၂၀၁၇-၁၈ ဘဏ္ဍာရေးနှစ် အမျိုးသားစီမံကိန်း၊ ကျန်းမာရေးနှင့် အားကစားဝန်ကြီးဌာန၏ မူဝါဒမှာ သက္ကရာဇ် ၂၀၃၀ ခုနှစ်တွင် မြန်မာနိုင်ငံနှင့် လူတိုင်းလက်လှမ်းမီ လွှမ်းခြုံနိုင်သည့် ကျန်းမာရေးစောင့်ရှောက်မှုရရှိရေးနှင့် တစ်မျိုးသားလုံး ကျန်းမာကြံ့ခိုင်ရေးတို့ ဖော်ပြထားပြီး ရည်မှန်းချက်အနေဖြင့် ကျန်းမာရေးစောင့်ရှောက်မှုအား ဆင်းရဲချမ်းသာမရွေး၊ ကျေးလက်‌ဒေသ အောက်ခြေအထိ ပြည်သူလူထု အားလုံးလွှမ်းခြုံနိုင်ရန်ဆိုသည့် အချက်များကို မိမိအနေဖြင့် ကြိုဆိုထောက်ခံပါကြောင်း၊

မိမိတို့ မြန်မာနိုင်ငံတွင် လူဦးရေ ၅၁.၂ သန်းရှိသည့်အနက် ကျေးလက်ဒေသများမှာ ၃၅.၃ သန်း နေထိုင်လျက်ရှိရာ ၇၀.၄ ရာခိုင်နှုန်းသည် ကျေးလက်ဒေသနေ ပြည်သူများ ဖြစ်ကြပါကြောင်း၊ ကျေးလက်ဒေသအများစုသည် လမ်းပန်းဆက်သွယ်ရေးခက်ခဲမှု၊ ကျန်းမာရေးဝန်ထမ်းနည်းပါးမှုနှင့် ပြည်သူများ ကျန်းမာရေးဗဟုသုတ နည်းပါးမှုတို့ကြောင့် ကျန်းမာရေးစောင့်ရှောက်မှုလုပ်ငန်းများ မျှော်မှန်းသလောက် ခရီးမပေါက်ခဲ့သည်ကိုလည်း တွေ့ရှိနေရပါကြောင်း၊

ရသေ့တောင်မြို့နယ်တွင် ကျေးရွာအုပ်စု ၉၂ အုပ်စု၊ ကျေးရွာပေါင်း ၁၅၆ ရွာ၊ လူဦးရေစုစုပေါင်း ၁၅၀၀၀၀ ကျော် ရှိပါကြောင်း၊ ကျေးရွာအုပ်စု တစ်အုပ်စုကို ကျေးရွာ ၃ ရွာ၊ ၄ ရွာဖြင့် ဖွဲ့စည်းထားပါကြောင်း၊ ၎င်းကျေးရွာအုပ်စု တစ်အုပ်စုတွင် သားဖွားဆရာမတစ်ဦးသာရှိပြီး တချို့ကျေးရွာအုပ်စုများတွင် လုံးဝမရှိပါကြောင်း၊ ၎င်းကျေးရွာအုပ်စုများသည် တစ်ရွာနှင့်တစ်ရွာ ခန့်မှန်းခြေ ၂ မိုင်၊ ၃ မိုင်ခန့် ကွာဝေးလှပါကြောင်း၊ ထို့အပြင် ရေလမ်းခရီးကိုသာ အဓိကထားပြီး သွားလာနေရသည့်အတွက် သွားလာရေးခက်ခဲမှုများကို ရင်ဆိုင်ကြုံတွေ့နေကြရသည့်ကျေးရွာများ များစွာရှိနေသေးပါကြောင်း၊ အထူးသဖြင့် ကျေးလက်နေကိုယ်ဝန်ဆောင်မိခင်များသည် ကျန်းမာရေးဗဟုသုတနည်းပါးမှုတို့ကြောင့် သွေးသွန်ခြင်းများ၊ ကိုယ်ဝန်အဆိပ်တက်ခြင်းများ၊ ကလေးမွေးဖွားရာတွင်လည်း ကျေးရွာနေလက်သည်များကိုသာ အားကိုးနေရခြင်းတို့ကြောင့် မသေဆုံးသင့်ဘဲ သေဆုံးသွားကြရသည်ကိုလည်း ကြားသိနေရပါကြောင်း၊ ထို့ကြောင့် ကျေးလက်နေပြည်သူများက မိမိတို့၏ ကျေးရွာများတွင် သားဖွားဆရာမ တစ်ဦးစီ ခန့်ထားပေးနိုင်ရေးအတွက် ကျန်းမာရေးဌာနအား တင်ပြပေးပါရန် တောင်းဆိုမှုများ ရှိနေကြပါကြောင်း၊ ထိုကဲ့သို့ သားဖွားဆရာမတစ်ဦးစီကို ခန့်ပေးလိုက်ခြင်းအားဖြင့် ကျေးလက်နေပြည်သူများကို ကျန်းမာရေးဗဟုသုတများ တိုးပွားစေပြီး မြို့ပြနှင့် ကျေးလက်ကျန်းမာရေးစောင့်ရှောက်မှု ကွာဟချက်များကိုလည်း ကျဉ်းမြောင်းသွားစေမည်ဖြစ်ပါကြောင်း၊

မိမိတို့၏ ပြည်နယ်များတွင် နေထိုင်သော ဒေသခံများကို သားဖွားသင်တန်းတက်ရောက်ရန်အတွက် သတ်မှတ်အရည်အချင်းနှင့် ပြည့်စုံသူများကို ဦးစားပေးရွေးချယ် သင်တန်းပေးလိုက်ခြင်းအားဖြင့် မိမိဒေသ၏ အကျိုးကို ပိုမိုဆောင်ရွက်နိုင်မည်ဖြစ်ပါကြောင်း၊ သို့ဖြစ်ပါ၍ မြန်မာနိုင်ငံအတွင်း မြို့ပြနှင့် ကျေးလက်ကျန်းမာရေးစောင့်ရှောက်မှု၊ အထူးသဖြင့် ကိုယ်ဝန်ဆောင်မိခင်များနှင့် မွေးကင်းစကလေးငယ်များအား ကျန်းမာရေးစောင့်ရှောက်မှုပေးနိုင်ရန် ကျေးလက်ကျန်းမာရေးဌာန၊ ဌာနခွဲများမရှိသည့် သင့်လျော်သည့်ကျေးရွာတိုင်းတွင် သားဖွားဆရာမတစ်ဦးကို ခန့်အပ်တာဝန်ပေးရန် အစီအစဉ်ရှိ/မရှိနှင့် ဒေသခံမိန်းကလေးများအား ရွေးချယ်သင်တန်းပေး၍ မိမိဒေသ၌ ပြန်လည်ခန့်အပ်တာဝန်ပေးရန် အစီအစဉ်ရှိ/မရှိ သိရှိလိုကြောင်း မေးမြန်းပါသည်။