ယဉ်ကျေးမှုဝန်ကြီးဌာန၊ ရှေးဟောင်းသုတေသနဌာန၊ ပုဂံဌာနခွဲက ကမ္ဘာလှည့်ခရီးသည်များကို  ဇုန်ဝင်ကြေး များကောက်ခံ၍ ကောက်ခံရရှိသော ဒေါ်လာများကို ရန်ကုန်ရုံးချုပ်သို့ပို့ရပါကြောင်း၊ ရန်ကုန်ရုံးကနေတစ်ဆင့် FERD ကိုပို့၍ အပ်နှံရာတွင် ဟောင်းနွမ်းနေသောဒေါ်လာများ၊ မင်စွန်းနေသောဒေါ်လာများကို လက်မခံဘဲ Correction သဘောမျိုး သိမ်းယူထားသည်ကို တွေ့ရှိရပါကြောင်း၊ ရန်ကုန်ကို သွားပို့ရသဖြင့် စရိတ်လည်းကုန်ပါကြောင်း၊ ညောင်ဦးရှိ မြန်မာ့စီးပွားရေးဘဏ်တွင် အပ်နှံခွင့်ရရှိပါက ခရီးစရိတ် သက်သာမည်ဖြစ်ပါကြောင်း၊ ရန်ကုန်ရုံးချုပ်မှ တဖန် အပ်နှံသည့်အခါတွင်လည်း တချို့ဒေါ်လာများတွင် သူတို့နိုင်ငံ တံဆိပ်ဝိုင်းလေးများပါလာပါက သူတို့က လက်မခံပါကြောင်း၊ ထို့ကြောင့် မိမိတို့သည် ကမ္ဘာ့လှည့်ခရီးများထံက မင်စွန်းမပါသော၊ ဟောင်းနွမ်းမနေသော ဒေါ်လာများကိုသာ ကောက်နေရသဖြင့် ကမ္ဘာ့လှည့်ခရီးသည်များကလည်း မကျေမနပ်ဖြစ်၍ စကားများမှုများ ရှိလာပါကြောင်း၊ တချို့ကမ္ဘာလှည့် ခရီးသည်များကလည်း Travellers Cheque ပါလာသဖြင့် မိမိတို့သည် Travellers Cheque ကို ယူခွင့်မရှိသည့်အတွက် အခက်အခဲများ တွေ့ရှိရပါကြောင်း၊ မကြာမီတွင်လည်း နိုင်ငံခြားဘဏ်များ မြန်မာနိုင်ငံကို လာရောက်ဖွင့်လှစ်မည်ဟု ကြားသိရသဖြင့် အဆင်ပြေမည်ဟုထင်မိပါကြောင်း၊ မိမိအနေဖြင့် Travellers Cheque များကို လက်ခံနိုင်ခြင်းရှိ/မရှိ၊ ဟောင်းနွမ်းနေသော ဒေါ်လာများနှင့် မင်စွန်းအနည်းငယ်ပါသော ဒေါ်လာများကို မည်သည့်အတွက်ကြောင့် ဘဏ်များက လက်မခံသည်နှင့် ခရီးစရိတ်များ သက်သာမှုရှိစေရန်အတွက်  မြန်မာ့စီးပွားရေးဘဏ်တွင် ဒေါ်လာများ အပ်နှံခြင်းကို လက်ခံနိုင်ခြင်းရှိ/မရှိ သိရှိလိုကြောင်း မေးမြန်းပါသည်။