မိမိတို့မြို့နယ်သည် ဝေးလံခေါင်ပါးပြီး ဖွံ့ဖြိုးတိုးတက်မှုမရှိသည့် မြို့နယ်ဖြစ်ပါကြောင်း၊ နှစ်စဉ်ကျောင်းဖွင့်ချိန်ရောက်တိုင်း ကျောင်းဖွင့်ချိန်အမီ ဆရာ/မများ မရောက်လာနိုင်ခြင်း၊ ဆရာ/မများလုံလောက်မှုမရှိခြင်း၊ ကျောင်းသုံးစာအုပ်များကို သြဂုတ်လ၊ စက်တင်ဘာလများအထိ ကျောင်းသားများလက်ထဲတွင် အပြည့်အဝမရနိုင်ခြင်းများက အလေ့အထတစ်ခုကဲ့သို့ ဖြစ်နေပါကြောင်း၊ ၂၀၁၆-၁၇ ပညာသင်နှစ်အတွက် ကျေးလက်ကျောင်းများတွင် ပုံနှိပ်စာအုပ်များအစုံအလင်မရခြင်း၊ ဗလာစာအုပ်များ အပြည့်စုံခြင်းများကို သုံးသပ်ကြည့်မည်ဆိုပါက ကျောင်းသားများ၏ အနာဂတ်အခြေအနေများကို ခန့်မှန်းရနိုင်ပါကြောင်း၊ ၂၀၁၇-၁၈ ပညာသင်နှစ်တွင် မိမိတို့မြို့နယ်အတွက် ပညာသင်နှစ်နှစ်တစ်ဝက်စွန်းသည့် အချိန်အထိ ပုံနှိပ် စာအုပ်ကမရှိ၊ မူလတန်းကျောင်းများတွင် ဆရာ/မတစ်ဦးတည်းက ဦးဆောင်သင်ကြား ပေးသည်ကို သိရှိရပါကြောင်း၊ ဆရာ/မ မလုံလောက်သော်လည်း အခြားကျောင်းက မျှတွဲပေးလိုက်သည့်အခါ မူလတန်းကျောင်းတွင် ဆရာနှစ်ဦးနှင့် သင်ကြားပေးနေရခြင်း ယခုအတန်းတင် စာမေးပွဲ ဖြေရတော့မည့် အချိန်အထိ ဖြစ်ပါကြောင်း၊ ၎င်းဖြစ်စဉ်များမှာ ဆရာ/မများ၏ အပြောင်းအရွှေ့ကို ကျောင်းဖွင့်ချိန်တွင် ချပေးလိုက်သည့် အတွက်ကြောင့် ဖြစ်ပါကြောင်း၊

ယခုကဲ့သို့ အခြေအနေများကြောင့် ဆရာဆရာမများရဲ့အပြောင်းအရွှေ့ကိစ္စကို ကျောင်းမဖွင့်မီ အပြီးအစီးဆောင်ရွက်ပေးရန်နှင့် ကျောင်းဖွင့်ချိန်အမီ မိမိတာဝန်ကျသည့်မြို့နယ်၊ ကျေးရွာများမှာ အရောက်သွားနိုင်အောင် စနစ်တကျဆောင်ရွက်ပေးစေချင်ပါကြောင်း၊ နောက်တစ်ချက်က ယခုလို ဆရာ/မလုံလောက်မှု မရှိသည့်အခက်အခဲများ နှစ်စဉ်ကြုံတွေ့နေကြရခြင်း၊ မိမိဒေသတွင် တာဝန်ထမ်းဆောင်ချင်သည့် စိတ်ဖြင့်ပညာရေးဘက်တွင် စိတ်အားထက်သန်သည့် စိတ်တို့ရှိခြင်းကြောင့်၊ တက္ကသိုလ်ဝင်တန်းအောင်များနှင့် ဘွဲ့ရပြီးသည့်ဒေသခံလူငယ်များသည် ပညာရေးဝန်ကြီးဌာနက နေ့စားလပေးခေါ်သဖြင့် လျှောက်လွှာများလည်း တင်ခဲ့ကြသည်ဟု သိရှိရပါသော်လည်း ခန့်ထားပေးမှုထဲတွင် တစ်ယောက်မှပါမလာသည်ကိုလည်း တွေ့ရပါကြောင်း၊ အမည်စာရင်းများ သီးသန့်ပြုစုပြီး တင်ပြခဲ့သော်လည်း ယနေ့အချိန်ထိ အကြောင်းထူးလာခြင်းမျိုး မရှိပါကြောင်း၊ ထို့ကြောင့် ပညာသင်ယူနေကြသည့် ဒေသခံတိုင်းရင်းသားကလေးများ ကောင်းမွန်စွာ ပညာသင်ယူနိုင်ရေးအတွက် ဆရာ/မများအပြောင်းအရွှေ့အား ကျောင်းမဖွင့်မီ မတ်လ၊ ဧပြီလများတွင် သီးသန့်ဆောင်ရွက်ပေးပြီး ကျေးလက်ကျောင်းများတွင် ဆရာ/မများလုံလောက်စွာ ခန့်ထားပေးနိုင်ရန် မည်သို့စီမံထားရှိသည်ကို သိရှိလိုပါကြောင်း၊ တက္ကသိုလ်ဝင်တန်းအောင်သူများနှင့် ဘွဲ့ရပြီးဒေသခံလူငယ်များအား နေ့စားလပေးခန့်ထားပေးနိုင်ရန် အစီအမံများရှိ/မရှိ သိရှိလိုပါကြောင်း မေးမြန်းပါသည်။