ဝေးလံခေါင်သီပြီး လမ်းပန်းဆက်သွယ်ရေး အလွန်ခက်ခဲသည့်ဒေသတွင် ကျန်းမာရေး စောင့်ရှောက်မှုကို ထိရောက်စွာ လွှမ်းခြုံနိုင်စေရန်အတွက် မေးမြန်းရခြင်းဖြစ်ပါကြောင်း၊ ချင်းပြည်နယ်၊ ဖလမ်းမြို့နယ်၊ ဖလမ်းမြို့ခုတင် (၂၀၀) ဆံ့ဆေးရုံတစ်ရုံ၊ ဖလမ်းမြို့သူနာပြု သင်တန်းကျောင်း တစ်ကျောင်း၊ တိုက်နယ်ဆေးရုံသုံးရုံ၊ ကျေးလက်ကျန်းမာရေးဌာနရှစ်ခု၊ ကျေးလက်ကျန်းမာရေးဌာနခွဲ ၃၆ ခုဖွင့်လှစ်လျက်ရှိပါကြောင်း၊ အဆိုပါကျေးလက်ကျန်းမာရေး ဌာနခွဲများအနက် ရမ်တလိုရွာ ကျေးလက်ကျန်းမာရေးဌာနခွဲသည် အရှေ့ဘက် လာလွန်ရွာ ကျေးလက်ကျန်းမာရေးဌာနမှ မိုင် ၆၀၊ အနောက်ဘက် ဆယ်ပီးရွာ ကျေးလက်ကျန်းမရေးဌာနမှ ၅၂ မိုင်၊ မြောက်ဘက်တီးဘွာလ် တိုက်နယ်ဆေးရုံမှ မိုင် ၆၀ ကွာဝေးပြီး ဖလမ်း-ဟားခါး ကားလမ်းမပေါ်တွင် တည်ရှိပါကြောင်း၊ ချင်းပြည်နယ်သည် လမ်းပန်းဆက်သွယ်ရေး ခက်ခဲခြင်း၊ ပြည်သူလူထုအများစု ဝင်ငွေနည်းပါးပြီး ဆင်းရဲနွမ်းပါးခြင်း၊ ကျန်းမာရေးဝန်ထမ်းနှင့် ဆေးဝါးလုံလောက်မှုမရှိခြင်းစသည့် အခြေအနေများနှင့် ရင်ဆိုင်နေကြရခြင်း ဖြစ်ပါကြောင်း၊ ရမ်တလိုရွာတွင် ကျေးလက်ကျန်းမာရေးဌာန (Rural Health Center) ဖွင့်လှစ်ပေးပါက ရွာပေါင်း ၁၃ ရွာ၊ လူဦးရေအားဖြင့် လေးထောင်ကျော် ကျန်းမာရေးအတွက် အကျိုးပြုနိုင်မည်ဖြစ်ပြီး ရမ်တလိုရွာသည် မဟာဓာတ်အားလိုင်းမှ လျှပ်စစ်မီး ၂၄ နာရီရရှိပြီး သောက်သုံးရေ ဖူလုံစွာရရှိပါကြောင်း၊ ဌာနဆိုင်ရာအဖွဲ့အစည်း ကိုးခုရှိပြီး ကျန်းမာရေးဌာနအတွက် မြေ ၂ ဒသမဧကပေါ်တွင် ဂျပန်အကူအညီဖြင့် ဆောက်လုပ်ထားသော အဆောက်အဦ ကွန်ကရစ်ခင်း၊ အုတ်စီ၊ သွပ်မိုးတစ်လုံးရှိထားပြီး ဖြစ်ပါကြောင်း၊ သို့ဖြစ်ပါ၍ ဖလမ်းမြို့နယ်၊ ရမ်တလိုရွာ ကျေးလက်ကျန်းမာရေးဌာနခွဲအား ကျေးလက်ကျန်းမာရေးဌာန (Rural Health Center) အဖြစ် တိုးမြှင့်ဖွင့်‌လှစ်ပေးပါရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။