(ခ)-ကလေးမြို့နယ်၊ ရာဇဂြိုဟ်ဘက်စုံ ရေလှောင်တမံအား ပြန်လည်ပြုပြင်ပေးရန်နှင့် စပ်လျဉ်းသည့် မေးခွန်း
ရာဇဂြိုဟ်ဆည်ကြီးကို ၂၀၀၀-၀၁ ခုနှစ်က စတင်အစပျိုးတည်ဆောက်ခဲ့ပြီး ၂၀၀၃-၀၄ ခုနှစ်တွင် မြေပြင် တည်ဆောက်ရေးလုပ်ငန်းများ စတင်အကောင်အထည်ဖော်ခဲ့ပြီး ၂၀၁၅ ခုနှစ် ဖေဖော်ဝါရီလတွင် စီမံကိန်းမှာပါသည့် လျှပ်စစ်ဓာတ်အားအတွက် စက်တပ်ဆင်ခြင်းနှင့် လယ်အတွက် ရေသွယ်မြောင်းများ တည်ဆောက်မှုလုပ်ငန်းများ မပြီးမြောက်သေးသော်လည်း ဖွင့်ပွဲကို ကြီးကျယ်စည်ကားစွာဖြင့် အဲဒီအချိန်က နိုင်ငံတော်သမ္မတကြီးကိုယ်တိုင် ဖွင့်လှစ်ပေးခဲ့ခြင်း ဖြစ်ပါကြောင်း၊ ၂၀၁၅ ခုနှစ် ဇူလိုင်လတွင် အဆိုးဝါးဆုံးရေကြီးရေလျှံမှုနှင့် ရင်ဆိုင်ခဲ့ရပါကြောင်း၊ သို့သော် ရေကြီးရေလျှံမှုဖြစ်ခြင်းကြောင့် ဆည်အတွင်းဝင်ရောက်ပြီး ရေပိုရေလွှဲအဝတွင် ပိတ်ဆို့နေသည့် အမှိုက်သရိုက်များကို ဆည်မြောင်းဝန်ထမ်းများနှင့် ဒေသခံပြည်သူများ၏ သက်စွန့်ကျိုးပမ်း ဖယ်ရှားရှင်းလင်းနိုင်ခဲ့မှုကြောင့် ဆည်ကြီးသည် အကောင်းပဂတိအတိုင်း တည်ရှိနေခြင်း ဖြစ်ပါကြောင်း၊
မိမိတို့ဆည်သည် ကျပ်သန်းပေါင်း ၆၉၈၂၆.၃၂၈ သန်းနှင့် နိုင်ငံခြားငွေဒေါ်လာ ခြောက်သိန်းဖြင့် ၁၁ နှစ်ကြာတည်ဆောက်ခဲ့ရသည်နှင့် ထိုက်တန်စွာ လျှပ်စစ်ဓာတ်အား (၄) မဂ္ဂါဝပ်နှင့် မိုးစပါးအတွက် လယ်မြေဧက ၈၅၀၀ ဧကကို အလုံအလောက် ရေပေးဝေနိုင်မည်ဟု သိရှိရပါကြောင်း၊ ၎င်းတို့ထဲကမှ လယ်ဧက ၃၄၀၀ ဧကကို ၂၀၁၇ ခုနှစ် မိုးတွင်စတင်ပေးဝေနိုင်ပြီဟု သိရှိရပါကြောင်း၊ နိုင်ငံတော်အစိုးရ၏ မူဝါဒလေးချက်ထဲက တစ်ချက်ဖြစ်သည့် လူများစုဘဝဖွံ့ဖြိုးတိုးတက်ရေး ဆိုသည့်အပေါ် တိုက်ရိုက်သက်ဆိုင်နေခြင်း ဖြစ်ပါကြောင်း၊ စီမံကိန်းအတိုင်း အကောင်အထည် ဖော်နိုင်လျှင် နိုင်ငံတော်အပေါ် ကောင်းမွန်သည့် အကျိုးသက်ရောက်မှုများကို ရရှိစေမည် ဖြစ်ပါကြောင်း၊ ဆည်ကြီးကို တရားဝင်ဖွင့်လှစ်ခဲ့ပြီး နှစ်နှစ်ကြာသည့်တိုင်အောင် လျှပ်စစ်ပိုင်း ဆိုင်ရာများ တပ်ဆင်ပြီးဖြစ်သော်လည်း လျှပ်စစ်ဓာတ်အားထုတ်လုပ်ပေးမည့် Generators များက လုပ်ပေးနိုင်ခြင်း မရှိသေးပါကြောင်း၊ မြေယာလျော်ကြေးများ အပြေအကြေပေးလျော်ပြီး ဖောက်လုပ်ထားသည့် ရေသွင်းမြောင်းများ ထဲမှာလည်း အပြည့်အဝမစီးဆင်းနိုင်သေးပါကြောင်း၊ ထို့ထက်ပိုပြီး ခက်ခဲစေနိုင်သည်မှာ ဆည်နှင့်ပတ်သက်သည့် သတင်းအချက်အလက်အမှားများ ပြန့်နှံ့နေမှုသည် အနာဂတ်ဖွံ့ဖြိုးတိုးတက်မှုကို အဟန့်အတားဖြစ်စေ နိုင်ခြင်းဖြစ်ပါကြောင်း၊
မိမိတို့နိုင်ငံသည် တောင်သူလယ်သမားများကို ဗဟိုပြုပြီးတည်ဆောက်ထားသည့် နိုင်ငံဖြစ်သည်နှင့်အညီ ရေနှင့်ရေသွင်းမြောင်းများသည် အသက်သွေးကြောများဖြစ်ပြီး လူနေမှုဘဝ မြင့်မားရေးအတွက် လျှပ်စစ်မီးရရှိရေးသည်လည်း အခြေခံအကျဆုံးအချက် ဖြစ်ပါကြောင်း၊ လူမှုဘဝဖွံ့ဖြိုးတိုးတက်ရေးအတွက် အဓိကအထောက်အကူပြုမည့် ဆည်ကြီးသည် ယခုချိန်တွင် မူလရည်ရွယ်ချက်များနှင့် လွဲချော်ပြီး အများပြည်သူအပန်းဖြေ အနားယူသည့် ရေကန်ကြီး တစ်ခုကဲ့သို့ ဖြစ်နေပါကြောင်း၊ ထို့ကြောင့် ရာဇဂြိုဟ်ဘက်စုံရေလှောင်တမံအား ပြန်လည်ပြုပြင်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။