မိမိတို့ မြန်မာနိုင်ငံသည် စိုက်ပျိုးရေးကို အဓိကထား လုပ်ဆောင်သည့်နိုင်ငံဖြစ်ပြီး ရာသီဥတု ဖောက်ပြန်မှုများ မည်သို့ပင်ရှိစေကာမူ စိုက်ပျိုးရေးလုပ်ငန်းကို အတတ်နိုင်ဆုံး အောင်မြင်မှုရရှိအောင် ကြိုးပမ်းအားထုတ်ကြရပါကြောင်း၊ မိုးခေါင်ခြင်း၊ ရေကြီးခြင်းတို့ကြောင့် စိုက်ပျိုးရေးလုပ်ငန်းကို ထိခိုက်မှုများ ရှိလာနိုင်ပါကြောင်း၊ ယခုနှစ် မြန်မာနိုင်ငံ၏ ရာသီဥတုသည် ထူးခြားမှုရှိသည့် နှစ်တစ်နှစ် ဖြစ်ပါကြောင်း၊ မိုးဦးကာလတွင်လေပြင်းများ တိုက်ခတ်ခြင်း၊ မိုးခေါင်ခြင်း၊ ရေကြီးခြင်းစသည့် သဘာဝဘေးအ‌န္တရာယ်များနှင့် ရင်ဆိုင်ကြုံတွေ့ခဲ့ရပါကြောင်း၊ ၎င်းအခြေအနေများကို သုံးသပ်ပြီး ရာသီဥတုနှင့် လိုက်လျောညီထွေမှုရှိသော စိုက်ပျိုးရေးကို အောင်မြင်စွာ ဆောင်ရွက်နိုင်ရန် အရေးကြီး လာပါကြောင်း၊ သို့မှသာ ရာသီဥတုစိန်ခေါ်မှုကို ကျော်လွှားပြီး စိုက်ပျိုးထုတ်လုပ်မှုများ မကျဆင်းအောင် ကာကွယ်နိုင်မည်ဖြစ်ပါကြောင်း၊ ယခု ၂၀၁၅ ခုနှစ် စိုက်ပျိုးရေးရာသီတွင် ရာသီဥတု၏ အကျိုးသက်ရောက်မှုများ ဖြစ်ပေါ်လာနိုင်သည်ဟု စိုက်ပျိုးရေးပညာရှင်များက ခန့်မှန်းထားကြပါကြောင်း၊ ထိုအခြေအနေများကြောင်‌့ စိုက်ပျိုးရေ၊ သောက်သုံးရေအခက်အခဲများ ကြုံတွေ့ လာနိုင်ပါကြောင်း၊ ထို့ကြောင့် စိုက်ပျိုးရေသိုလှောင်မှု မိုးဦးရာသီ စိုက်သီးနှံများ အောင်မြင်ရရှိမှုနှင့် ဆောင်းရာသီသီးနှံများ အစိုဓာတ်လုံလောက်မှုရရှိရန် အစီအမံများဖြင့် အမျိုးသားရေသိုလှောင်ရေးလှုပ်ရှားမှု (National Water Harvesting Campaign-NWHC) တစ်ရပ်ကို အကောင်အထည်ဖော်ရန် လိုအပ်လာပါကြောင်း၊ ရေသိုလှောင်ထိန်းသိမ်းရေး အစီအမံများ တိုးချဲ့ဆောင်ရွက်ရမည်ဖြစ်သော်လည်း ရေရရှိရန် အလွန်နည်းပါးသည့် ဒေသများတွင် သီးနှံစိုက်ပျိုးမှုပုံစံများ ပြောင်းလဲဆောင်ရွက်ရန် လိုအပ်မည် ဖြစ်ပါကြောင်း၊ ဥပမာအားဖြင့် စပါးစိုက်ပျိုးရန် ရေလုံလောက်စွာမရရှိခဲ့ပါက စိုက်ပျိုးရေများစွာ မလိုသော ပဲအမျိုးမျိုးနှင့် အခြားသီးနှံများ စိုက်ပျိုးခြင်းဖြင့် သီးနှံဆုံးရှုံးမှုများ ကာကွယ်နိုင်မည်ဖြစ်ပါကြောင်း၊ သရက်မျိုးများကို စိုက်ပျိုးခြင်းဖြင့် ရက်အနည်းငယ်ဖြင့်သာ စိုက်ပျိုးနိုင်သော သီးနှံများကို ရွေးချယ်စိုက်ပျိုးသင့်ပါကြောင်း၊ ထို့ကြောင့် ရာသီဥတု ဖောက်ပြန်စိန်ခေါ်မှုများကြောင့် စိုက်ပျိုးရေး လုပ်ငန်းများကို မထိခိုက်စေရန် မည်သို့သော အစီအမံများ ချမှတ်လုပ်ဆောင်နေသည်နှင့် အမျိုးသား ရေသိုလှောင်ရေးလှုပ်ရှားမှု (Water Harvesting Canpaign-NWHC) ကို မည်သို့ အကောင်အထည်ဖော် ဆောင်ရွက်မည်ကို သိရှိလိုကြောင်း မေးမြန်းပါသည်။