှုတုံရပ်ကွက်၊ ဟိုနားရပ်၊ မြို့ပတ်လမ်းအနီး ခုတင် ၁၀၀ ဆံ့ဆေးရုံအသစ်ဆောက်လုပ်ရန် မြေဧရိယာ ၁၃.၇၄၆ ဧကကို သတ်မှတ်လမ်းညွှန်ခဲ့ပါကြောင်း၊ ၎င်းအချိန်တွင်မူဆယ်ပြည်သူ့ဆေးရုံသည် ၂၅ ခုတင်ဆံ့ဆေးရုံဖြစ်ပါကြောင်း၊ မူဆယ်မြို့ခုတင် ၁၀၀ ဆံ့ ဆေးရုံဆောက်လုပ်ရန် မူဆယ်ခရိုင်အေးချမ်းသာယာရေးနှင့် ဖွံ့ဖြိုးရေးကောင်စီမှ ၁၅-၇-၂၀၀၅ ရက်နေ့ နှင့် ၅-၄-၂၀၀၇ ရက်နေ့များတွင် ရှမ်းပြည်နယ်မြောက်ပိုင်း အေးချမ်းသာယာရေးနှင့်ဖွံ့ဖြိုးရေး ကောင်စီ သို့ရန်ပုံငွေတင်ပြတောင်းခံခဲ့သော်လည်း ရန်ပုံငွေချထားပေးခြင်းမရှိသဖြင့် ယခုတိုင်ခွင့်ပြု လျာထားသည့်မြေနေရာတွင် ဆေးရုံအသစ်ဆောက်လုပ်နိုင်ခြင်းမရှိသေးပါကြောင်း၊ အဆိုပါ ခုတင် ၁၀၀ ဆေးရုံ မြေနေရာ ၁၃.၇၄၆ ဧကအနက် မြို့နယ်စစ်မှုထမ်းဟောင်းအိမ်ရာအတွက် မြေဧရိယာ ၄.၆၈၂ ဧကနှင့် ပုဂ္ဂလိက သို့ မြေပေးအမိန့်ဖြင့် ၁.၁၃ ဧကတို့ကို နိုင်ငံတော်အေးချမ်းသာယာရေးနှင့် ဖွံ့ဖြိုးရေး ကောင်စီအစိုးရလက်ထက် ၂၇-၁-၂၀၁၁  ရက်နေ့တွင်လည်းကောင်း၊ ယခင်အစိုးရ သက်တမ်းတွင် သိန်းသန်းချီကုမ္ပဏီတို့ကို မြေဧရိယာ ၂.၉၃၁ ဧကကို ၂၀၁၃ ခုနှစ်တွင်လည်းကောင်း၊ မူဆယ်ခရိုင်အထွေထွေအုပ်ချုပ်ရေးဦးစီးဌာန ခရိုင်ကောလိပ်တော်အရာရှိမှ ၎င်းမြေကိုခွဲစိတ်ချထား ပေးခဲ့သည်ဟုသိရှိရပါကြောင်း၊ ယခုလို မြို့နယ်ကျန်းမာရေးလုပ်ငန်းနှင့် သက်ဆိုင်ခြင်းမရှိသည့် လူပုဂ္ဂိုလ်၊ ကုမ္ပဏီအဖွဲ့အစည်းများ ကို ပြန်လည်ခွဲစိတ်ချထားပေးခဲ့ခြင်းသည် ပြည်သူ့ကျန်းမာ‌ရေး စောင့်ရှောက်မှု လုပ်ငန်းတိုးမြှင့်ဆောင်ရွက်နိုင်ရန် လိုအပ်ချက်ဖြစ်သည့် မြေနေရာရရှိရေးကို မျက်ကွယ်ပြုခြင်းဖြစ်ပါကြောင်း၊ ယင်းသို့ခွဲစိတ်ချပေးခဲ့ခြင်းကြောင့် မူဆယ်မြို့နယ် ခုတင် ၁၀၀ ဆေးရုံ အသစ်အတွက် မြေဧရိယာ ငါးဧကခန့်သာ ကျန်ရှိမည်ဖြစ်ပါကြောင်း၊

