ရန်ကုန်တိုင်းဒေသကြီး၊ လှိုင်သာယာမြို့နယ်၊ တွံတေးမြို့နယ်၊ ထန်းတပင်မြို့နယ် များနှင့် ဆက်စပ်လျက်ရှိနေသော ပန်းလှိုင်မြစ်သည် ရန်ကုန်တိုင်းဒေသကြီးနှင့် ဧရာဝတီတိုင်းဒေသကြီးတို့အတွက် ကုန်စည်စီးဆင်းရာ လမ်းကြောင်း တစ်ခု ဖြစ်ပြီး လှိုင်မြစ်ကို တိုးလျှိုပေါက်ရှိခဲ့ရာမှ ယခုအချိန်တွင် မြစ်တိမ်ကောလာမှုသည်  ဆိုးရွားသည့် အခြေအနေကို ရောက်ရှိခဲ့ ပါကြောင်း၊  မြစ်ကြောင်းမှ နှုန်းပို့ချမှု၊ သောင်ဖြစ်ထွန်းမှုများ လာခြင်းတို့အပြင် ရေလမ်းကြောင်းပိတ်ခြင်း၊ ရေလမ်းလွဲခြင်းများကို ကိုယ်ကျိုးစီးပွားအတွက်  ဥပဒေနှင့်ဆောင်ရွက်ခြင်းများ စသည်ဖြင့် အမျိုးမျိုးပြုလုပ်နေခဲ့ခြင်းကြောင့် ရေမြောင်းလောက်သာ ရေစီးဆင်းနိုင်ခဲ့ပြီး ထိုကဲ့သို့ မြစ်ကြောင်းတိမ်ကောလာခြင်းကြောင့် မြစ်အတွင်း မိုးရေ စီးဆင်းမှုနှင့် ရေထွက်ပေါက်များ မရှိတော့ဘဲ ရေကြီးရေလျှံမှုများ ပိုမိုဆိုးရွားလာခဲ့ကာ လှိုင်သာယာမြို့နယ် အလုံနှင့် ကြည့်မြင်တိုင် တစ်ဖက်ကမ်း ရပ်ကွက်များ၊ ကျေးရွာများ၊ တွံတေးမြို့နယ်များတွင် ရေမြှုပ် ဧရိယာများ ပိုမိုများပြားလာခြင်း၊ လှိုင်သာယာ မြို့နယ် တောင်ဘက်ခြမ်းရှိ ကျွန်းကြီးရွာ၊ အပြင်ဘရန်၊ တွင်းဘရန်၊ အနော်ရထာ စက်မှုဇုန်၊ မေဥယျာဉ်အိမ်ရာ၊ ရွှေသံလွင်စက်မှုဇုန်တို့ အပြင် ဇုန်(၅)၊ နည်းပညာတက္ကသိုလ် ဝန်းကျင်တို့တွင်လည်း ရေလွှမ်းမိုးမှုများ ကြာရှည် ဖြစ်ပေါ်လျက်ရှိပါကြောင်း၊  နည်းပညာတက္ကသိုလ် ကျောင်းသူကျောင်းသားများအနေဖြင့် ရေလွှမ်းနေသော စာသင်ခန်းထဲတွင်ပင် စာမေးပွဲဖြေနေခြင်းကိုလည်း ကြားသိရသည့်အပြင် မြို့ရွာစက်မှုဖွံ့ဖြိုးရေးလုပ်ငန်းများ ဆောင်ရွက်ရန် အခက်အခဲရှိနေခြင်း၊ မြေယာကျူးကျော်မှုများ၊ မှုခင်းများ၊ ဥပဒေမဲ့ နေထိုင်မှုများ၊ အုပ်စုဖွဲ့ မတရားပြုမှုများလည်း ဖြစ်ပေါ်လျက်ရှိနေသည့်အတွက် ရန်ကုန်တိုင်းဒေသကြီးအတွင်းတွင် အနီးကပ် တည်ရှိနေပါသော်လည်း တစ်နေ့တခြား ဆိုးရွားလာနေပြီး တခြားဆိုးကျိုးများလည်း ဖြစ်ပေါ် လာနိုင်သောကြောင့် အောက်ပါမေးခွန်းကို မေးမြန်းလိုပါကြောင်း၊

ပန်းလှိုင်မြစ်တိမ်ကောမှုကြောင့်  မြို့နယ်၊ ရပ်ကွက်၊ ကျေးရွာများ ရေကြီးရေလျှံမှု ဖြစ်ခြင်း၊ ပန်းလှိုင်မြစ်ကြောင်း တစ်လျှောက် ကုန်စည်စီးဆင်းမှု အခက်အခဲဖြစ်ခြင်း၊ ဂေဟစနစ်များ ပျက်စီးရခြင်းနှင့် နောက်ဆက်တွဲ ဆိုးကျိုးများ ဖြစ်ပေါ်ရခြင်းများကို အချိန်မီ ထိန်းသိမ်းကာကွယ်နိုင်ရန် ပန်းလှိုင်မြစ်ကြောင်း ထိန်းသိမ်းရေးနှင့် ဖွံ့ဖြိုးရေးလုပ်ငန်းများ အလျင်အမြန် ဆောင်ရွက် ပေးနိုင်ခြင်း ရှိ/မရှိကို သိရှိလိုပါကြောင်းမေးမြန်းပါသည်။