မြန်မာနိုင်ငံတွင်နေထိုင်ကြသည့် ပြည်သူလူထုအချို့သည် မိသားစု စားဝတ်နေရေး အတွက်ကြောင့် လည်းကောင်း၊သဘာဝဘေးဒုက္ခအန္တရာယ်ကြောင့် လည်းကောင်း၊ပညာသင်ကြားရန်အတွက် လည်းကောင်း မူလနေထိုင်ရာအရပ်ဒေသများမှ ဆွေမျိုးသားချင်းများရှိရာအရပ်ဒေသ၊အလုပ်အကိုင် အခွင့် အလမ်းပေါများ၍ စီးပွားဖွံ့ဖြိုးတိုးတက်ပြီး သယံဇာတ အရင်းအမြစ်ရှိသည့် မြို့ဒေသများသို့ ဆွေမျိုးသားချင်းများ၏ အိမ်တွင် လည်းကောင်း၊အိမ်ငှား၍သော် လည်းကောင်း ပြောင်းရွှေ့နေထိုင် ခဲ့ကြရာ ဒဂုံမြို့သစ်(တောင်ပိုင်း)မြို့နယ်တွင် ၎င်းမိသားစုများစွာ နေထိုင်လျက်ရှိပါကြောင်း၊ ၎င်းမိသားစု များအနေဖြင့် အိမ်ထောင်စု လူဦးရေ သန်းခေါင်စာရင်းနှင့် ကိုင်ဆောင်သင့် သည့် နိုင်ငံသားအသိ အမှတ်ပြုကတ်ပြားမရှိဘဲ နေထိုင်နေရသည့်အတွက် အရွယ်ရောက် သည့် သားသမီးများ လည်း နိုင်ငံသားစိစစ်ရေးကတ် လျှောက်ထား ခွင့်မရခြင်း၊အရည်အချင်းနှင့်ကိုက်ညီသော အလုပ် အကိုင် နေရာ လျှောက်ထားခွင့် မရခြင်း၊ကြုံရာအလုပ်များတွင် ဝင်ရောက်လုပ်ကိုင်နေရခြင်း၊ နိုင်ငံသား ကတ်ပြား မရှိခြင်းဆိုသည့်အချက်သည် ထိုသူတို့နှင့် သားသမီးများ၏ အလုပ် အကိုင် အခွင့်အလမ်း များအား ကန့်သတ်သကဲ့သို့ဖြစ်နေခြင်း၊အသက် ၁၈ နှစ်ပြည့်ပြီးသူများအနေဖြင့် ဆန္ဒမဲပေးနိုင်ရန် ကိုင်ဆောင် လက်မှတ် တစ်မျိုးမျိုး လိုအပ်ခြင်း၊လူမှုစီးပွား ဘဝနိမ့်ကျပြီး ဥပဒေလုပ်ထုံး လုပ်နည်းများ အပေါ် လိုက်နာရန် မသိနားမလည်ခြင်း၊သီးခြားလူတန်းစား အသွင် တစ်ရပ်ဆောင်နေခြင်း၊ နိုင်ငံသား အခွင့်အရေး(Right of the Citizen) များအား အပြည့်အဝ ရရှိရန်လိုအပ်နေပါကြောင်း၊ နိုင်ငံတော် အစိုးရသစ် တွင် ပြည်တွင်းပြောင်းရွှေ့နေထိုင်သူများအား ရက်ပေါင်း ၁၀၀ အတွင်းဦးစားပေး ဖြေရှင်း နိုင်ရန် အတွက် သစ္စာစီမံချက်ကို ဆောင်ရွက်ခဲ့ပါကြောင်း၊၎င်း စီမံချက် အကောင်အထည်ဖော်နိုင်ရန် အတွက် မြို့နယ်အုပ်ချုပ်ရေးအဖွဲ့၊ရပ်ကွက်အုပ်ချုပ်ရေးအဖွဲ့ များသည် ရပ်မိရပ်ဖများနှင့် ပူးပေါင်း၍ စာရင်းများတင်ခဲ့ပါကြောင်း၊ ပထမအကြိမ် ၃၄၅၅၊ဒုတိယအကြိမ် ၇၀၉၄ ၊ စုစုပေါင်း ၁၀၅၄၉ ရှိပါ ကြောင်း၊စာရင်းကောက်ယူရန်လည်း ကျန်ရှိနေပါသေးကြောင်း၊သို့သော် ယခုအချိန်တွင်  ပြည်သူ လူထု၊ မြို့နယ်အုပ်ချုပ်ရေး အဖွဲ့၊ ရပ်ကွက် အုပ်ချုပ်ရေးတို့ အင်တိုက်အားတိုက် ဆောင်ရွက်ခဲ့သော ရက် ၁၀၀ စီမံချက်ကာလအတွင်း ၁၁၅၄၉ တွင် အိမ်ထောင်စု ၈၀ ကိုသာ ထုတ်ပေးနိုင်ခဲ့ပါကြောင်း၊ ၁၀၄၆၉ ခု အား စာတိုက်မှဆက်သွယ်ထား သည့်အကြောင်းပြချက်သာရှိပါကြောင်း၊စာရင်းကောက် ယူရာ တွင်လည်း ဒဂုံမြို့သစ်(တောင်ပိုင်း) စိုက်/မွေးရပ်ကွက်တွင် ရှိသည့် မြေနီလမ်း အိမ်ထောင်စု ၄၀၀ ကို မကောက်ခဲ့သဖြင့် လူဦးရေ ၅၀၀ ခန့် သည် ပြီးခဲ့သည့် ၂၀၁၅ တွင် မဲပေးခွင့်မရခဲ့ပါကြောင်း၊ ထို့ကြောင့် အိမ်ထောင်စုစာရင်း နှင့် မှတ်ပုံတင် ကတ်ပြားတစ်မျိုး ကိုင်‌ဆောင်ခြင်း မရ ရှိသော ဒဂုံမြို့သစ် (တောင်ပိုင်း)မှ ပြည်သူများအား၊အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန မှ သင့်လျော်မည့် အစီအမံများဖြင့် လူဦးရေ သန်းခေါင် စာရင်းနှင့် နိုင်ငံသားကတ်ပြားတစ်မျိုးမျိုး အမြန်ဆုံးထုတ်ပေးနိုင်ရေးအတွက် ဆောင်ရွက်ပေးမည့် အစီအစဉ်ရှိ/မရှိကို သိလိုပါကြောင်းဖြင့် မေးမြန်းပါသည်။