မြန်မာနိုင်ငံသည် ဘင်္ဂလားဒေ့ရှ်နိုင်ငံနှင့် ပင်လယ်ပိုင်း မိုင် ၄၀၊ ကုန်းပိုင်း ၁၂၃ မိုင် စုစုပေါင်း ၁၆၃ မိုင်ထိ ဆက်စပ်လျက်ရှိပါကြောင်း၊ မြန်မာနိုင်ငံ ဘူးသီးတောင်၊ မောင်တောမြို့နယ်ရှိ ဘင်္ဂါလီ လူမျိုးများသည် မြန်မာနိုင်ငံ၏ MPT ဖုန်းနှင့် Sim Card များကို သုံးစွဲခြင်းနည်းပါးပြီး ဘင်္ဂလားဒေ့ရှ် နိုင်ငံထုတ် Sim Card များကိုသာ တွင်ကျယ်စွာအသုံးပြုလျက်ရှိပါကြောင်း၊

ယခင်အစိုးရလက်ထက် နစကတာဝန်ယူသည့် အချိန်မှစပြီး အသုံးပြုလာခဲ့ရာ ယနေ့ ထက်တိုင် ဆက်လက်သုံးစွဲနေကြဆဲဖြစ်ပါကြောင်း၊ ထိုသို့သုံးစွဲနေခြင်းကြောင့် MPT ၏ ဝင်ငွေ ကို များစွာထိခိုက်နစ်နာစေသကဲ့သို့ မြန်မာနိုင်ငံ၏ လုံခြုံရေးနှင့်တရားဥပဒေစိုးမိုးရေးကို ဖောက်ဖျက် ကျူးလွန်လျက်ရှိသည်ဟုလည်း ထင်မြင်ယူဆမိပါကြောင်း၊  

ပြီးခဲ့သည့်အောက်တိုဘာလ ၉ ရက်နေ့က အစိုးရနယ်ခြားစောင့်တပ်စခန်းများကို ဝင်ရောက် သိမ်းပိုက်စဉ်က ထိုဖုန်း Sim Card များသည်  တပ်မတော်သားများနှင့်ရဲတပ်ဖွဲ့ဝင်များကို သေကျေ ဒဏ်ရာအနာတရဖြစ်စေခဲ့သည်မှာ ထင်ရှားသည့် သာဓကတစ်ခုဖြစ်ပါကြောင်းနှင့် မကြာခဏ ဖမ်းဆီးရမိသော မူးယစ်ဆေးဝါးမှောင်ခိုရောင်းဝယ်ရာတွင်လည်း ဖော်ပြပါဖုန်းများဖြင့် ဆက်သွယ် လုပ်ကိုင်ကြသည်ဟုလည်း ဒေသခံများမှ ဝေဖန်ပြောဆိုမှုများရှိနေသည့်အပြင် တစ်ဖက်နိုင်ငံထုတ်ဖုန်း Sim Card များကို အသုံးပြုစေခြင်းအားဖြင့် မမှန်ကန်သည့်နည်းလမ်းများဖြင့် ဆက်သွယ်ရန် အခွင့်အလမ်းကို ပိုမိုရရှိစေနိုင်သည့်အတွက် တစ်ဖက်နိုင်ငံမှ တရားမဝင်ဖုန်းကတ်များကို သုံးစွဲခြင်းအား တားဆီး ပိတ်ပင်ရန် အထူးလိုအပ်နေပြီဖြစ်ပါကြောင်း၊

ထို့ကြောင့် မြန်မာနိုင်ငံ၏ အနောက်ဘက်နယ်စပ်နှင့် ထိစပ်လျက်ရှိသော တစ်ဖက် နိုင်ငံမှ ထုတ်လုပ်သည့် တယ်လီဖုန်း Sim Card များကို မြန်မာနိုင်ငံ မောင်တော၊ ဘူးသီးတောင်မြို့များ၌ တွင်ကျယ်စွာ သုံးစွဲနေခြင်းကို တားဆီး အရေးယူပေး ရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။