ဟိုနမ့်နှင့် ပန်းသာကျေးရွာအုပ်စုနှစ်စုဖြင့် စုစည်းထားသော ဟိုနမ့်ဒေသတွင် ပအိုဝ်တိုင်းရင်းသားအများဆုံး မှီတင်း နေထိုင်ကြပြီး လူဦးရေ ၈၀၀၀ နှင့် ၁၀၀၀၀ အကြားရှိပြီး အ.ထ.က (ခွဲ) တစ်ကျောင်း၊ ရဲစခန်းနှင့် ၁၆ ခုတင်ဆံ့ တိုက်နယ်ဆေးရုံတည်ရှိပါသည်။ မောက်မယ်နှင့် ဆီဆိုင်မြို့နယ်အကြား ပွန်ချောင်းအရှေ့ဘက်အခြမ်း တောင်ပေါ်ဒေသတွင် တည်ရှိပြီး ၎င်းမြို့ နယ်နှစ်မြို့နယ်၏ ဆက်သွယ်ရေး ဧရိယာပြင်ပတွင်ရောက်ရှိနေပါသည်။ IP Star ဖုန်းနှစ်လုံး တပ်ဆင်ထားပါသော်လည်း အဝင်ဖုန်းသာရရှိပြီး အထွက် ဖုန်းပြန်လည်ခေါ်ဆို၍ မရရှိနိုင်ပါ။ ဟိုနမ့်ဒေသ လက်ကိုင်ဖုန်း ကိုင်ဆောင်ခွင့် ရရှိရေးအတွက် ယခင်နှစ်သိန်းခွဲတန်ဖုန်းများ ခေတ်စားချိန်တွင် တင်ပြတောင်းဆိုခဲ့ ဖူးပြီး ဟိုနမ့်ဒေသတွင် သီးသန့်ဖုန်းလိုင်း ဆောင်ရွက်ရန်လိုအပ်ကြောင်း ဖြေကြား စာ ပြန်လည်ရရှိခဲ့ပါသည်။ ယခုအခါ နိုင်ငံတော်မှ ဆက်သွယ်ရေး ကဏ္ဍနှင့် ပတ်သက်၍ နိုင်ငံတကာအဆင့်မီ သုံးစွဲခွင့်ရရှိရန် စီစဉ်ဆောင်ရွက် ထားပြီးဖြစ်ပါသည်။ ကျေးလက်နှင့်မြို့ပြ ကွာဟချက် နည်းနိုင်သမျှနည်းပါးအောင် ကြိုးပမ်းဆောင်ရွက်နေချိန် လည်းဖြစ်ပါသောကြောင့် ဟိုနမ့်ဒေသ ပအိုဝ်းတိုင်းရင်းသားများနှင့် ဝေးလံခေါင်သီသောဒေသတွင် တာဝန် ထမ်းဆောင်နေကြသော ဝန်ထမ်း ပေါင်းစုံတို့၏ ကိုယ်စား အောက်ပါမေးခွန်းများကို မေးမြန်းလိုပါကြောင်း -

(၁) တိုးတက်ခေတ်မီသော အစိုးရသစ်လက်ထက်တွင် ဟိုနမ့်ဒေသ၌ တန်ဖိုးနည်းလက်ကိုင်ဖုန်းများ အသုံးပြုခွင့်ရရှိရေးအတွက် စီစဉ်ဆောင်ရွက်ပေးရန်အစီအစဉ် ရှိ/မရှိ။

(၂) အစီအစဉ်ရှိပါက မည်သည့်အချိန်တွင် မည်ကဲ့သို့ဆောင်ရွက်ပေးမည်၊ အစီအစဉ်မရှိပါက အဘယ်ကြောင့် မဆောင်ရွက်ပေးနိုင်သည်ကို သိရှိလိုကြောင်း မေးမြန်းပါသည်။