၂၀၀၆ ခုနှစ်မတိုင်မီ ချင်းပြည်နယ်၊ ထန်တလန်မြို့နယ်တွင် အရက်လိုင်စင်များကို ပုဂ္ဂလိကများသို့ ချပေးခဲ့သဖြင့် အရက်ဆိုင်များ စည်းကမ်းမဲ့ဖွင့်လှစ်ခြင်းကြောင့် အရက်သောက်သူများပြားခြင်း၊ အရက်ကြောင့် အသက်ဆုံးရှုံးသူများ၊ အိမ်ထောင်ရေး ပြဿနာများ၊ လူငယ်များ အကျင့်စာရိတ္တပျက်စီးခြင်း၊ ခိုးမှု၊ ဖောက်ထွင်းမှုများကြောင့် ရပ်ရွာအေးချမ်း သာယာမှုု ထိခိုက်ခြင်းများ ကို တွေ့ရှိရပါကြောင်း၊ ၂၀၀၈ ခုနှစ်မှ ၂၀၁၂ ခုနှစ်အထိ မြို့မိ မြို့ဖ ရပ်ကွက် အုပ်ချုပ်ရေးမှူး၊ ဘာသာရေးအဖွဲ့များ ပူးပေါင်း၍ အရက်လိုင်စင် ရယူခြင်းဖြင့် ပိတ်ပင်တားဆီးနိုင်ခဲ့ပြီး ပြဿနာ များ လျော့နည်းခဲ့သော် လည်း ၎င်းတို့အနေဖြင့် အရက်လိုင်စင်များ ရာသက်ပန် ယူရန် မဖြစ်နိုင်သောကြောင့် အရက်လိုင်စင်များ ကို ပုဂ္ဂလိကများသို့ ထပ်မံချပေးပါက ပြဿနာ များ ပြန်လည် ပေါ်ပေါက်လာ မည် ဖြစ်ပါကြောင်း၊ သို့ဖြစ်ပါ၍ ဖွဲ့စည်းပုံဥပဒေပုဒ်မ ၁၈၈ တွင် တိုင်းဒေသကြီး သို့မဟုတ် ပြည်နယ်လွှတ်တော်၏ ဥပဒေပြုစာရင်းပါ ကိစ္စရပ် ၂၄ ရပ်၊ တိုင်းဒေသကြီး သို့မဟုတ် ပြည်နယ် တစ်စိတ်တစ်ဒေသ သော်လည်းကောင်း၊ အာဏာ သက်ရောက်စေရန် ဥပဒေပြုခွင့်ရှိသည်ဟု ဖော်ပြထားပါကြောင်း၊ တိုင်းဒေသကြီး သို့မဟုတ် ပြည်နယ် ဥပဒေပြုစာရင်းပါ အပိုဒ်(၁) ဘဏ္ဍာရေးနှင့် စီမံကိန်းကဏ္ဍအောက်ရှိ အပိုဒ်ခွဲ(ဃ)ပါ ယစ်မျိုးခွန်ကို ထန်တလန်မြို့နယ်အတွက် တားမြစ် ပိတ်ပင်နိုင်ရန် လိုအပ်သော ဥပဒေကို ထုတ်ပြန်ပေးနိုင်ရန်နှင့် ထန်တလန်မြို့တွင် ၂၆-၃-၂၀၁၃ ရက်နေ့၌ ပြည်သူ လူထု ၂၀၀၀ ကျော်မှ ငြိမ်းချမ်းစွာ ဆန္ဒဖော်ထုတ်ခဲ့ပြီး ယင်း အရက် လိုင်စင်များ ပိတ်ပင်ပေးပါရန် ဆန္ဒပြုပြည်သူ လူထု ၁၃၆၅ ၏လက်မှတ်ကို လည်း ရေး ထိုးခဲ့ပြီးဖြစ်ပါကြောင်း၊ ချင်းတိုင်းရင်းသားများသည် အရက်ကို စည်းကမ်း မရှိ သောက်သုံးသဖြင့် အထူး အလေးပေး ဆောင်ရွက်ပေးရန် မေးမြန်းပါသည်။