ဂွမြို့နယ်တွင် စီးပွားရေးလုပ်ငန်းရှင်တစ်ဦးသည် ယစ်မျိုးလိုင်စင်များဖြစ်သော  D-1 စက်ရုံတည်ဆောက်ပြီး အရက် ချက်လုပ်ခွင့်လိုင်စင်၊ အရက်ပြင်း သိုလှောင်ရောင်းချခြင်း လိုင်စင်၊ ဘီယာများ ရောင်းချခွင့် (လက်ကား) လိုင်စင်နှင့် ပုလင်းဘူးစို့ဖြင့်စွတ်ထားသော အရက်များကို လက်ကား ရောင်းချခွင့် လိုင်စင်များကို ရယူဆောင်ရွက်လျက် ရှိပါသည်။ အဆိုပါပုဂ္ဂိုလ်၏ တင်ပြချက်အရ မြို့ပေါ်နှင့်ကျေးရွာများရှိ စားသောက်ဆိုင်များတွင် ဘီယာနှင့် အရက်မျိုးစုံကို သံတွဲမြို့နှင့် ရန်ကုန်မြို့မှ မှာယူရောင်းချနေခြင်းသည် သယ်ယူပို့ဆောင်ရေး လုပ်ငန်းများကို လုပ်ကိုင်လျက်ရှိသော မော်တော်ကားပိုင်ရှင်များ၊ ကားဂိတ်များ သည်လည်း ဘီယာ၊ အရက်များကို မျှောစာမပါဘဲ သယ်ယူရောင်းချ နေသည့် အတွက် ယစ်မျိုးဥပဒေကို ချိုးဖောက်ရာကျရောက်သည့် အတွက် ဥပဒေအရ အရေးယူသင့်ကြောင်း အဆိုပါစီးပွားရေးလုပ်ငန်းရှင်မှ တင်ပြလာပါသည်။ ယင်းဖြစ်စဉ်များသည် ဂွမြို့နယ်တွင်သာမက မြန်မာနိုင်ငံအန့ှံအပြား တစ်ပြည်လုံးတွင်လည်း ဘီယာ၊ အရက် စသည့် တို့ကို မော်တော်ကား၊ ရေယာဉ်များဖြင့် နေ့စဉ်သယ်ပို့ ရောင်းချလျက်ရှိရာ ထိုသို့ သယ်ပို့ ရောင်းချနေခြင်းမှာ မျှောစာမပါသည့်အတွက် အရေးယူခံရနိုင်ဖွယ်ရာ ရှိကြောင်းကိုလည်း ထပ်မံတင်ပြလာပါသည့်တွက် မိမိအနေဖြင့် အဆိုပါလုပ်ငန်းများအား ဥပဒေအရ လုပ်ပိုင်ခွင့်၊ ရှိ မရှိ၊ လုပ်သင့် မလုပ်သင့် စသည်များကို ရှင်းပြလိုသည့်အတွက် အောက်ပါမေးခွန်းများကို မေးမြန်းရခြင်း ဖြစ်ပါကြောင်း။

မေးခွန်းအနေဖြင့် မြန်မာနိုင်ငံရှိ ပြည်နယ်နှင်‌့ တိုင်းဒေသကြီး အသီးသီးတွင် ဂွမြို့နယ်ရှိ စားသောက်ဆိုင်များကဲ့သို့  ဘီယာ၊ အရက်များရောင်းချခြင်း၊ သယ်ယူပို့ဆောင်ခြင်း စသည်တို့သည် (၁) ဥပဒေနှင့်ညီညွတ်မှု ရှိ/မရှိ။ ညီညွတ်မှုမရှိပါက မည်ကဲ့သို့ အရေးယူဆောင်ရွက်နိုင်မည်နည်း။ (၂) မြန်မာနိုင်ငံတစ်နိုင်ငံလုံးတွင် ယစ်မျိုးလိုင်စင်များဖြစ်သည့် D-1, FL-6, FL-8, FL-11 လိုင်စင်ယူထားသည့် လိုင်စင်စုစုပေါင်း မည်မျှ ရှိသည် ဆိုသည့်မေးခွန်းများကို သိရှိလိုပါကြောင်း မေးမြန်းပါသည်။