(ဃ)-နိုင်ငံအဝှမ်း သင့်တင့်သော ကျေးရွာတိုင်း၌ စိုက်ပျိုးရေရရှိရေးအတွက်ဆည်ငယ်၊ကန်ငယ်များ တည်ဆောက်ပေးခြင်း၊ မြေအောက်ရေတွင်းများ တူးဖော်ပေးခြင်းနှင့်လျှပ်စစ်ဖြင့်ရေတင်ပေးခြင်း များဆောင်ရွက်ပေးရန်အစီအစဉ်ရှိ၊မရှိ နှင့်စပ်လျဉ်း သည့် မေးခွန်း
အစိုးရသစ်လက်ထက် နိုင်ငံတော်မှ ကျေးလက်ဒေသဖွံ့ဖြိုးရေးလုပ်ငန်းများနဲ့ ဆင်းရဲနွမ်းပါးမှုလျှော့ချရေး လုပ်ငန်းများကို ငွေကြေး အမြောက်အမြား အကုန်အကျခံ၍ ဆောင်ရွက်ပေးလျက်ရှိသောကြောင့် လူနေမှုအဆင့်အတန်းများသည်လည်း တောနှင့် မြို့ များတွင် ကွာဟမှု နည်းပါးနေကြပြီဖြစ်ပါကြောင်း၊
နိုင်ငံတော်မှာ လူဦးရေ ၇၀ ရာခိုင်နှုန်းရှိသော ကျေးလက်တောရွာနေပြည်သူများ၏ အဓိကစီးပွားရေးလုပ်ငန်းဖြစ်သော စိုက်ပျိုးရေးလုပ်ငန်း၏ အဓိကလိုအပ်ချက်မှာ စိုက်ပျိုးရေလုံလောက် ရရှိရေးပင် ဖြစ်သောကြောင့် ကျေးလက်တောရွာနေပြည်သူများ၏ ဆင်းရဲနွမ်းပါးမှုလျှော့ချရေး၏ အဓိကလုပ်ငန်းသည်လည်း စိုက်ပျိုးရေးလုပ်ငန်းများဖွံ့ဖြိုးအောင် စိုက်ပျိုးရေရရှိရေးကို အထူး ဦးစားပေးလုပ်ငန်းအဖြစ် နိုင်ငံတော်မှဆောင်ရွက်ပေးရန် အဓိကလိုအပ်လျက်ရှိပါကြောင်း။ ရေလုံလောက် ရရှိအောင် ဆောင်ရွက်ပေးနိုင်ပါက တစ်သီးစားမှ နှစ်သီးစား၊ သုံးသီးစား စိုက်ပျိုးနိုင်ပြီး စိုက်ပျိုးရေးလုပ်ငန်းနှင့် မွေးမြူရေးလုပ်ငန်းများကို တွဲဖက်လုပ်ကိုင်နိုင်၍ အလုပ်အကိုင်အခွင့်အလမ်းများရရှိခြင်းနှင့် စီးပွားရေးများ ကောင်းမွန်ပြီး ဆင်းရဲနွမ်းပါးမှုကို အလျင်အမြန် လျော့ကျစေမှာ ဖြစ်ပါကြောင်း၊ နိုင်ငံအဝှမ်း သင့်တော်ပြီး လိုအပ်သော ကျေးရွာတိုင်း၌ ဆည်ငယ်၊ ကန်ငယ်များ တည်ဆောက်ပေးခြင်း၊ ရေတွင်းများတူဖော်ပေးခြင်းနှင့် လျှပ်စစ်ဖြင့်ရေတင်ပေးခြင်း လုပ်ငန်းများကို ဆောင်ရွက်ပေးခြင်းဖြင့် ကျေးလက်နေပြည်သူများအား ကြွယ်ဝကြီးပွားချမ်းသာစေလိုသောဆန္ဒများနှင့် နိုင်ငံတော်မှ စိုက်ပျိုးရေရရှိရေးအား သင့်တော်သောကျေးရွာတိုင်း၌ စီမံကိန်းတစ်ရပ်ချမှတ်၍ ဆောင်ရွက်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။