နိုင်ငံတော်မှ နှစ်စဉ် တောင်သူလယ်သမားများကို စိုက်ပျိုးစရိတ်ချေးငွေများ ဝိုင်းကြီးချုပ်စနစ်ဖြင့် အဖွဲ့လိုက် ထုတ်ချေးပေးနေပါကြောင်း၊ မိမိတို့အဖွဲ့မှ ယခင်က ၁၀ ဦး၊ ယခု ၃ ဦးထဲမှ တစ်ဦးဦးက မပေးဆပ်ခဲ့လျှင် တာဝန်ကျေပေးဆပ်ထားသည့် တောင်သူများလည်း နောက်နှစ်ချေးငွေများ ထုတ်ယူခွင့် ဆုံးရှုံးရပါကြောင်း၊ မြို့နယ်စိုက်ဘဏ်ကလည်း တာဝန်မကျေသောသူများကို အရေးယူခြင်းမရှိသည့်တွက် အလွဲသုံးစား လုပ်နေသူများ အတင့်ရဲနေကြပါကြောင်း၊ တချို့တောင်သူများ၊ ရပ်/ကျေးစိုက်ဘဏ်တာဝန်ရှိသူများနှင့် ရပ်/ကျေးအုပ်ချုပ်ရေးမှူးများက ဧကစာရင်းများ လိမ်လည်ပြီး ငွေအမြောက်အမြား ထုတ်ယူသုံးစွဲ၍ ပြန်မဆပ်သောကြောင့် တောင်သူများ ချေးငွေမရရှိတော့ပါကြောင်း။ ဥပမာ တချို့ဝါရင့်အုပ်ချုပ်ရေးမှူးများက မိမိတို့ကျေးရွာအုပ်စုရှိ ငွေချေးတောင်သူများထံမှ ဘဏ်ချေးငွေဆပ်ရန် ငွေများတောင်းယူပြီး မြို့နယ်သ့ို သွားရောက်မဆပ်ဘဲ မိမိကိုယ်ကျိုးအတွက် အသုံးပြုသောကြောင့် တောင်သူများမှာ ငွေလည်းဆုံး၊ စိုက်ဘဏ်တွင် အကြွေးစာရင်းပေါ်၍ နောက်နှစ်ချေးငွေမရရှိကာ ဒုက္ခရောက်နေကြပါကြောင်း။

မှန်ကန်ပြီးတာဝန်ကျေသော တောင်သူလယ်သမားများ၏ အခွင့်အရေးများ ဆုံးရှုံးနစ်နာနေကြရသည့်အတွက် တောင်သူများ၏ အဓိကလိုအပ်ချက်သည့် ရင်းနှီးငွေဖြစ်ပါကြောင်း။ စိုက်ပျိုးစရိတ်ချေးငွေကို အကြောင်းအမျိုးမျိုးဖြင့် အလွဲသုံးစားလုပ်နေသူများအား ဥပဒေကြောင်းအရ ကြပ်မတ်အရေးယူပေးပါရန်နှင့် ချေးငွေတာဝန်ကျေသော တောင်သူလယ်သမားများကို ဆက်လက်ငွေထုတ်ချေးပေးရန် အစီအစဉ်ရှိ/မရှိ မေးမြန်းပါသည်။