(ဆ)-တပ်မတော်သားကိုယ်စားလှယ်၏ အဝေးပြေးကားဂိတ်များရှိ ယာဉ်များအားမည်သို့ စစ်ဆေးအရေး ယူနေသည်ကိုသိလိုခြင်းနှင့် စပ်လျဉ်းသည့်မေးခွန်း
နိုင်ငံတစ်ဝန်းလုံးနှင့် ရန်ကုန်-မန္တလေး အမြန်လမ်းမကြီးတွင် ယာဉ်တိုက်ခိုက်တိမ်းမှောက်မှုများကြောင့် ပြည်သူ့တို့၏ အသက်များ ဆုံးရှုံးခဲ့ရပါကြောင်း၊ ယာဉ်တိုက်ခိုက်တိမ်းမှောက်မှုများကို လမ်းအခြေအနေ၊ ယာဉ်နှင့် ယာဉ်မောင်းတို့ကြောင့် ဖြစ်သည်ကို တွေ့ရှိရပါကြောင်း၊ ထို့ကြောင့် နိုင်ငံတစ်ဝန်းလုံးရှိ အဝေးပြေးကားဂိတ်များမှ ခရီးသည်တင်ယာဉ်များ မထွက်ခွာမီ ယာဉ်များနှင့် ယာဉ်မောင်းများကို သေချာစွာ စစ်ဆေးဆောင်ရွက်ပေးခြင်းသည် ပြည်သူတို့၏အသက်ကို ကာကွယ်ခြင်းဖြစ်စေပြီး ကောင်းမွန်မှန်ကန်သော ပြည်သူ့ အကျိုးပြုဆောင်ရွက်ခြင်းဖြစ်ပါကြောင်း၊ ရန်ကုန်-မန္တလေး အမြန်လမ်းမကြီးတွင် ၅-၅-၂၀၁၄ ရက်နေ့ ညနေ ၆ နာရီ ၄၅ မိနစ်က တိမ်းမှောက်ခဲ့သော ရာဇာမင်းခရီးသည်တင်ယာဉ်တိမ်းမှောက်မှုကြောင့် ခရီးသည် ၁၄ ဦး သေဆုံးပြီး ၂၉ ဦး ဒဏ်ရာရခဲ့ပြီးနောက် စစ်ဆေးရေးအဖွဲ့များသည် ယာဉ်များမထွက်ခွာမီနှင့် လမ်းခရီးတို့တွင် စစ်ဆေးဆောင်ရွက်ခဲ့တာကိုလည်း တွေ့ရှိရပါကြောင်း၊ ထိုသို့ စစ်ဆေးရာတွင် စစ်ဆေးရေးအဖွဲ့ဝင်များအနေဖြင့် ကျွမ်းကျင်ပညာရှင်များဖြစ်ပြီး စနစ်တကျ မှန်ကန်တိကျစွာ စစ်ဆေးအပြစ်ပေးမှသာ ပြည်သူတို့၏အသက်ကို လုံခြုံစိတ်ချအောင် ကာကွယ်စောင့်ရှောက်နိုင်မည် ဖြစ်ပါကြောင်း၊ ထို့ကြောင့် နိုင်ငံတစ်ဝန်းလုံးရှိ အဝေးပြေးကားဂိတ်များတွင် ယာဉ်များမထွက်ခွာမီ အဖွဲ့စနစ်နှင့် စစ်ဆေးမှုတွေ ဆက်လက်ဆောင်ရွက်နေခြင်း ရှိ/မရှိ၊ စစ်ဆေးဆောင်ရွက်နေပါက မည်သည့်ဌာန အဖွဲ့အစည်းများက ဦးစီးပြီး မည်သည့်ပညာရှင်များနှင့် ဖွဲ့စည်းစစ်ဆေးဆောင်ရွက်နေသည်ကို သိရှိလိုပါကြောင်း၊ စည်းမျဉ်းစည်းကမ်းနှင့် မကိုက်ညီသော ယာဉ်နှင့် ယာဉ်မောင်းများကို မည်သို့ အရေးယူဆောင်ရွက်နေသည်နှင့် အရေးယူဆောင်ရွက်နေမှုအခြေအနေကို သိရှိလိုကြောင်း မေးမြန်းပါသည်။