တောင်သူလယ်သမားများသည် ပိုးသတ်ဆေးများကို ရည်ညွှန်းပါအတိုင်း အသုံးပြုသော်လည်း ပိုးများမသေသည့်အတွက် သီးနှံများ ဆုံးရှုံးပျက်စီးခဲ့ရခြင်း၊ ပေါင်းသတ်ဆေးကို အသုံးပြုသော်လည်း ပေါင်းများ၊ မြက်များမသေသည့်အတွက် ငွေကြေးဆုံးရှုံးနစ်နာမှုများ ခံစားနေရပါကြောင်း၊ တည်ဆဲဥပဒေ၊ ပိုးသတ်ဆေးဥပဒေ၊ နည်းဥပဒေများတွင် နစ်နာဆုံးရှုံးမှုများအတွက် တာဝန်ယူမှု၊ တာဝန်ခံမှုများ ပြဋ္ဌာန်းပေးထားခြင်း မပါရှိသေးသည့်အတွက် အရည်အသွေးမမီသော ပိုးသတ်ဆေး၊ ပေါင်းသတ်ဆေးများ သုံးစွဲမှုကြောင့် ပျက်စီးဆုံးရှုံးသွားသော သီးနှံတန်ဖိုးနှင့် ဆေးဖိုးများကို သက်ဆိုင်ရာဆေးအရောင်းဆိုင် သို့မဟုတ် ကိုယ်စားလှယ် သို့မဟုတ် ကုမ္ပဏီများက နစ်နာသူတောင်သူ လယ်သမားများအား ပေးလျော်ရမည်ဟု ဥပဒေတွင် ဖြည့်စွက်ပြဋ္ဌာန်းရန် လိုအပ်နေပါကြောင်း၊ အကယ်၍ ဖြည့်စွက်ပြင်ဆင်ခြင်း မပြုနိုင်ပါက တောင်သူလယ်သမား အခွင့်အရေး၊ ကာကွယ်ရေးနှင့် အကျိုးစီးပွားမြှင့်တင်ရေးဥပဒေများအား ပြဋ္ဌာန်းခဲ့စေကာမူ တောင်သူလယ်သမားများ အနေဖြင့် နစ်နာ ဆုံးရှုံးနေရဦးမည် ဖြစ်ပါကြောင်း။

သို့ဖြစ်ပါ၍ (၁) ယနေ့တောင်သူလယ်သမားများသည် အရည်အသွေးမမီသော ပိုးသတ်ဆေး သို့မဟုတ် ပေါင်းသတ်ဆေးများ သုံးစွဲနေမှုများကြောင့် သီးနှံများဆုံးရှုံးပျက်စီးနေရမှုနှင့် ဆေးတန်ဖိုးများ ကုန်ကျနေရသည်ကို သိရှိမှုရှိ/မရှိ၊ (၂) တည်ဆဲပိုးသတ်ဆေးဥပဒေ၊ နည်းဥပဒေများတွင် အရည်အသွေးမမီသော ပိုးသတ်ဆေးများ သို့မဟုတ် ပေါင်းသတ်ဆေးများ သုံးစွဲမှုများကြောင့် နစ်နာဆုံးရှုံး ပျက်စီးသွားသော သီးနှံများ၏ နစ်နာမှုနှင့် ဆေးတန်ဖိုးများအား အကျိုးခံစားခွင့်ရရှိရန် ဥပဒေတွင် ပြဋ္ဌာန်းချက်မပါရှိသည်ကို သိရှိမှုရှိ/မရှိ၊ (၃) တောင်သူလယ်သမားများအကျိုးငှာ တည်ဆဲပိုးသတ်ဆေးဥပဒေ၊ နည်းဥပဒေများကို တောင်သူလယ်သမားများ နစ်နာမှုမရှိစေရေးအတွက် သက်ဆိုင်ရာဌာနက ပြင်ဆင်ပေးရန် အစီအစဉ်ရှိ/မရှိ၊ (၄) ပြင်ဆင်ပေးရန်မရှိပါက လွှတ်တော်က တောင်သူလယ်သမားများအကျိုးငှာ တည်ဆဲပိုးသတ်ဆေးဥပဒေအား ပြင်ဆင်ပေးရန် အစီအစဉ်ရှိ/မရှိ သိရှိလိုကြောင်း မေးမြန်းပါသည်။