ပြည်ပမှ သင်္ဘောများဖြင့် တင်သွင်းလာသော စားအုန်းဆီများကို ဆိပ်ကမ်းတွင် FDA မှ စိစစ်ပြီး အရည်အသွေး ကောင်းမွန်ပြီး သက်မှတ်အဆင့်မီမှသာလျှင် သင်္ဘောမှချခွင့်ပြုသည်ဟု သိရှိရပါသည်။ ၎င်းသင်္ဘောမှ ချခွင့်ရသော စားအုန်းဆီများကို ဆိပ်ကမ်းရှိ ပိဿာပေါင်း ၄ သောင်းခန့်ဆံ့သည့် ဆီသိုလှောင်ကန် ၇ ကန်ထဲသို့ ပိုက်များနှင့် ထည့်သွင်းသိုလှောင်ပြီး တစ်ပြည်လုံးသို့ ဖြန့်ချီနေကြောင်းကိုလည်း ကြားသိရပါသည်။

ပြည်ပမှတင်သွင်းလာသော စားအုန်းဆီများကို ရန်ကုန်မြို့ရှိ တချို့ဆီကန်များမှ တစ်ပြည်လုံးရှိ လက်လီ လက်ကားဆိုင်များသို့ ဖြန့်ဖြူးရောင်းချရာတွင် အလေးချိန်လျော့နည်းနေခြင်း၊ အရောင်အသွေးပြောင်းနေခြင်း၊ အနံ့ဆိုးများ ထွက်နေခြင်း၊ စည်းသတ်မှတ်ထားသော Cloud Point 8 ထက်အရည်အသွေးလျော့၍ ကြည်လင်မှုမရှိဘဲ မှုန်နေခြင်း၊ ဆီလှောင်ကန်မှ ထုတ်စအချိန်တွင် ကြည်လင်စေပြီး နှစ်ရက်သုံးရက်ခန့်အကြာတွင် ဆီများ မှုန်မိုက်၍ ပြစ်ချွဲနေခြင်းကို မန္တလေးအပါအဝင် နယ်မြို့များမှ တင်ပြလာပါကြောင်း၊ လွန်ခဲ့သော ၅ လ၊ ၆ လ ခန့်က စားအုန်းဆီတင်လာသော သင်္ဘောမှ ဆီကိုနုတ်၍ ရေရောသောဖြစ်ရပ်နှင့် ၂၀၁၃ ခုနှစ်၊ ဇူလိုင်၊ သြဂုတ်လများအတွင်း ထပ်မံဖြစ်ပျက်ခဲ့သောဖြစ်ရပ်များကြောင့် စားသုံးသူများ၏ ကျန်းမာရေးကို ပိုမိုဆိုးရွားစေခဲ့ပါကြောင်း၊ သို့ဖြစ်ပါ၍ ဖော်ပြပါဖြစ်ရပ်များသည် ဆီတင်သွင်းသောကုမ္ပဏီတချို့၏မှားယွင်းမှုများ၊ ဆီကန်ရောက်မှဖြစ်သော မှားယွင်းမှုများ သို့မဟုတ် မျှော်မှန်းမရသော အခြားမှားယွင်းမှုများ စသည်တို့ကို သက်ဆိုင်ရာ၏ ဝန်ကြီးဌာနများမှ ဖော်ထုတ်အရေးယူရန် အစီအစဉ်ရှိ/မရှိကို သိရှိလိုပါကြောင်း မေးမြန်းပါသည်။