ပေါင်းလောင်းပြည်သူ့ အားကစားကွင်းအား ၁၉၇၃ ခုနှစ်တွင် ရဟန်းရှင်ပြည်သူများ၊ တပ်မတော်သားများ စုပေါင်းအားဖြင့် တည်ဆောက်ဖွင့်လှစ်ခဲ့ပါကြောင်း၊ ထိုသို့တည်ဆောက်ရာတွင် အားကစားဝန်ကြီးဌာနမှ ပံ့ပိုးမှုမယူဘဲ မြို့နယ်သူမြို့နယ်သားများ၏ ‌ငွေအင်အား၊ လူအင်အားဖြင့် တည်ဆောက် ခဲ့ခြင်း ဖြစ်ပါကြောင်း၊ ၁၉၇၃ ခုနှစ်မှ ၂၀၁၀ ခုနှစ်အထိ မြို့မိမြို့ဖများ၏ စီမံခန့်ခွဲမှု အောက်တွင် အားကစားပြိုင်ပွဲပေါင်းများစွာ ကျင်းပနိုင်ခဲ့ပြီး နိုင်ငံ့ခေါင်းဆောင် အားကစားသမားပေါင်း မြောက်မြားစွာ မွေးထုတ်နိုင်ခဲ့ပါကြောင်း၊

၂၀၁၀ ခုနှစ်တွင် မြန်မာနေရှင်နယ်လိဂ် ပြိုင်ပွဲအတွက်  နေပြည်တော် FC အသင်းမှ ဘောလုံးကွင်းရှာဖွေသည့်အခါ ပေါင်းလောင်း ပြည်သူ့အားကစားကွင်းကို သဘောကျခဲ့သော်လည်း  အားကစားဝန်ကြီးဌာနပိုင် ကွင်းမဟုတ်သည့်အတွက် အခက်အခဲတွေ့ခဲ့ရပါကြောင်း၊ နေပြည်တော် FC အသင်းဖြစ်လာရန်အတွက် အားကစားဝန်ကြီးဌာနမှ နေပြည်တော်မြို့တော်ဝန်ထံ မြေသိမ်းအမိန့်ထုတ်ပေးပါရန် ၁၄-၂-၂၀၁၁ ရက်စွဲဖြင့် ညှိနှိုင်းစာပေးပို့ခဲ့ပြီး  ပေါင်းလောင်း ပြည်သူ့ အားကစားကွင်းကို သိမ်းယူခဲ့ပါကြောင်း၊ ထို့နောက် အား/ကာအမည်ပေါက်ဖြစ်အောင် ဆောင်ရွက်ခဲ့ပြီး နေပြည်တော် FC အသင်းသို့ ငှားရမ်းခဲ့သည့်အတွက် ထိုအချိန်မှစပြီး ပျဉ်းမနားမြို့နယ်အတွင်းရှိ မျိုးဆက်သစ်လူငယ် များအတွက် အားကစားဆောင်ရွက်ရန် မြေနေရာပျောက်ပျက်ခဲ့ပါကြောင်း၊

ဘောလုံးကွင်းငှားရမ်းရာတွင် စာချုပ်စာတမ်းများနှင့် ငှားရမ်းခဲ့ခြင်းဖြစ်ပြီး ငှားရမ်းထားသော အားကစားကွင်းအပေါ် အာဏာပိုင်များ၏ ကြီးကြပ်မှု၊ ခွင့်ပြုမှုဖြင့် အားကစားပွဲများ၊ ဘောလုံးပွဲများ ကျင်းပခွင့်ကို မိမိလုပ်ငန်းစဉ်နှင့် တိုက်ဆိုင်မှုမရှိလျှင် အခမဲ့သုံးစွဲခွင့်ပြုရန်နှင့် လေ့ကျင့်ရန်အတွက်လည်း ခွင့်ပြုရမည်ဟု ချုပ်ဆိုထားသော်လည်း ငှားရမ်းခဲ့သည့် အချိန်မှစတင်၍ အကြောင်းအမျိုးမျိုးပြကာ မည်သည့်ပြိုင်ပွဲမှ ပြုလုပ်ခွင့်မရရှိတော့ပါကြောင်း၊ ကွင်းကို အခမဲ့ငှားရမ်းပြီး သုံးနှစ်ပြည့်၍ ဆက်လက်ငှား ရမ်းရန်အတွက် ၂၄-၄-၂၀၁၄ နေပြည်တော်ကောင်စီ အစည်းအဝေးတွင် ကျင်းပသော နေပြည်တော် ကောင်စီဝင်များ၊ မြို့မိမြို့ဖများ၊ ဌာနဆိုင်ရာအကြီးအကဲများနှင့် နေပြည်တော် FC အသင်းတို့မှ တာဝန်ရှိသူများ ဆွေးနွေးပွဲတွင် ဤအားကစားကွင်းကို ပြည်သူလူထုထံသို့ပြန်လည်ပေးအပ်သင့်ကြောင်း ဆုံးဖြတ်ခဲ့သော်လည်း ယခုထိအလေးထားဆောင်ရွက်ခြင်း မရှိသေးပါကြောင်း၊

ပြည်သူ့အစိုးရလက်ထက်တွင် မုံရွာပြည်သူ့အားကစားကွင်း၊ ပဲခူးပြည်သူ့အားကစားကွင်းတို့အား သက်ဆိုင်ရာ တိုင်းဒေသကြီးအစိုးရ အဖွဲ့များမှ ပြည်သူ့ထံသို့ ပြန်လည် လွှဲပြောင်းပေးနိုင် ရန် စီစဉ်လျက် ရှိသည်ကို ကြားသိရပါကြောင်း၊ အမျိုးသားမြေအသုံးချမှု မူဝါဒအပိုင်း(၁)၊ အခန်း(၃) ပုဒ်မ ၈ ပုဒ်မခွဲ (ည) တွင် မြေအသုံးချမှုနှင့် စပ်လျဉ်း၍ ဆုံးဖြတ်ချက်များချရာတွင် အများပြည်သူတို့၏ အကျိုးစီးပွားနှင့် ပုဂ္ဂလိကကုမ္ပဏီတို့၏ အကျိုးစီးပွားကို ယှဉ်ပြိုင်လာပါက အများပြည်သူတို့၏ အကျိုးစီးပွားကို ဦးစားပေးရန်ဟု ပြဋ္ဌာန်းထားပါကြောင်း၊ သို့ဖြစ်ပါ၍ ပျဉ်းမနားမြို့နယ် ပျဉ်းမနားမြို့ရှိ ပြည်သူလူထု လုပ်အားဖြင့် တည်ဆောက်ခဲ့သော ပေါင်းလောင်းပြည်သူ့ အားကစားကွင်းအား ပြည်သူထံသို့ ပြန်လည်အပ်နှံရန် အစီအစဉ်ရှိ/မရှိနှင့် ရှိပါက မည်သည့်အချိန်တွင် အပ်နှံမည်ကို သိရှိလိုပါကြောင်း  မေးမြန်းပါသည်။