လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၏ မိုးပွင့်စီမံချက်များသည် ရည်ရွယ်ချက် ကောင်းမွန် သော်လည်း ပြည်သူများအတွက် လက်တွေ့ အကျိုးသက်ရောက်မှုမရှိဘဲ ဖြစ်နေပါသည်။ နိုင်ငံသားစိစစ်ရေးကတ် ထုတ်ပေးရေးအတွက် ငွေကျပ် ၁၀၀၀၀ ကနေ ၄၀၀၀၀ ထိ ပြောင်ပြောင် တင်းတင်း တောင်းခံနေကြသည့်အတွက် လက်လုပ်လက်စား ပြည်သူများ အနေဖြင့် ပေးဆောင်နေရဆဲဖြစ်ပါသည်။ အသက် ၁၈ နှစ်ပြည့်ပြီး မှတ်ပုံတင်မရှိသော မွေးရာပါ နိုင်ငံသားများမှာလည်း တစ်မြို့တည်းတွင်ပင် ထောင်ချီပြီး ရှိနေပါသည်။ အုပ်ချုပ်ရေးမှူးများ၊ ရပ်မိရပ်ဖများနှင့် ပြည်သူ့လွှတ်တော် ကိုယ်စားလှယ် ကိုယ်တိုင်က ရှေ့ပြေးဖောင်ဖြည့်ပေးခြင်း၊ အကြိုအပို့လုပ်ပေးခြင်း၊ စားစရိတ်နှင့် လိုအပ်သည်များအားလုံးကို ပံ့ပိုးပေးမည်ဟု တင်ပြပြီး နိုင်ငံသား စိစစ်ရေးကတ် မရှိသော လူဦးရေ စာရင်းနှင့်တကွ မြို့နယ်လဝကကို တင်ပြသော်လည်း အကြောင်းမပြန်၊ စာတင်သော်လည်း ပြန်လည်ဖြေကြားခြင်း မရှိသည့်အတွက် လဝကပြည်ထောင်စုဝန်ကြီး၏ မိုးပွင့်စီမံချက် ကြော်ငြာများမှာ အလွန်ကောင်းမွန်သော်လည်း အခြေခံပြည်သူများ အတွက် ငွေများများပေးနိုင်မှ ရရှိနိုင်မည့် စီမံချက်ဖြစ်ပါကြောင်း။

နိုင်ငံတော်သမ္မတကြီး၏ ကောင်းမွန်သော အုပ်ချုပ်ရေး၊ သန့်ရှင်းသောအစိုးရဟု မည်မျှပင် ပြောကြားစေကာမူ၊ ပြည်ထောင်စုလွှတ်တော်က ကောင်းမွန်သောဥပဒေများ မည်မျှပင်ပြဋ္ဌာန်းစေကာမူ အောက်ခြေအုပ်ချုပ်ရေး အဆင့်များတွင် လာဘ်ပေးလာဘ်ယူမှု၊ အဂတိလိုက်စားမှုများမှာ ယနေ့တိုင်ပြောင်းလဲမှု မရှိသေးပါကြောင်း၊ ပြည်သူများအနေဖြင့် အထက်လူကြီး၊ တာဝန်ရှိများအား သံသယမျက်လုံးများဖြင့် ယခင်အစိုးရကဲ့သို့ပင် အယုံအကြည် ကင်းမဲ့လျှက်ရှိနေကြပါကြောင်း၊ သို့ပါ၍ ဒုတိယဥက္ကဋ္ဌကြီးမှတစ်ဆင့် မေးမြန်းလိုသည်မှာ နိုင်ငံသားစိစစ်ရေး ကတ်ပြားနှင့် အိမ်ထောင်စုစာရင်းပြုလုပ်ရာတွင် မိုးပွင့်စီမံချက်များအတိုင်း မြန်ဆန်စွာနှင့် သတ်မှတ် ထားသည့် နှုန်းထားအတိုင်းဖြစ်အောင် အဆင့်ဆင့်ကြပ်မတ်ဆောင်ရွက်ပေးရန် အစီအစဉ်များနှင့် ပတ်သက်၍ သိလိုပါကြောင်း မေးမြန်းပါသည်။