နိုင်ငံတိုင်းသည် မိမိတိုင်းပြည်ခေတ်မီဖွံ့ဖြိုး တိုးတက်ရေးအတွက် အရေးပါသော သုတေသန RNT လုပ်ငန်းများကို ငွေကြေးအရင်းအနှီး အမြောက်အမြား အကုန်ကျခံပြီးတော့မှ နှစ်မြှပ်လုပ်ဆောင် လျက်ရှိပါကြောင်း၊ သို့သော် မြန်မာနိုင်ငံတွင် ဝန်ကြီးဌာနများအလိုက်၊ နယ်ပယ်များအလိုက် ဌာနအသီးသီးမှာ အလွန်အားနည်းနေခြင်းကြောင့် သုတေသနလုပ်ငန်းများကို ဖွံ့ဖြိုးတိုးတက်အောင် အစိုးရကကူညီ ထောက်ပံ့ပေးရန် လိုအပ်ပါကြောင်း၊  သုတေသနရလဒ်များအပေါ် ခိုင်မာစွာထိန်းသိမ်းရေး မှတ်ပုံတင်ထား ရှိရေးသည်လည်းအရေးကြီးသည့်အတွက် ဝန်ကြီးဌာနများနှင့် ပုဂ္ဂလိကအဖွဲ့အစည်းများအလိုက် ကဏ္ဍ အသီးသီးတွင် မှတ်ပုံတင်ထားရှိရမည့်အပြင် ဗဟိုတွင်လည်း ထားရှိရန်လိုအပ်ပါကြောင်း၊ သ့ိုမှသာ သုတေသနရလဒ်များ ခိုင်မာလာမည်ဖြစ်သကဲ့သို့ ယုံကြည်စိတ်ချစွာ မှီငြမ်းကိုးကားနိုင်မည်ဖြစ်ပါကြောင်း၊ သိပ္ပံနှင့်နည်းပညာဆိုင်ရာ သုတေသနရလဒ်များကို လျှို့ဝှက်ကိစ္စများမှအပ အသေး စိတ်ဖော်ပြနိုင်ပါက စက်မှုနှင့်သိပ္ပံကဏ္ဍများမှ လိုအပ်သလိုမှီငြမ်းအသုံးပြုခြင်းဖြင့် နည်းပညာဆိုင်ရာ တိုးတက်မှုများ ရှိလာ မှာဖြစ်ပါကြောင်း၊  ပညာရေးဝန်ကြီးဌာနမှလည်း သုတေသနစာတမ်းမှဆိုင်ရာ စာတမ်းများ မြောက်မြားစွာ ရှိမည်ဖြစ်ပြီး စုစည်းပြီးဖော်ပြပေးသင်‌့ပါကြောင်း၊ ထို့ကြောင့် သက်ဆိုင်ရာ သုတေသနလုပ်ငန်းများ လုပ်ဆောင်ကြသော ဝန်ကြီးဌာနအသီးသီး၊ ကဏ္ဍအသီးသီးမှဘွဲ့ယူစာတမ်များ၊ သုတေသနစာတမ်းများ၊ လေ့လာတွေ့ရှိချက်များအား စုစည်း၍ တရားဝင်ထုတ်ပြန်ပေးရန် လိုအပ်ပါကြောင်း၊ အင်တာနက် စာမျက်နှာပေါ်တွင် ရယူသုံးစွဲနိုင်ပါက တောင်သူလယ်သမားများ၊ ကျောင်းသားကျောင်းသူများ၊ ဆရာဆရာမများ၊ သုတေသနသမားများနှင့် စိတ်ပါဝင်စားသူ အများပြည်သူအတွက် အကျိုးရှိမှာဖြစ်ပါကြောင်း၊

ထို့ကြောင့် (၁)  သုတေသနလုပ်ငန်းများအား အများပြည်သူအကျိုးရှိအောင် မည်သို့စီမံ ဆောင်ရွက်နေသည်၊ မည်ကဲ့သို့ထောက်ပံ့ပေးပါမည်၊ (၂)        ဝန်ကြီးဌာနများအလိုက် လုပ်ဆောင်ကြ သော သုတေသနရလဒ်များ၊ မှတ်တမ်းများအား မည်သို့ မှတ်တမ်းတင် ထိန်းသိမ်းထားသည်နှင့် (၃) အများပြည်သူ မှီငြမ်းအသုံးပြုနိုင်ရန် လျှို့ဝှက်မဟုတ်သော စာရွက်စာတမ်းနှင့် တွေ့ရှိချက်များ အား အင်တာနက်စာမျက်နှာတွင် အတည်ပြုထုတ်ပြန်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။