မြန်မာနိုင်ငံ၏ အခြေခံလူတန်းစားအများစုသည် မြန်မာ့မီးရထားကို အားကိုး အားထားပြုပြီး ခရီးသွားလာကြရပါသည်။ လောလောဆယ် တွင် မြန်မာ့မီးရထား တွင် အဓိက ရထား လမ်းပိုင်းများဖြစ်သော ရန်ကုန်-မန္တလေး၊ ရန်ကုန်-မော်လမြိုင်၊ ရန်ကုန်-ပုဂံ၊ ရန်ကုန်-ပြည်၊ မန္တလေးမြစ်ကြီးနား၊ မန္တလေး-လားရှိုး၊ မန္တလေး-သာစည်၊ မုံရွာ-ပခုက္ကူလမ်းပိုင်းများအစရှိသော ခရီးသည်နှင့် ကုန်စည်ရထား များနေ့စဉ် ပြေးဆွဲနေပါသည်။ ထို့အပြင် တိုးချဲ့ ဖောက်လုပ် ထားသော ရထားလမ်းပိုင်းများတွင်လည်း ပြေးဆွဲနေကြောင်း သိရှိရပါသည်။ နိုင်ငံတော် အနေဖြင့် စီးပွားရေးမြို့တော် ရန်ကုန်နှင့် မြန်မာနိုင်ငံ အလယ်ပိုင်း မန္တလေးမြို့သို့ ဆက်သွယ် ထားသော အရှည်  ၆၄၀ ကီလိုမီတာ ရထားလမ်း အဆင့် မြှင့်တင်ရေးနှင့် ဒီဇယ်စက်ခေါင်းစက်ရုံ၊ တွဲဆိုင်းစက်ရုံများ အား ဖြည့်ဆည်းတည်ဆောက်ရေးအတွက် အစီအမံများ ထားရှိကြောင်းလည်း သိရှိရပါသည်။ မြန်မာ့မီးရထားဖြင့် ခရီးသွားလာရပါက ပြည်သူလူထု အနေဖြင့် အန္တရာယ် လုံခြုံစိတ်ချ၍ ပြည်သူလူထု အားထားပြုပြီး ခရီးသွားများပြားခြင်း တစ်ချိန်က ရှိခဲ့ပါသည်။ သို့ရာတွင် ယခုအခါမှာ မြန်မာ့ခရီးသွားများ အနေဖြင့် မြန်မာ့မီးရထားကို အားကိုးအားထား မပြုတော့ကြောင်း လေ့လာ သိရှိ တွေ့မြင်နေရပါသည်။ အကြောင်းမှာ သက်တောင့်သက်သာရှိသော Express မော်တော်ယာဉ်များ လိုင်းပေါင်းစုံ မော်တော်ယာဉ်များ ပေါ်ပေါက်လာသည့် အတွက် ပြည်သူများ အနေဖြင့် ခရီးသွားသက်တောင့် သက်သာရှိခြင်း၊ အချိန်မှန်ခြင်း၊ သွားလိုသည့်ခရီးကို အချိန်မီရခြင်း စသည့် အားသာချက် များကြောင့် မော်တော် ယာဉ်ဖြင့် ခရီးသွားခြင်းကို ပြည်သူလူထု ပို၍အားကိုးအားထားပြု လာကြောင်း တွေ့ရှိနေရပါသည်။

နိုင်ငံတော်အနှံ့ ကွန်ရက်သဖွယ် ဆောက်လုပ်ဖောက်လုပ်ထားသော လမ်းပိုင်းပေါင်း မြောက်များစွာရှိသော်လည်း လမ်းပိုင်းနှင့် နှိုင်းဆပါက မီးရထားတွဲဆိုင်းများ အလွန်နည်းနေကြောင်း တွေ့ရှိရပါသည်။ မီးရထားခရီးစဉ် နည်း၍ ခရီစဉ်ပြေးဆွဲမှု ရထားစီးရေ လျှော့နည်းရခြင်းဖြစ်ကြောင်း ပြောဆိုနိုင်သော်လည်း မည်သည့် အတွက်ကြောင့် ခရီစဉ် နည်းရခြင်းဖြစ်ကြောင်းကို တာဝန်ရှိသူများ သုံးသပ်အဖြေရှာရန် လအပ်ပါကြောင်း၊ အလားတူ တစ်ချိန်က ကုန်စည်ပို့ဆောင်မှုများကို ရန်ကုန်-မန္တလေး မြန်မာ့မီးရထားလမ်းပေါ်က မြို့များမှ ဒေသထွက်ကုန်မျိုးစုံကို အလုအယက် ဘူတာတွင် တန်းစီစောင့်ဆိုင်း တင်ပို့ခဲ့ရသော်လည်း ယခု အခါမှာ ကုန်စည်ပို့ဆောင်နိုင်မှု လုံးဝပျောက်ကွယ်လုမတတ် ဖြစ်နေသည်ကြုံတွေ့နေကြရပြီး မြန်မာ့မီးရထား၏ လူထုအားကို အားထားပြုခြင်း ခံရအောင် အောင်လံထူနိုင်မှုသည် ယခု “မည်သည့်အတွက်ကြောင့် အောင်လံမထူနိုင်သလဲ” ဆိုသည်ကို ခြုံငုံသုံးသပ်ပြီး အဖြေရှာရန် လိုပြီဟု မိမိအနေဖြင့် ယူဆပါကြောင်း၊ သို့ပါ၍ မြန်မာ့မီးရထား လမ်းပိုင်းများတွင် ခရီးသည်နှင့် ကုန်စည်ပို့ဆောင်ရေး အတွက် မည်သို့သော အစီအမံများဖြင့် အဆင်‌့မြှင့်တင် ဆောင်ရွက်ပေးရန် အစီအစဉ် ထားရှိသည်ကို သိရှိလိုပါကြောင်း မေးမြန်းပါသည်။