(ဃ)အသေးစား စီးပွားရေး လုပ်ငန်းများ တိုးတက်ရေးနှင့်ပြန်လည်ရှင်သန်ရေးအတွက် မည်သို့စီမံချက်များရှိသည်ကို သိလိုသည်နှင့် စပ်လျဉ်းသည့်မေးခွန်း
လွန်ခဲ့သော လ ၃၀ အတွင်း ပြည်တွင်းအသေးစား စီးပွားရေးလုပ်ငန်းများ ကျဆင်းခြင်း၊ ရပ်ဆိုင်းသွားခြင်း၊ တချို့လုပ်ငန်းများ ၇၀၊ ၈၀ ရာခိုင်နှုန်းခန့်အထိ ရပ်ဆိုင်းသွားခြင်းများကို တွေ့ရှိရပါကြောင်း၊ မြန်မာနိုင်ငံတွင် အသေးစား လုပ်ငန်းသည် လုပ်ငန်းရှင်အားလုံး၏ ၉၀၊ ၉၅ ရာခိုင်နှုန်းရှိခြင်းကြောင့် အသေးစား၊ အလတ်စားလုပ်ငန်းများ တိုးတက်ရှင်သန်မှ မြန်မာနိုင်ငံအတွင်း အလုပ်အကိုင်အခွင့်အလမ်း တိုးတက်လာမည်ဖြစ်ပါကြောင်း၊ အသေးစားလုပ်ငန်း ရှင်များ အမြန်ဆုံး ပြန်လည်ရှင်သန်ရန်လိုအပ်သလို ၂၀၁၅ ခုနှစ်၌် စတင်မည့် AFTA တွင် စီးပွားရေးယှဉ်ပြိုင်မှု ပိုမိုပြင်းထန်လာမည်ဖြစ်ပါကြောင်း၊ သို့ဖြစ်ပါ၍ အသေးစားစီးပွားရေးလုပ်ငန်းများ ပြန်လည်ရှင်သန်ရန် လက်ရှိလုပ်ကိုင်နေသော အသေးစားစီးပွားရေး လုပ်ငန်းရှင်များ၏ လုပ်ငန်း မကောင်းသောအခြေအနေ ရှိပါက အခွန်ကင်းလွတ်ခွင့်ကို ၅ နှစ်ခန့်ပေးခြင်း၊ ငွေကြေးအထောက်အပံ့ အလို့ငှာ သက်သာသောအတိုးနှုန်းဖြင့် နှစ်လတ်နှစ်ရှည်ချေးပေးခြင်း၊ တိုးတက်သောခေတ်နှင့် လျော်ညီသည့် နည်းပညာများ ရရှိနိုင်သော အခွင့်အလမ်းများ ဖော်ဆောင်ပေးခြင်း စသည့်အချက်များကို ထည့်သွင်းစဉ်းစားသင့်ပြီး မြန်မာနိုင်ငံတွင် အရေအတွက်အများဆုံးဖြစ်သော အသေးစား စီးပွားရေးလုပ်ငန်းများ တိုးတက်ရေးနှင့် ပြန်လည်ရှင်သန်ရေးအတွက် မည်သို့ စီမံချက်များရှိသည်ကို သိရှိ လိုပါကြောင်း မေးမြန်းပါသည်။