မန်တုံမြို့တွင် ရပ်ကွက် ၃ ခုနှင့် ကျေးရွာအုပ်စု ၂၉ ခုရှိသော်လည်း မြို့ပေါ်ရပ်ကွက် ၃ခုမှလွဲ၍ ကျန်လူနေထူထပ်သည့် ကျေးရွာအုပ်စုများတွင် ယခုအချိန်အထိ ဆက်သွယ်ရေးလိုင်း မရသေး ပါကြောင်း၊လမ်းပန်း ဆက်သွယ်ရေးခက်ခဲခြင်း၊နယ်မြေမအေးချမ်းခြင်းကြောင့် ရပ်ရေး၊ရွာရေး ကိစ္စများ ဆောင်ရွက်ခြင်း၊ ဒေသဖွံ့ဖြိုးရေးလုပ်ငန်းများ ပြုလုပ်ခြင်းများတွင် ဖုန်းလိုင်းမရသည့်အတွက် အလွန်ခက်ခဲပြီး ယခုအချိန်ထိ စာပို့သည့် စနစ်ကိုသာ ကျင်‌့သုံး နေရသည့်အတွက် လုပ်ငန်းပြီးမြောက်မှု အလွန်နှေးကွေးပါကြောင်း။

မြို့ပြကြီးများတွင် e-Government ဟု ပြောနေချိန်တွင် မိမိတို့မြို့သည် ယခုချိန်အထိ ဖုန်းလိုင်းကောင်းရန် ကြိုးစားနေရဆဲဖြစ်ပါကြောင်း၊ မန်တုံမြို့နယ်ရှိ ဆက်သွယ်ရေးတာဝါတိုင်ကို ၂၀၀၇ ခုနှစ်တွင်  တည်ထောင်ပြီး နမ္မတူမြို့ တာဝါတိုင် Station မှတစ်ဆင့် ဆက်သွယ်၍ အသုံးပြုလျက်ရှိပါကြောင်း၊ယင်းသို့ ဆက်သွယ်ရေးစနစ်ကောင်းမွန်လာသဖြင့် ပြည်သူများ၏ လူမှုကိစ္စအဝဝ အချိန်နှင့်တစ်ပြေးညီ ဆောင်ရွက်နိုင်စေ၍ မြို့ပေါ် အတွင်း အော်ပရေတာလိုင်းများ ထပ်မံဖွင့်လှစ်ပေးပါရန်လည်း လိုအပ်နေပါကြောင်း၊သို့မှသာ မြို့နှင့်ကျေးရွာ အချိန်နှင့်တစ်ပြေးညီ ဆက်သွယ်ဆောင်ရွက်နိုင်မည်ဖြစ်ပါကြောင်း၊မန်ပတ်ကျေးရွာတွင် စိုက်ထူထားသောတိုင်မှာ ဖုန်းလိုင်းအတွက် အသုံးပြုထားသော တာဝါတိုင် မဟုတ်ဘဲ ရုပ်သံလိုင်းအတွက် စလောင်းတိုင်ဖြစ် ၍ လေအနည်းငယ်တိုက်ခံရရုံဖြင့် လိုင်းများ ပြတ်တောက်သွားခဲ့ပြီး ဖုန်းလိုင်းများ ဆက်သွယ်ရာတွင်လည်း အခက်အခဲဖြစ်ပေါ်မှု မကြာခဏ ကြုံတွေ့နေရပါကြောင်း၊၂၀၀၇ ခုနှစ်တွင် တာဝါတိုင် စိုက်ထူရန် ဖောင်ဒေးရှင်းများ လုပ်ထားသော်လည်း ယခုအချိန်ထိ အကောင်အထည် မဖော်သေးပါကြောင်း၊နမ့်ဟိုင်း၊မိုင်းမော်အုပ်စု၊စိုင်းလိမ်အုပ်စု၊မန်ဆက်အုပ်စု၊လွယ်ကန်ရပ်ကွက်၊ မန်ပေါ့အုပ်စု စသည့် လူနေထူထပ်သည့် ကျေးရွာအုပ်စုတွင် သက်ဆိုင်ရာ ဝန်ကြီးဌာနအနေဖြင့် ဖုန်းလိုင်းတိုးချဲ့ပေးရန် အစီအစဉ်ရှိ/မရှိနှင့် ဖုန်းတာဝါတိုင်ကို မြို့ပေါ်ရပ်ကွက်ကို ပြောင်းရွှေ့ပေးရန် အစီအစဉ် ရှိ/မရှိ သိရှိလိုကြောင်း မေးမြန်းပါသည်။