ယခုအခါ မူဆယ်မြို့နယ်တွင် လူဦးရေ အဆမတန်များပြားလာခြင်းတို့ကြောင့် မြို့နယ် အတွင်းရှိ ပြည်သူအများအတွက် ကျန်းမာရေးဝန်ဆောင်မှုလိုအပ်ချက်အရ လက်ရှိခုတင် ၁၀၀ ဆံ့ ဆေးရုံ နှင့် လုံလောက်မှုမရှိပါကြောင်း၊ ယခုလက်ရှိတွင် နေ့စဉ်လူနာ ၁၄၀ ကျော် အတွင်းလူနာအဖြစ် တက်ရောက်ကုသလျက်ရှိပါကြောင်း၊ ထို့ကြောင့် မူဆယ်ခရိုင်၊ ကျန်းမာရေးဦးစီးဌာနမှ သက်ဆိုင်ရာ ပြည်ထောင်စုဝန်ကြီးဌာနသို့ ခုတင် ၁၀၀ ဆံ့ဆေးရုံအဖြစ်သို့တိုးမြှင့်ပေးရန် တင်ပြတောင်းခံထား သဖြင့် လက်ရှိကျန်ရှိသည့်မြေနေရာအကျယ်အဝန်းဖြင့် ဆေးရုံအသစ် ဆောက်လုပ်ရန် အခက်အခဲရှိ မည် ဖြစ်ပါကြောင်း၊

ကျန်ရှိသည့်ဆေးရုံမြေနေရာငါးဧကခန့်၏ အနောက်မြောက်အရပ်ရှိ မြေ ၃.၈၅၉ ဧက ခန့်ကို ဆေးရုံမြေနေရာအဖြစ် ထပ်မံလျှောက်ထားရန် ကျန်းမာရေးဦးစီးဌာနမှ တာဝန်ရှိသူများမှ စီစဉ်နေသော်လည်း ၎င်းမြေဧရိယာသည် မူလလျာထားသတ်မှတ်ထားသည့် ဆေးရုံမြေနေရာနှင့် တစ်ဆက်တစ်စပ်တည်းမရှိခြင်း၊ မြေမျက်နှာပြင်အနိမ့်အမြင့်ညီညာမှုမရှိဘဲ လျှိုမြောင်များပါဝင်နေ သဖြင့် အဆင်မပြေနိုင်ပါကြောင်း၊ သို့ဖြစ်ပါ၍ မူဆယ်မြို့နယ် ခုတင်(၁၀၀)ဆေးရုံမြေနေရာအတွက် ၂၀၀၄ ခုနှစ်က သတ်မှတ်လျာထားပေးခဲ့သည့် မြေဧရိယာ ၁၃.၇၄၆ ဧကအနက် မြေဧရိယာဧက သုံးပုံတစ်ပုံခန့်ကို ပုဂ္ဂလိကနှင့် အခြားအဖွဲ့အစည်းများကို ခွဲစိတ်ချထားပေးခဲ့ခြင်းအား ပျယ်ဖျက် ပေးရန်နှင့် မူလလျာထားသတ်မှတ်ပေးခဲ့သည့် မြေဧရိယာအကျယ်အဝန်း အတိုင်းပြန်လည်ထား ပေးနိုင်ခြင်း ရှိ/မရှိ ကိုသိရှိလိုပါကြောင်းနှင့် အစီအစဉ်ရှိပါက မည်သည့်အချိန်ကာလတွင် ဆောင်ရွက် ပေးမည်ကို လည်းကောင်း၊ အစီအစဉ်မရှိပါက  အဘယ်ကြောင့်မဆောင်ရွက်ပေးနိုင် သည်ကို သိရှိလို ပါကြောင်း မေးမြန်းပါသည်။