ပြည်ထောင်စုအစိုးရသည် ချမှတ်ထားသော မူဝါဒများနှင့်အညီ လိုအပ်သော စီမံကိန်းများကို ရေးဆွဲ၍ ပြည်ထောင်စုလွှတ်တော်၏ သဘောတူညီချက်ဖြင့် အကောင်အထည်ဖော်ဆောင်ရွက်ရ မည်ဟု ၂၀၀၈ ခုနှစ်၊ ဖွဲ့စည်းပုံအခြေခံဥပဒေတွင် ပြဋ္ဌာန်းထားပါကြောင်း၊ အဆိုပါပြဋ္ဌာန်းချက်အရ ဥပဒေကြမ်းများကို ပြည်ထောင်စုလွှတ်တော်ကို တင်ပြသည့်အခါ ပြည်ထောင်စုလွှတ်တော် ကိုယ်စားလှယ်များမှ သာမန်သဘော ဆွေးနွေးကြသည်ကိုလည်း တွေ့ရပါကြောင်း၊ စီမံကိန်းနှင့် ဘတ်ဂျက် အစီရင်ခံစာများ ထွက်လာသည့် အခါ ပေါက်တောမြို့နယ်၏ အခြေအနေမှာ ၂၀၁၆-၁၇ ခုနှစ်တွင် ပေါက်တောမြို့နယ်အတွက် ခွဲဝေချထားသည့်ငွေမှာ သိန်းထောင် ဂဏန်းမျှသာ ရှိပါကြောင်း၊ လျှပ်စစ်၊ လမ်းပန်းဆက်သွယ်ရေး၊ သောက်သုံးရေရရှိရေး၊ စိုက်ပျိုးရေးရရှိရေးစသည့် အခြေခံ အဆောက်အဦများ Inset Infrastructure ကို တည်ဆောက်မှုမရှိဘဲ အပေါ်ယံလုပ်နေခြင်းကြောင့် တောနှင့်မြို့၊ ပြည်နယ်နှင့် ပြည်မ ကြာမြင့်လေ ဝေးလေဖြစ်နေပါကြောင်း၊

မိမိတို့ပြည်နယ်တွင် အလုပ်လက်မဲ့လူငယ်၊ လူလတ်များသည် မိမိဒေသကို စွန့်ခွာပြီး တဖက်နိုင်ငံများသို့ သွားရောက်လုပ်ကိုင်ကြရသည့်အတွက် မိမိတို့ပြည်နယ်တွင် လူဦးရေနည်းပါး သွားပါကြောင်း၊ ထို့ကြောင့် ဆင်းရဲနွမ်းပါးသည့် ဒေသများကို တာဝန်ရှိသူများ ကိုယ်တိုင် လာရောက် ကြည့်ရှု စေချင်ပါကြောင်း၊ ထို့ကြောင့် စီမံကိန်းနှင့် ရသုံးခန့်မှန်းခြေ ငွေစာရင်း ရေးဆွဲရာတွင် ဆင်းရဲနွမ်းပါးမှု အခြေအနေကိုလိုက်၍ ဦးစားပေးအလိုက် ရေးဆွဲရန် လိုပါကြောင်း၊ ဒေသလို အပ်ချက်ကို သေသေချာချာလ့လာပြီး ဒေသခံပြည်သူ များ လက်ခံနိုင်သည်အထိ ပွင့်လင်းမြင်သာစွာ ရေးဆွဲရမည်ဖြစ်ပါကြောင်း၊ တိုင်းဒေသကြီးနှင့် ပြည်နယ်အဆင့်မှ စတင်၍ ဗဟိုအဆင့်ထိ စီမံကိန်းဘတ်ဂျက်ရေးဆွဲခြင်းမှာ အခြေအနေလွဲချော်နေပါကြောင်း၊

စီမံကိန်းနှင့် ရသုံးခန့်မှန်းခြေငွေစာရင်း ရေးဆွဲတင်ပြသည့် နေရာတွင် ဒေသဖွံ့ဖြိုးရေး လိုအပ်ချက်ကို အခြေခံ၍ ရေးဆွဲမည်၊ နယ်မြေအကျယ်အဝန်း သို့မဟုတ် လူဦးရေကို အခြေခံ၍ စဉ်းစားမည်၊ ဆင်းရဲချမ်းသာကွာဟမှုကို အခြေခံစဉ်းစားမည်၊ မည်သည့်မူဝါဒအရ လက်တွေ့ကျကျ မည်ကဲ့သို့ ခွဲဝေသုံးစွဲမည်နှင့် စပ်လျဉ်း၍ သိရှိလိုပါကြောင်း မေးမြန်းပါသည်။