(က)-အုတ်တွင်းမြို့နယ်နှင့် တောင်ငူမြို့နယ်တို့ ဆက်သွယ်သည့် နောင်ရိုးတံတားအား သံကူကွန်ကရစ် တံတားအဖြစ် တည်ဆောက်ပေးရန် အစီအစဉ် ရှိ၊ မရှိ နှင့်စပ်လျဉ်းသည့် မေးခွန်း
2020-12-16
အုတ်တွင်းမြို့နယ်နှင့် တောင်ငူမြို့နယ်တို့ ဆက်သွယ်ထားသော နောင်ရိုးတံတားသည် ခပေါင်းချောင်းကိုဖြတ်ပြီး ကင်းဆိပ်ရွာနှင့် မကျီးပင်စုရွာကို ဆက်သွယ်ထားသည့် တံတားဖြစ်ပါကြောင်း၊ ထိုတံတားသည် ၂၀၀၄ ခုနှစ်က ကိုယ်ထူကိုယ်ထစနစ်ဖြင့်၊ ကိုယ့်အားကိုယ်ကိုးစနစ်ဖြင့် ဆောင်ရွက်ခဲ့တဲ့ ကျေးရွာပေါင်း ၄၂ ရွာရှိ ပြည်သူများ နေ့စဉ်နှင့်အမျှ ၅၀၀၀၀ မျှသော လူဦးရေ ဖြတ်သန်းသွားလာနေသော တံတားတစ်စင်းဖြစ်ပါကြောင်း၊ အဆိုပါတံတားသည် သစ်သားတံတားဖြစ်ပြီး ရာသီဥတုဒဏ်များကြောင့် ဆွေးမြေ့ပျက်စီးနေသည့်အတွက် အုတ်တွင်းမြို့နယ်နှင့် တောင်ငူမြို့နယ်တို့ ဆက်သွယ်ထားသော နောင်ရိုး တံတားကို သံကူကွန်ကရစ်တံတားအဖြစ် ပြန်လည်တည်ဆောက်ပေးရန် အစီအစဉ်ရှိ/မရှိ၊ အစီအစဉ်ရှိပါက မည်သည့်အချိန်တွင် တည်ဆောက်ပေးမည်နှင့် အစီအစဉ်မရှိပါက မည်သည့်အတွက်ကြောင့် ဖြစ်သည်ကို သိရှိလိုကြောင်း မေးမြန်းပါသည်။