ကနီမြို့နယ်တွင်လူဦးရေတိုးပွားလာမှုနှင့်အတူလုပ်ကိုင်စားသောက်ရန် မြေယာလိုအပ်ချက်ဖြင့် ပေါက်အင်းတောင်ကြိုးဝိုင်းနှင့် ကြိုးပြင်တောများကို ခုတ်ထွင်ရှင်းလင်းပြီး တစ်နိုင် တစ်ပိုင် လုပ်ကိုင် စားသောက်ခဲ့ကြရသည့် တောင်သူများရှိပါကြောင်း၊  ပေါက်အင်းတောင်ကြိုးဝိုင်းပေါ်မှာ ၁၉၉၈-၁၉၉၉ ခုနှစ်ခန့်ကပင် ၎င်းဒေသတစ်ဝိုက် တောနေပြီး လုပ်ကိုင်စားသောက်သူဦးရေ ခန့်မှန်းခြေ ၃၅၀၀ ကျော် ရှိသည်ဟု သိရှိရပါကြောင်း၊

ကနီမြို့နယ်တွင် ကြိုးဝိုင်း၊ကြိုးပြင် ကာကွယ်တော များတွင် တရားမဝင် ကျူးကျော်နေထိုင် သူများကို စာရင်းဇယားကောက် ယူပြီး ကျေးရွာ သစ်များဖွဲ့စည်းနေရာချ ထားပေးရေးကော်မတီကို ၂၀၁၃ ခုနှစ် မတ်လတွင် ဖွဲ့စည်းခဲ့သော်လည်း ယခုအချိန်အထိ တရားမဝင်ကျူးကျော်နေထိုင်သူများအတွက် ကျေးရွာတည်ထောင်နိုင်ခြင်း မရှိ ပါကြောင်း၊မုံရွာ-ရွာကြီး-ကလေးဝ ကားလမ်းပေါ် မိုင်တိုင် ၃၂ မိုင်တွင် အလယ်တန်းကျောင်း တစ်ကျောင်း၊မိုင်တိုင် ၂၈ မိုင်တွင် မူလတန်းကျောင်း တစ်ကျောင်း၊ပေါက် အင်းမြိုင် ၂၇ မိုင် တွင် မူလတန်းကျောင်းတစ်ကျောင်း၊ ပြောင်းပြန်တွင် မူလတန်းကျောင်း တစ်ကျောင်းတို့ကို ဖွင့်လှစ်ထားသော်လည်း ယခုအချိန်ထိ  တရားဝင်ပြည်ထဲရေး အမည်ပေါက် ကျေးရွာတစ်ရွာမှ မရှိပါကြောင်း၊

၂၀၀၆-၂၀၀၇ ခုနှစ်တွင် ကနီမြို့နယ်၊ ကြက်ဆူအထူးဇုန်(၁) ဟူ၍ ကြိုးဝိုင်း/ကြိုးပြင်‌တောများနှင့် မုံရွာ-ယာကြီး-ကလေးဝကားလမ်းဘေးဝဲ/ယာတစ်လျှောက် ဧကပေါင်း ၂၈၀၀၀ ဖော်ထုတ် စိုက်ပျိုးရန် ဟူ၍ ဌာနဆိုင်ရာအမည်၊ ကုမ္ပဏီအမည်၊ တပ်ရင်းတပ်ဖွဲ့၊ လုပ်ငန်းရှင်အဖွဲ့အစည်း အမည်စသည်ဖြင့် အမည်အမျိုးမျိုးနှင့်သိမ်းယူခဲ့ကြသည်ကိုသိရှိရပါကြောင်း၊ ထိုသို့ သိမ်းယူ မှုကြောင့် တောင်သူများ ၏ မြေယာများသည်  ကြက်ဆူစီမံကိန်းအတွင်း ပါဝင်ခဲ့ပါကြောင်း၊ ယခုအခါ ပေါက်အင်း တောင်ကြိုးဝိုင်းကွင်း အမှတ်(၇၆၈)တွင် ဧကပေါင်း ၃၂၀၀ ကို နှစ် ၃၀ ဂရန်နှင့် ကြက်ဆူစိုက်ခွင့် ရရှိထားသည့် ကုမ္ပဏီတစ်ခုသည် မူလလက်ရှိလုပ်ကိုင်နေသော တောင်သူများကို အမျိုးမျိုး ဒုက္ခပေးလျက်ရှိဟုသိရှိရပါကြောင်း၊  ၂၀၁၁-၂၀၁၂ ခုနှစ်တွင် ၎င်းကုမ္ပဏီမှ တောင်သူ ရှစ်ဦးကို တရားစွဲဆိုထောင်ချခဲ့သည့်အပြင် ၂၀၁၄ ခုနှစ်မှ ၇ နှစ်တိုင် တရားစွဲခံထားရပြီး အမှုရင်ဆိုင်နေရ သော မိသားစုပေါင်း ကိုးစုနှင့် လူဦးရေ ၅၄ ယောက်ရှိပါကြောင်း၊ မူလတောင်သူများကို  ကျူးကျော်ဟု သတ်မှတ်ပြီး  တရားစွဲဆိုထောင်ချခံရခြင်း၊ နောက်မှရောက်ရှိလာသည့် ကုမ္ပဏီ ဌာနဆိုင်ရာများမှ တရားဝင် နှစ် ၃၀ ဂရန်ချထားပေးခြင်း၊ ဂရန်ရယူထားသော ကုမ္ပဏီ၊ ဌာနဆိုင်ရာများသည် ဂရန်ပါ စည်းကမ်းချက်များကို မလိုက်နာဘဲ မြေရယူအမြတ်ထုတ်လိုမှုသာ ဖြစ်နေသည့်အတွက် မူလ ဒေသခံတောင်သူများနှင့် နိုင်ငံတော်အတွက် များစွာနစ်နာခြင်း၊  ကြက်ဆူစိုက်ပျိုးခွင့်ရရှိသော မြေပေါ်တွင် သဘာဝတောများကို သစ်တောဦးစီးဌာန၏ ခွင့်ပြုချက်ရရှိပြီးမှသာ အပြောင်ရှင်း ခုတ်လှဲခြင်း လုပ်ငန်းဆောင်ရွက်ရန် စည်းကမ်းချက်နှင့်အညီ ပြုလုပ်ခဲ့ခြင်းရှိ/မရှိနှင့်စပ်လျဉ်း၍ အောက်ပါမေးခွန်း များကို မေးမြန်းလိုပါကြောင်း၊ ကနီမြို့နယ်ကြိုးဝိုင်း/ကြိုးပြင်တောများရှိ မူလ ရောက်ရှိ လုပ်ကိုင် နေကြသော တောင်သူများ၏ မြေယာများကို ဌာနဆိုင်ရာကုမ္ပဏီများက သိမ်းယူ စိုက်ပျိုးပြီး နှစ် ၂၀၊  နှစ် ၃၀ ဂရန်လျှောက်ထားရရှိမှုသည် နည်းလမ်းကျ/မကျ၊ ဂရန်ပါ စည်းကမ်းချက်များအား လိုက်နာမှုရှိ/မရှိနှင့် ပြည်ထဲရေးအမည်ပေါက်ကျေးရွာများ၊ စုစည်းတည်ထောင်ပေးရန် အစီအစဉ်များရှိ/မရှိ သိရှိ လိုပါကြောင်းမေးမြန်းပါသည်။